Read Iban Tobit 10 Bible Online

Tobit 10 - Iban bible

Tobit 10

¹Maya nya, tiap hari Tobit ngira pengelama pejalai sida pulai mansang ngagai Rages. Nyau chukup maya anak iya patut datai tang lalu empai, dia Tobit lalu bejaku enggau bini iya,

²“Nama utai nanggul iya? Kada enda udah parai Gabael? Nyangka orang nadai meri iya duit.”

³Tobit irau amat.

⁴Udah nya ku Anna, “Anak aku sigi parai.” Iya lalu belabuh nyabak sereta ngulitka Tobias,

⁵“O anak aku, nama kebuah aku ngelakka nuan bejalai?”

⁶Tobit nguji merindang iya. “Umbas meh nya, wai,” ku iya. “Anang irau. Iya nadai utai ngachau. Nyangka bisi utai nanggul ti ngasuh sida lama. Kelimpah ari nya, pangan iya orang ke dikarap sereta kaban kitai. Anang ngasuh diri empu kelalu irau ke iya. Aku sigi arapka iya benung ba rantau jalai pulai.”

⁷Tang iya nyaut, “Anang mayuh jaku, tinggalka aku kediri! Anang nguji ngemelika aku. Anak aku udah parai.” Tiap hari iya pansut ari rumah ngagai jalai ti ditengah Tobias, deka ngemataka penatai iya sampai ke mata hari padam. Iya enggai diperindang orang.[16] Lebuh iya pulai ke rumah, iya nyabak sereta enda tinduk sepemanjai malam, ngulitka anak iya. Pengerami melah pinang pengelama dua minggu ti udah disemaya Raguel ke anak iya Sarah datai ba ujung. Nya alai, Tobias mansang ngagai iya lalu minta, “Awakka aku pulai diatu. Apai indai aku tentu nadai agi arapka diri ulih meda aku baru. Minta kasihka nuan, awakka aku pulai. Aku udah madahka nuan gaya pendiau iya maya aku ninggalka iya.”

⁸Tang ku Raguel nyaut, “Anak, diau ditu meh enggau aku. Aku deka ngirum seruan ngagai apai nuan madahka iya nuan nadai utai ngawa.”

⁹Tang Tobias majak, “Enda aku ulih! Awakka aku pulai ngagai apai aku.”

¹⁰Nya alai, Raguel tekala nya nyerahka Sarah ngagai Tobias. Iya mega meri Tobias setengah ari semua keresa iya: ulun, chapi, bedus, keledai, unta, gari, duit enggau perengka rumah.

¹¹Raguel merap Tobias lalu merekat pejalai seduai, “Mupuk meh seduai, anak. Arapka seduai likun ba rantau jalai. Awakka Tuhan menua serega nyaga nuan enggau Sarah. Lalu awakka aku panjai umur lalu ulih meda anak seduai.”

¹²Udah nya Raguel bejaku enggau Sarah, “Mupuk meh enggau laki nuan lalu diau ba rumah mentua nuan. Belabuh ari diatu, sida nya meh apai indai nuan baka kami ke apai indai nuan. Awakka aku semina ninga rita ti badas pasal nuan sepemanjai umur aku.” Udah tembu bejaku, iya lalu ngemataka seduai mupuk. Udah nya Edna bejaku enggau Tobias, “Tobias anak aku, awakka Tuhan mai seduai selamat datai di rumah. Lalu awakka Iya ngasuh aku panjai umur lalu meda anak seduai. Tuhan nyadika saksi aku; aku nyerahka anak aku ngagai ibun nuan. Anang sekali-kali ngereja pengawa ti tau ngasuh ati iya tusah. Awakka seduai likun ba rantau jalai, Tobias. Belabuh ari diatu, Sarah nya meh bini nuan, lalu aku tu indai nuan. Awakka semua kitai betuah belimpah sepemanjai umur kitai.” Udah nya Edna nyium seduai iya, lalu ngemataka seduai iya mupuk.

¹³Lebuh Tobias ngejangka endur nya, iya gaga amat ati. Iya muji Tuhan serega enggau dunya, Raja bekuasa atas semua, laban pejalai iya mujur bendar, lalu iya besemaya deka bebasaka mentua iya sepemanjai umur sida.