Read Iban Nehemiah 8 Bible Online

Nehemiah 8 - Iban bible

Nehemiah 8

¹Dalam bulan ti ketujuh semua orang Israel bela udah ngentapka diri magang dalam nengeri diri empu. Kena satu hari bulan nya, semua sida begempuru magang di Jerusalem, ba padang semak Pintu Ai. Sida ngasuh Esra ngambi Bup Adat Moses ti udah diberi TUHAN ngagai orang Israel.

²Esra lalu mai bup nya ngagai endur alai semua orang ke lelaki, sida ke indu, enggau bala anak mit ti udah nemu meretika utai, begempuru.

³Iya lalu macha Adat nya ngagai sida ba padang semak pintu nya, kenyau ari dini hari nyentuk ngagai tengah hari, lalu semua sida nyinuk mending.

⁴Esra bediri ba panggau, ti endang udah disediaka alai ngereja pengawa nya. Tu nama orang ke bediri ari kanan Esra: Matitiah, Sema, Anaiah, Uriah, Hilkiah, enggau Maseiah. Orang ke bediri ari kiba iya: Pedaiah, Misael, Malkijah, Hasum, Hasbadanah, Sekariah, enggau Mesulam.

⁵Esra bediri ba panggau nya ari atas orang mayuh, lalu semua sida bela merening ngagai iya magang. Lebuh iya ngebakka bup nya, semua sida bediri magang.

⁶Ku Esra, “Pujika TUHAN Allah Taala ti pemadu besai!” Semua orang mayuh lalu ngangkatka jari sida, lalu nyaut, “Amin! Amin!” Sida besugang lalu nyungkurka diri ke tanah nyembah Allah Taala.

⁷Udah nya sida angkat lalu bediri, lalu bala orang Lewi nerangka Adat nya ngagai sida. Tu nama orang Lewi nya: Jesua, Bani, Serebiah, Jamin, Akup, Sabetai, Hodiah, Maseiah, Kelita, Asariah, Josabat, Hanan, enggau Pelaiah.

⁸Sida lalu nyalinka [9] Bup Adat Allah Taala nya, sereta nerangka iya [10] ngambika orang mayuh meretika iya.

⁹Lebuh orang mayuh ninga utai ti diguna Adat, ati sida balat kena tegu datai ke sida belabuh nyabak. Nya alai Nehemiah, ti nyadi tuan gabenor, Esra ti nyadi imam sereta landik pasal Adat, enggau bala orang Lewi nerangka Adat lalu madahka ngagai orang mayuh, “Tu hari ti kuduska TUHAN Allah Taala kita. Nya alai kita enda tau ngulit tauka nyabak.

¹⁰Pulai ke rumah, lalu intu pengerami makai besai. Bagi pemakai enggau wain kita enggau orang ke nadai chukup utai diempa. Tu hari ti kuduska TUHAN. Nya alai, anang ngasuh ati kita tusah. Pengaga ti diberi TUHAN ngagai kita, deka ngasuh kita kering.”

¹¹Bala orang Lewi bejalai ngagai orang mayuh minta sida diau jenuh, lalu enda tusah ati ba hari ti kudus nya.

¹²Nya alai semua orang mayuh pulai, lalu makai ngirup enggau ati ti gaga, sereta magi utai ti dikemisi sida enggau orang bukai, laban sida meretika utai ti udah dibacha ngagai sida.

¹³Hari siti bala tuai peturun, enggau bala imam enggau orang Lewi, mansang ngagai Esra, deka belajarka ajar ari Adat.

¹⁴ Nya baru sida nemu, Adat ti udah diberi TUHAN ngena Moses, ngasuh orang Israel diau ba dunju lebuh Gawai Belangkau.

¹⁵Nya alai sida madahka atur tu ngagai serata nengeri Jerusalem, enggau ngagai nengeri bukai enggau nengeri ti mit: “Kita enda tau enda mansang ngagai bukit, lalu ngambi dan kayu pain, kana, mertil, engkerema enggau kayu bukai, kena ngaga dunju nitihka atur ti ditulis dalam Adat.”

¹⁶Orang mayuh lalu ngambi dan kayu, lalu ngaga dunju ba perabung rumah sida, ba tengah laman, ba tengah laman Rumah Sembiang, enggau ba padang nengeri ti semak Pintu Ai, enggau ngimbai Pintu Epraim.

¹⁷Semua orang ke udah pulai ari menua Babilon bela ngaga dunju magang lalu diau dia. Tu keterubah iya utai tu dikereja kenyau ari maya Josua anak Nun. Semua orang mayuh gagit sereta lantang ati magang.

¹⁸Kenyau ari hari ti keterubah ba Gawai nya nyentuk ngagai hari ti penudi, sida macha sebagi ari Adat Allah Taala tiap hari. Sida ngintu Gawai nya tujuh hari, lalu ba hari ti kelapan, sida besembiang bebala mayuh nitihka atur Adat.