Read Iban Tobit 11 Bible Online

Tobit 11 - Iban bible

Tobit 11

¹Lebuh Tobias angkat mulaika diri, iya gaga amat ati. Iya muji Tuhan serega enggau dunya, Raja semua dunya, laban pejalai iya mujur amat, lalu iya besemaya deka bebasaka Raguel enggau bini iya seumur seduai iya idup.[17] Lebuh sida datai semak nengeri Kaserin, enda jauh ari Nineweh,

²Rapael bejaku, “Tobias, nuan nemu gaya apai nuan lebuh kitai ninggalka iya.

³Kitai patut mansang dulu agi ari bini nuan, lalu ngemas rumah sebedau orang bukai datai.

⁴Anang enda ingat mai empedu ikan.” Nya alai, seduai iya mansang dulu. Ukoi Tobias belanda nitihka[18] seduai iya.

⁵Lebuh maya nya mega, Anna duduk ninjau ngagai jalai nganti anak iya.

⁶Iya tepedaka anak iya datai, lalu iya ngangauka Tobit, “Peda! Anak tua datai enggau pangan iya!”

⁷Sebedau seduai datai ba Tobit, Rapael madah ngagai Tobias, “Apai nuan deka meda baru.

⁸Engkah empedu ikan ba mata iya. Ubat nya deka ngasuh seraput mata iya ngereyut ngambika nuan ulih ngelitika iya, lalu apai nuan ulih meda baru.”

⁹Anna belanda ngagai anak iya lalu merap iya sereta bejaku, “Anak aku, diatu aku udah meda nuan agi idup, nya alai, aku tau parai enggau lantang!” Iya lalu nyabak enggau ati gaga.

¹⁰Tobit bediri, lalu kaki iya tesangkut ba penama tengah laman.

¹¹Tobias mansang ngagai iya, megai empedu ikan. Iya nyepu mata apai iya, lalu ngetanka iya. “Apai, anang irau,” ku iya.

¹² Udah nya Tobias ngunsut empedu ba mata apai iya, lalu belabuh ari tisi ngelitika seraput mata.

¹⁴Tobit lalu merap Tobias sereta nyabak gaga ati. Udah nya iya bejaku, “Anak, aku ulih meda nuan! Nuan meh penampak mata aku! Pujika Allah Taala. Puji Iya ketegal pemesai pengawa Iya. Puji semua melikat kudus Iya. Awakka Iya seruran merekat kitai. Pujika semua melikat iya selama-lama.

¹⁵Iya mai penyakit tu ba aku, tang diatu aku ulih meda anak aku Tobias!” Udah nya Tobias tama ke dalam rumah enggau ati gaga muji Tuhan enggau nyawa ti pemadu nyaris. Iya nusi ngagai apai iya pemujur iya. Iya ukai semina mai duit pulai, tang iya jadi enggau Sarah anak Raguel ke benung ba rantau jalai lalu deka datai enda lama da.

¹⁶Tobit gaga amat lalu muji Allah Taala lebuh iya nurun ngambat penatai menantu iya ba pintu besai nengeri nya. Lebuh orang Nineweh meda Tobit ulih bejalai kediri, enda diiring, sida alit ati.

¹⁷Tobit muji Allah Taala lalu madahka semua orang baka ni Allah Taala enggau pengasih Iya udah nyumanka mata iya. Lebuh Tobit betemu enggau Sarah, iya lalu ngelaluka menantu iya, “Lalu anak! Puji Allah Taala ketegal udah mai nuan ngagai kami. Awakka Allah Taala merekat apai nuan enggau seduai Tobias. Lalu meh ngagai rumah baru nuan. Awakka nuan seruran diberekat enggau pengerai enggau pengelantang. Tama meh anak!”

¹⁸Sehari nya hari ti pemadu gaga ke semua bansa Judah di Nineweh.

¹⁹Anak menyadi Tobit, Ahikar enggau Nadab mega bisi datai sama bela gaga enggau sida.