Read Iban Nehemiah 6 Bible Online

Nehemiah 6 - Iban bible

Nehemiah 6

¹Lebuh Sanbalat, Tobiah, Gesam, enggau bala munsuh kami ke bukai ninga kami udah nembuka dinding kuta, lalu dinding nya nyau nadai agi pesuk, taja pen kami apin nirika pintu ba ruang pintu,

²Sanbalat enggau Gesam ngirumka pesan ngagai aku, minta aku betemu enggau sida ba siti genturung pendiau ti ba Emperan Ono. Tang aku nemu, sida deka ngemediska aku.

³Aku lalu ngasuh orang mai pesan tu ngagai sida: “Aku enda ulih nurun kin laban aku benung ngereja pengawa ti besai amat guna, lalu aku enggai ngasuh pengawa tu tejanggal ngapa ketegal betemu enggau kita.”

⁴Empat kali sida mesanka aku. Genap kali sida mesanka aku, baka nya ga saut aku.

⁵Udah nya Sanbalat lalu ngasuh siku ari bala nembiak iya betemu enggau aku, mai pesan ti kelima, ngena siti surat ti enda ditutup.[7]

⁶Munyi tu ku surat nya: “Gesam madahka ngagai aku, berita bisi udah selebubu ngapa ba sebelah orang ke bekelingi ditu, madahka nuan enggau orang Judah ngaga dinding kuta tu laban kita deka angkat ngelaban perintah. Berita nya mega madahka nuan deka nyiri diri empu nyadi raja

⁷lalu nuan udah meri atur ngasuh bala imam madahka, di Jerusalem, nuan raja orang Judah. Tuan Raja tetap deka ninga pasal utai tu, nya alai aku minta tua betemu lalu berandauka pekara tu.”

⁸Aku lalu ngirumka saut ngagai iya: “Semua utai ti disebut nuan bula magang. Semua utai tu dikeluluka nuan magang.”

⁹Sida nguji ngemba kami ngambika kami badu agi gawa. Aku lalu besampi, “TUHAN Allah Taala, asuh aku kering!”

¹⁰Kira ba urung maya nya aku nemuai ngagai Semaiah anak Delaiah, uchu Mehetabel, ti enda ulih mindah ari rumah. Ku iya bejaku enggau aku, “Tua enda tau enda mupuk lalu belalai ba Endur ti Kudus dalam Rumah Sembiang, lalu ngunchi diri dia, laban sida deka datai lalu munuh nuan. Kada enda malam tu sida deka datai lalu munuh nuan.”

¹¹Ku aku nyaut, “Aku tu ukai orang ke rari lalu belalai. Kati nuan ngumbai aku deka belalai dalam Rumah Sembiang lalu ngidupka nyawa diri? Aku enda.”

¹²Lebuh aku berundingka utai nya, nya baru aku nemu Allah Taala nadai bejaku ngena Semaiah. Semaiah meri aku jaku tangkan nya laban Sanbalat seduai Tobiah udah nyuap iya nyebut jaku nya.

¹³Sida ngaji iya bejaku ngemba aku, ngambika aku bedosa, lalu ari nya ngenyaika nama aku lalu ngemaluka aku.

¹⁴Aku lalu besampi, “Allah Taala, kingatka utai ti udah dikereja Tobiah enggau Sanbalat, lalu ukum seduai iya. Kingatka indu ke benama Noadiah enggau semua bala nabi ti bukai ti udah nguji ngemba aku.”

¹⁵Lebuh kami udah bekereja 52 hari, semua kuta nya tembu magang digaga kena dua puluh lima hari bulan Elul.

¹⁶Lebuh bala munsuh kami di menua ti ngelingi kami, ninga berita nya, sida takut, laban semua orang nemu pengawa nya tembu ari tulung Allah Taala.

¹⁷Sekumbang maya nya, bala tuai orang Judah endang selalu ngirumka surat ngagai Tobiah, lalu Tobiah mega selalu ngirumka surat ngagai sida,

¹⁸laban orang Judah mayuh setanah enggau iya laban mentua iya ti lelaki, Sekaniah anak Arah, nya orang Judah. Nambahka nya, anak lelaki iya ke benama Jehohanan jadi enggau anak indu Mesulam anak Berekiah.

¹⁹Orang selalu bejaku di mua aku madahka semua utai ti manah ti udah dikereja Tobiah, lalu sida madahka ngagai iya semua utai ti disebut aku. Lalu iya majak ngirumka surat ngagai aku kena iya ngemba aku.