Read Iban Nehemiah 2 Bible Online

Nehemiah 2 - Iban bible

Nehemiah 2

¹Nyadi sekali, empat bulan udah bekau nya, lebuh Raja Besai Artaserses benung makai, aku mai wain ngagai iya. Iya enda kala meda mua aku ngemalat nya tusah.

²Nya alai iya nanya, “Nama kebuah nuan tusah ati baka nya? Nuan ukai sakit. Kada enda laban nuan enda lantang ati.” Aku lalu takut.

³ Ku aku nyaut raja, “Awakka Tuan Raja idup belama iya! Baka ni ku aku ulih nagang mua diri tusah enti nengeri ti alai aki ini aku dikuburka nyau nyadi tembawai, lalu pintu nengeri nya nyau udah retung diempa api?”

⁴Raja besai lalu nanya, “Nama utai ti dikedekaka nuan?” Aku lalu besampi ngagai Allah Taala ti di serega,

⁵lalu nyebut ngagai raja besai, “Enti Tuan Raja lantang ati enggau aku, lalu deka meri utai ti dipinta aku, awakka aku mansang ngagai menua Judah, ngagai nengeri alai aki ini aku dikuburka, ngambika aku ulih ngaga nengeri nya baru.”

⁶Raja besai, ke duduk berimbai enggau kuin, ngemendarka peminta aku. Iya nanyaka pengelama aku di Jerusalem, enggau kemaya aku deka pulai ari nyin, lalu aku madahka ngagai iya.

⁷Udah nya aku lalu minta kasih ngagai iya, minta iya meri aku surat ngambika bisi dibai aku ngagai bala tuan gabenor di Menua Ti Di Barat Eupratis,[2] ngasuh sida ngemendarka aku bejalai ngagai menua Judah.

⁸Aku mega minta siti surat ditujuka ngagai Asap, ke nyaga utan perintah, ngasuh iya meri aku kayu ramu kena ngaga pintu kuta ti dikena nyaga Rumah Sembiang, kena ngaga dinding kuta nengeri, enggau kena ngaga rumah alai aku diau. Raja besai meri semua utai ti dipinta aku, laban Allah Taala bisi enggau aku.

⁹Raja besai lalu ngasuh bala pemesai soldadu enggau bala soldadu ke nepan kuda, bejalai enggau aku. Aku lalu mansang ngagai Menua Ti Di Barat Eupratis. Dia aku meri surat raja besai ngagai bala tuan gabenor.

¹⁰Tang lebuh Sanbalat ke ari nengeri Bet-horon, enggau Tobiah, siku pemesai di sitak menua Amon, ninga orang siku bisi udah datai deka nulung orang Israel, seduai iya balat amat pedis ati.

¹¹Aku lalu datai di Jerusalem, lalu dalam kandang tiga hari sekumbang aku ti udah datai

¹²aku nadai madahka ngagai orang utai ti udah diasuh Allah Taala kereja aku ke nengeri Jerusalem. Udah nya, ba urung tengah malam, aku angkat, lalu pansut, mai dua tiga iku pangan enggau aku. Kami mai semina siku aja keledai ti ditepan aku.

¹³Hari endang udah malam lebuh aku pansut ari nengeri nengah Pintu Lebak ti di barat, lalu bejalai nuju ke selatan mansa Ai Engkeching Naga, ngagai Pintu Uras. Lebuh aku bejalai, aku meresa dinding nengeri ti udah pechah, enggau pintu nengeri ti udah rusak ditunu.

¹⁴Udah nya, ba tisi timur nengeri nya, aku lalu bejalai nuju ke utara ngagai Pintu Ai Engkeching, enggau Letung Raja. Keledai ti ditepan aku nadai tetemuka jalai nengah tugung batu ari rumah ti udah runtuh.

¹⁵Nya alai aku lalu nurun ngagai Lebak Kidron, lalu majakka pejalai aku, meresa dinding nya. Udah nya aku pulai baru ngagai nengeri nengah jalai aku mansang, nengah Pintu Lebak.

¹⁶Nadai siku pemesai di nengeri nya nemu tunga pejalai aku, tauka utai ti udah dikereja aku. Nyentuk ngagai maya nya, aku endang apin nyebut sebarang utai ngagai orang Judah ti bukai, iya nya bala imam, bala tuai bansa, bala pemesai, tauka orang bukai ti deka sama enggau ngereja pengawa nya.

¹⁷Tang udah nya aku bejaku enggau sida, “Peda kita pemalat penusah kitai tu, laban Jerusalem tu nyau nyadi tembawai, lalu pintu iya rusak! Nya alai aku mai bala kitai ngaga dinding kuta nengeri tu baru, kena muai pemalu kitai.”

¹⁸Aku lalu madahka ngagai sida pasal Allah Taala ti udah enggau aku, lalu nulung aku, enggau pasal utai ti udah disebut raja besai ngagai aku. Sida lalu nyaut, “Awakka kitai berengkah ngaga dinding kuta nya baru!” Sida lalu sedia deka berengkah ngereja pengawa nya.

¹⁹Lebuh Sanbalat, Tobiah enggau siku orang Arab ke benama Gesem ninga pasal utai ti deka dikereja kami, sida ketawaka kami, lalu ku sida, “Nama utai ti dikereja kita? Kati kita deka angkat ngelaban raja besai?”

²⁰Aku lalu nyaut, “Allah Taala ti di serega deka ngasuh kami mujur. Kami tu nembiak Iya, lalu kami deka berengkah ngaga dinding kuta tu baru. Tang kita nadai hak bempu sebarang reta tengkira di Jerusalem, lalu nama kita sigi enda dikingatka orang jemah ila.”