Read Iban Tobit 1 Bible Online

Tobit 1 - Iban bible

Tobit 1

¹Aku tu Tobit. Nyadi tu jerita pengidup aku. Apai aku Tobiel; aki aku Ananiel; lalu apai aki aku Aduel. Apai Aduel, Gabael; Aki Gabael, Rafael; aki tuai Gabael, Raguel peturun Asiel ari sekeda raban bansa Naptali.

² Maya Salmaneser nyadi raja di Asiria, aku ditan ba menua aku empu, Tisbe di utara Galili, selatan Kades di Naptali, utara barat Hasor, utara Pogor.

³Seumur idup aku, aku seruran diau lurus. Aku udah enggau naka ulih ngereja pengawa ti betul. Aku suah meri duit kena nulung kaban belayan ke seranta. Aku mega nulung orang Judah bukai ke sama dibuai enggau aku ngagai Nineweh, indu nengeri Asiria.

⁴Lebuh aku agi biak, aku diau di utara Israel. Semua raban bansa Israel, mesti meri piring di Jerusalem, nengeri ti udah dipilih Allah Taala. Dia Rumah Sembiang Iya digaga, nyadika rumah Iya ti kudus sereta meruan belama. Tang semua bansa aku ari raban Naptali nulak nengeri Jerusalem enggau bala raja ari peturun David.

⁵ Kami sebilik baka orang bukai ari raban aku selalu ke nengeri Dan ba menua ti bebukit di utara Galili. Dia sida meri piring ngagai anak patung chapi lelaki ti digaga ari mas diengkah dia ulih Raja Jeroboam ari Israel.

⁶ Semina aku aja ari kami sebilik ke selalu ke Jerusalem deka enggau ngerami gawai pengarap, nitihka Adat Moses ti diasuh kereja semua orang. Aku berumban ke Jerusalem mai bagi ti keterubah ari asil utai ti ditanam aku, anak jelu aku keterubah iya ada, sepuluh peratus ari chapi aku, enggau bulu kambin biri-biri ti baru udah dichukur. Udah nya aku bediri ba mua alta dalam rumah sembiang lalu meri piring ngagai bala imam, peturun Aron.

⁷Aku deka meri sepuluh peratus gandum, wain, minyak kana, buah delima, buah ara enggau buah bukai ngagai bala Lewi ke ngereja pengawa Allah Taala di Jerusalem. Semina ba taun ti ketujuh, maya tanah dilanggang,[1] tiap-tiap taun aku nyual sepuluh peratus da utai kemisi duit nya lalu duit nya dikena aku berami makai besai di Jerusalem.

⁸Tang ba tiap taun ketiga, aku deka meri sepuluh peratus ketiga[2] ngagai orang ke patu balu, enggau orang ari menua bukai ke diau begulai enggau raban aku. Kami berami makai begulai. Aku ngereja nya nitihka Adat Moses, ti diajar Deborah, indai aki aku Ananiel. (Aku nyadi anak patu balu tinggal apai aku parai.)

⁹Lebuh aku nyau besai, aku bebini jadi enggau Anna, indu ari raban bansa aku empu. Kami duai bisi anak lelaki siku benama Tobias.

¹⁰Udah nya aku ditangkap lalu dibuai ngagai menua Asiria, ti ngujungka aku diau di Nineweh. Lebuh kami diau di Nineweh, semua kaban belayan aku enggau bala orang Judah bukai makai pemakai ti sebaka enggau ti diempa orang ke diau dia,

¹¹tang aku enggai.

¹²Laban aku ngasi bendar ke pengasuh Allah Taala ti Pemadu Bekuasa,

¹³nya alai Iya ngasuh Raja Salmaneser bebasaka aku, lalu aku diasuh megai pengawa meli semua utai ti diguna raja.

¹⁴Sebedau raja parai, aku suah ngagai menua Media meli utai ti diguna iya. Bisi sekali, lebuh aku ba nengeri Rages di menua Media, aku ninggalka sekeda bungkus duit ba Gabael, menyadi Gabrias lalu ngasuh iya nyimpan duit nya ke aku. Dalam semua bungkus nya bisi 300 kilogram duit pirak.

¹⁵Pengudah Raja Salmaneser parai, anak iya Senakerip nganti iya nyadi raja. Enda lama udah nya, jalai di Media enda likun ditengah, nya alai, aku nyau enda ulih kin agi.

¹⁶Lebuh Salmaneser agi nyadi raja, aku ngintu bala aku bansa Judah enggau badas. Aku nulung sida barang maya sida begunaka tulung.

¹⁷ Enti sida lapar, aku magi pemakai aku enggau sida; enti sida begunaka gari, aku meri sida sekeda ari gari aku empu. Lebuh aku tepedaka bangkai siku ari bansa aku ditikau ke luar ari dinding kota nengeri nya, aku lalu nguburka iya enggau manah.

¹⁸Nyadi sekali, Senakerip nyumpah Allah Taala, Raja Serega; Allah Taala ngukum iya. Senakerip enda tau enda mulaika diri ari menua Judah. Ba rantau jalai mulaika diri ngagai menua Media, iya balat amat ringat, nya alai iya lalu munuh mayuh bendar orang Israel. Tang aku enggau belalai mindahka semua bangkai nya lalu nguburka sida. Udah nya, lebuh Senakerip ngiga bangkai nya, iya enda tetemuka sida.

¹⁹Tang bisi siku orang ari Nineweh madah ngagai raja pasal aku ke numbakka bangkai orang ti nyadi dengah iya. Lebuh aku nemu raja tetemuka utai ti dikereja aku, aku takut amat. Nyawa aku dalam penusah. Nya alai, aku rari lalu belalai.

²⁰Semua reta ti dikemisi aku dirampas nyadika reta raja. Semina bini aku Anna enggau anak aku Tobias aja ke agi enggau aku.

²¹Kira enam minggu udah nya, dua iku ari bala anak Senakerip munuh iya. Udah nya seduai rari ke bukit Ararat. Anak iya siku da ke benama Esarhadon nyadi raja lalu nuduhka Ahikar, anak menyadi aku benama Anael, megai kuasa atas semua belanja perintah.

²²Iya ti bendar tu kedua kali, Ahikar dipadu mangku pengawa nya, laban lebuh Senakerip nyadi raja menua Asiria, Ahikar nyadi pengintu wain, tukang wang sereta nyadi tukang kira-kira, lalu iya mega udah nyadi pengibun chop kuasa raja. Laban Ahikar anak menyadi aku, nya alai ngena jaku ti manah, iya madah ngagai raja pasal aku. Lalu aku dikemendarka pulai ke Nineweh.