Read Iban Nehemiah 9 Bible Online

Nehemiah 9 - Iban bible

Nehemiah 9

¹Kena dua puluh empat hari bulan nya, orang Israel begempuru. Sida bepasa, ngerasukka kain guni sereta ngerabu pala sida enggau amau.

²Sida lalu nyeraraka diri ari semua orang bansa bukai, lalu bediri lalu belabuh ngaku dosa sida enggau dosa aki ini sida.

³Sida bediri ba endur sida tiga jam mendingka Adat TUHAN Allah Taala sida dibacha ngagai sida, lalu dalam tiga jam nangkanka nya, sida ngaku dosa sida, lalu nyembah TUHAN Allah Taala sida.

⁴Udah nya Jesua, Bani, Kadmi-el, Sebaniah, Buni, Serebiah, Bani, enggau Chenani lalu bediri ba panggau ti endang diungkupka orang Lewi, lalu besampi enggau nyawa ti inggar ngagai TUHAN Allah Taala sida.

⁵Udah nya orang Lewi, iya nya, Jesua, Kadmi-el, Bani, Hasapneiah, Serebiah, Hodiah, Sebaniah, enggau Petahiah, lalu bejaku: “Bediri lalu puji TUHAN Allah Taala kita. Puji Iya belama lama iya! Puji meh nama Nuan ti bemulia, taja pen Nuan tinggi agi ari ke ulih dipuji mensia.

⁶Semina Nuan siku aja ti TUHAN; Nuan udah ngaga semua langit enggau bintang; Nuan ngaga tanah enggau tasik, enggau semua utai ti dalam sida. Nuan udah meri sida seput, lalu semua utai ti di langit nyembah Nuan.

⁷ Nuan endang TUHAN Allah Taala ti udah milih Abram lalu mai iya pansut ari Ur di menua Babilon, lalu meri iya nama Abraham;

⁸ lalu Nuan nemu iya endang tetap ati ngagai Nuan, lalu Nuan ngaga siti sempekat enggau iya, madahka Nuan deka meri ngagai peturun iya menua orang Kanaan, menua orang Iti enggau menua orang Amor, menua orang Peris, menua orang Jebus, enggau menua orang Girgas; lalu Nuan udah ngamatka semaya Nuan, laban Nuan endang lurus.

⁹ “Lalu Nuan udah meda pemerinsa aki ini kami di menua Ejip, lalu ninga sabak sida ba Tasik Mirah.

¹⁰ Nuan udah ngereja kereja ajih ngelaban raja, enggau ngelaban bala pemesai iya, enggau ngelaban orang ke di menua iya, laban Nuan nemu pemalat sida udah nekanka pengidup bala nembiak Nuan. Nama Nuan tampak nyentuk ngagai sehari tu.

¹¹ Lalu Nuan nyeraraka ai tasik ke sida ngambika sida ulih bejalai nengah tasik nya nengah tanah ti rangkai, tang Nuan nikauka orang ke begagaika sida ngagai ai ti dalam, baka ke nikauka batu ngagai tasik ti begelumbang.

¹² Nambahka nya, Nuan nguluka sida ngena mua hari lebuh siang hari lalu lebuh malam hari Nuan nenggau jalai sida ngena api.

¹³ Nuan mega nurun ngagai Bukit Sinai, lalu bejaku ngagai bala nembiak Nuan ari serega, lalu meri sida adat ti bendar enggau pesan ti menyana,

¹⁴lalu Nuan ngajar sida ngintu Hari Sabat ti kudus, lalu meri sida pesan enggau adat beseruanka nembiak Nuan Moses.

¹⁵ “Lebuh sida lapar, Nuan meri sida roti ari serega, lalu lebuh sida aus, Nuan meri sida ai ari batu; lalu Nuan ngasuh sida ngambi menua ti udah disemaya Nuan ngagai sida.

¹⁶ Tang bala aki ini kami sumbung sereta kieh lalu enda ngasika pesan Nuan.

¹⁷ Sida enggai ngasi, lalu sida enda ingatka semua kereja ti nyelai ti udah dikereja Nuan, tang kieh lalu ingin deka pulai baru ngagai menua Ejip lalu nyadi ulun baru. Tang Nuan endang Allah Taala ti seruran sedia deka ngampun, ke kasih, lubah ringat, sereta penuh laban pengerindu ti meruan belama iya, lalu Nuan enda ninggalka sida.

¹⁸ Indah lebuh sida ngaga siku engkeramba anak sapi lalu ngumbai nya petara ti udah nguluka sida pansut ari menua Ejip, lalu bejaku busung ngelaban Nuan,

¹⁹ deh Nuan enda ninggalka sida di menua puang, laban pengasih Nuan endang amat besai. Tiang remang ti nguluka sida lebuh siang hari, enggau tiang api ti nguluka sida lebuh malam hari nadai kala ninggalka sida.

²⁰Ngena kuasa Nuan, Nuan ngajar sida, lalu Nuan meri sida mana nyadika pemakai sida, lalu meri sida ai irup.

