Read Iban Nehemiah 4 Bible Online

Nehemiah 4 - Iban bible

Nehemiah 4

¹Lebuh Sanbalat ninga kami orang Judah udah berengkah ngaga dinding kuta nya baru, iya pedis ati lalu berengkah ngeleseka kami.

²Ku iya bejaku di mua bala pangan iya enggau di mua bala soldadu orang Samaria, “Nama utai ti dikereja bala orang Judah ke lemi tu? Kati sida deka nirika nengeri nya baru? Kati sida ngumbai diri ulih nembuka pengawa nya dalam sehari ketegal sida ngenjuk piring? Kati sida ngumbai diri ulih ngaga utai ngena tugung batu ti udah ditunu?”

³Nyadi Tobiah bisi bediri dia ngimbai sida, lalu ku iya bejaku, “Ni gaya kuta ti deka digaga sida? Indah munsang deh ulih ngeruntuhka kuta nya!”

⁴Aku lalu besampi, “Dinga Nuan jalai sida ngeleseka kami, O Allah Taala! Awakka jaku kelese sida ninggang sida empu. Awakka semua utai ti dikemisi sida dirampas magang ari sida, lalu awakka sida nyadi orang tangkap lalu ditabanka ngagai menua bukai.

⁵Anang ngampun penyai sida, lalu anang enda ingatka dosa sida, laban sida udah mechat kami ke ngaga dinding kuta tu.”

⁶Nya alai kami majak ngaga dinding kuta nya. Enda lama udah nya dinding kuta nyau bulih setengah peninggi ari ti dijuluk ati kami, laban orang mayuh ransing gawa.

⁷Sanbalat, Tobiah, enggau orang Arab, orang Amon, enggau orang Asdot balat amat pedis ati lebuh sida ninga pasal pemansang pengawa kami ke begagaka dinding kuta Jerusalem, sereta ngalitka semua endur ti sawang ba dinding kuta nya.

⁸Nya alai semua sida bepekat deka nyerang Jerusalem, lalu ngaga pengachau.

⁹Tang kami besampi ngagai Allah Taala kami, lalu ngasuh orang nyaga kami ari sida siang malam.

¹⁰Orang Judah bisi siti lagu ti dinyanyi sida: “Kami nyau lembut tulang mai utai ti berat. Mayuh amat batu ti udah runtuh enda tau enda dibai kebukai. Baka ni ku kami ulih nirika dinding kuta tu sehari tu?”

¹¹Bala munsuh kami ngumbai kami enda meda sida, tauka enda nemu utai ti nyadi, sebedau sida nyerang kami, munuh kami lalu ngemuntanka pengawa kami.

¹²Tang orang Judah ti diau begulai enggau bala munsuh seruran datai madahka pelan munsuh ti deka ngelaban kami.

¹³Nya alai aku lalu meri pedang, sangkuh, enggau panah ngagai orang mayuh, lalu ngasuh sida jaga di belakang dinding kuta nitihka ripih raban peturun sida empu, ba endur alai dinding kuta ti apin tembu digaga.

¹⁴Aku meda orang mayuh irau ati. Nya alai aku bejaku enggau sida, enggau ngagai bala tuai enggau bala pemesai, “Anang takutka munsuh kitai. Kingatka pemesai enggau pengering TUHAN kitai, lalu laban meh munsuh kitai, kena nyaga kaban belayan kita, bala anak, bala bini, enggau rumah kita.”

¹⁵Lebuh munsuh kami ninga kami udah nemu pekat sida, nya baru sida nemu Allah Taala udah ngemuntanka pelan sida. Udah nya semua kami lalu pulai baru ngagai pengawa begagaka dinding kuta nya.

¹⁶Berengkah ari nya, setengah ari bala aku bekereja, lalu setengah jaga, ngena baju kebal, mai sangkuh, terabai, enggau panah. Lalu bala tuai kami nyukung orang mayuh

¹⁷ke begagaka dinding kuta nya. Indah orang ke mai utai ti dikena begagaka dinding kuta, deh bekereja ngena jari sepiak, lalu jari sepiak megai senyata.

¹⁸Semua orang ke gawa bela nangkin pedang magang. Orang ke nyepu terumpit kena megau orang mayuh endang seruran enggau aku.

¹⁹Ku aku madahka ngagai orang mayuh enggau ngagai bala pemesai sida, enggau ngagai bala tuai, “Pengawa tu nyau ngachir jauh-sejauh, lalu bala kitai nyau jauh-sejauh ari pangan diri ba dinding kuta tu.

²⁰Enti kita ninga munyi terumpit, kita enda tau enda begempuru ngelingi aku. Allah Taala kitai deka beperang ngarika kitai.”

²¹Nya alai tiap hari, kenyau ari dini hari nyentuk ngagai bintang nyau pegari malam hari, setengah ari bala kami gawa ngaga dinding kuta nya, lalu setengah jaga bepegaika sangkuh.

²²Lebuh maya nya aku bisi madahka ngagai orang ke nyadi tuai, sida enggau bala penulung sida enda tau enda diau di Jerusalem lebuh malam hari, ngambika kami ulih nyaga nengeri lebuh malam hari, lalu gawa lebuh siang hari.

²³Lebuh malam hari aku, bala pangan aku, bala orang gaji, enggau orang ke jaga mengkang ngena gari ti dikena kami bekereja. Senyata kami endang seruran ba jari kami.