²¹Nuan nupi sida di menua puang empat puluh taun; lalu sida nadai suntuk utai; gari sida enda luya, lalu kaki sida enda kembai.

²² “Nuan meri sida menua enggau bansa, lalu meri ngagai sida semua menua Raja Sihon ke merintah di Hesbon enggau menua Raja Og ke merintah di Basan.

²³ Nuan ngasuh peturun sida nambah-menambah ngemayuh bintang ti di langit; lalu ngasuh sida ngalahka lalu diau di menua ti udah disemaya deka diberi Nuan ngagai aki ini sida.

²⁴ Nya alai sida tama lalu ngalahka menua Kanaan, lalu Nuan ngalahka orang ke diau di menua nya, iya nya orang Kanaan, lalu nyerahka orang Kanaan ngagai jari sida, sama enggau raja enggau semua orang di menua nya, ngambika sida ngereja utai ngagai orang nya sepeneka ati sida.

²⁵ Lalu sida ngalahka nengeri ti bekuta, menua ti ami, rumah ti penuh laban pengaya, telaga ti udah digaga, kebun anggur, kebun buah kana, mayuh kayu buah; Nya alai sida makai utai, kenyang lalu gemu, lalu ngelantangka diri ngena semua utai ti manah ti udah diberi Nuan ngagai sida.

²⁶ Tang bala nembiak Nuan enda ngasi lalu sida angkat ngelaban Nuan; Sida ngelengkaka Adat Nuan, lalu munuh bala nabi ti meri sida jaku tangkan ti ngasuh sida pulai baru ngagai Nuan, lalu sida bejaku busung ngelaban Nuan.

²⁷Nya alai Nuan nyerahka sida ngagai jari munsuh ke merinsaka sida. Udah nya, lebuh sida merinsa, sida nyabak ngagai Nuan, lalu Nuan ninga sida ari serega, lalu laban Nuan enda penuh pengasih, Nuan meri sida bala tuai ke ngelepaska sida ari jari munsuh sida.

²⁸Tang lebuh menua nyau nadai agi pengachau, sida lalu bedosa baru, lalu Nuan nyerahka sida ngagai jari munsuh sida, ngambika munsuh sida merintah sida; tang lebuh sida nesal ati, lalu nyabak ngagai Nuan, Nuan ninga sida ari serega, lalu Nuan suah ngelepaska sida laban Nuan kasihka sida.

²⁹ Nuan meri sida jaku tangkan ngasuh sida pulai baru ngagai Adat Nuan, tang sida sumbung lalu enda ngasika pesan Nuan, tang bedosa ngelaban Adat Nuan, Adat ti ulih nyelamatka sida. Sida kieh lalu enggai ngasi.

³⁰ Berapa taun Nuan udah liat ati enggau sida, lalu ulih Roh Nuan meri jaku tangkan ngena bala sida nabi Nuan; tang sida enggai mending. Nya alai Nuan nyerahka sida ngagai jari orang ke di menua nya.

³¹Tang laban pengasih Nuan endang besai, Nuan enda ngerusak sida tauka ninggalka sida, laban Nuan endang Allah Taala ti siru sereta kasih!

³² “Nya alai diatu, O Allah Taala kami, Allah Taala ti besai kuasa, ke diketakutka kami, ke ngingatka sempekat sereta meruan rinduka kami, anang enda merening ngagai semua pemerinsa ti udah ninggang kami ninggang raja kami, bala pemesai, imam, nabi enggau aki ini kami enggau semua nembiak Nuan kenyau ari maya bala raja menua Asiria udah nekanka pengidup kami, nyentuk ngagai diatu.

³³Nuan endang ngereja utai ti ngena lebuh Nuan ngukum kami, laban Nuan udah tetap ati lalu ngereja utai ti ngena, lalu kami pen udah mega bedosa.

³⁴Bala aki ini kami, raja kami, bala tuai enggau bala imam kami enda nitihka Adat Nuan. Sida enda mendingka pesan enggau jaku tangkan Nuan.

³⁵Sida ke nyadi raja ngasuh bala nembiak Nuan ngena berekat ti diberi Nuan, lebuh sida diau di menua ti luas, ti udah diberi Nuan ngagai sida. Tang sida enda nesal ati ke dosa sida lalu enda betuaika Nuan.

³⁶Nyadi diatu kami tu nyadi ulun di menua ti udah diberi Nuan ngagai kami, menua ti ami tu, ti meri kami pemakai.

³⁷Asil ti ulih kami ari tanah, pulai ngagai raja ti udah diasuh Nuan merintah kami, laban kami udah bedosa. Sida sepeneka ati ngayahka kami, sereta ngayahka jelu tupi kami, lalu kami tu balat tusah!”

³⁸Ketegal semua utai ti udah nyadi, kami orang Israel diatu ngaga sempekat ti tetap, lalu bala tuai, bala orang Lewi enggau bala imam kami nanggam sempekat nya ngena chop tambit sida.