Read Iban Tobit 12 Bible Online

Tobit 12 - Iban bible

Tobit 12

¹Lebuh pengerami melah pinang tembu, Tobit ngangauka anak iya Tobias, lalu bejaku enggau iya, “Anak, anang enda ingat meri upah ngagai pangan ke enggau nuan bejalai, lalu anang enda ingat meri iya lebih ari upah.”

²Tobias nanya Tobit, “Apai, ba runding nuan, berapa patut diberi aku ke iya? Aku sanggup meri iya setengah ari semua utai ti dibai kami pulai.

³Iya mai aku pulai ke menua enggau selamat; iya ngambi duit ke aku ari Gabael; iya muru antu ari bini aku, lalu nyumanka mata nuan ti buta. Berapa penyampau ti lebih ari upah patut diberi aku ke iya?”

⁴Ku Tobit nyaut, “Beri ngagai iya setengah ari utai ti diambi iya ke nuan. Iya sigi patut bempu utai nya.”

⁵Udah nya Tobias ngangauka Rapael, lalu bejaku enggau iya, “Tu meh setengah ari utai ti diambi nuan ke aku. Nuan udah ngulihka iya; pulai meh ke rumah enggau selamat.

⁶Udah nya Rapael mai Tobit enggau Tobias ke tisi lalu bejaku, “Pujika Allah Taala, lalu tusi ngagai semua orang pasal utai ti badas ti udah dikereja Iya ngagai seduai ngambika sida mega deka ngemesaika Iya, lalu belagu muji Iya. Awakka semua orang nemu utai ti udah dikereja Allah Taala. Anang ngetu muji Iya.

⁷“Endang penemu ti manah nyimpan utai ti dipelalaika raja, tang utai ti dikereja Allah Taala endang patut dipadah di semua endur ngambika Iya dipuji sereta dikemesaika. Enti nuan ngereja utai ti badas, nadai penusah deka datai ba nuan.

⁸ “Sigi lebih manah agi besembiang enggau ati ti lurus, lalu ngelantangka Allah Taala ngena jalai nulung orang ke seranta ari ti kaya sereta enda lurus. Manah agi meri ngagai orang seranta ari ti nugungka mas.

⁹ Pementas ti baka nya deka ngelepaska nuan ari pemarai, lalu nuchi semua dosa nuan. Orang ke meri tulung ngagai orang seranta deka gayu guru,

¹⁰tang sida ke idup dalam dosa enggau penyai mai penusah ngagai diri empu.

¹¹“Aku udah madah ngagai nuan, utai ti dipelalaika raja patut disimpan, tang utai ti dikereja Allah Taala endang patut dipadahka ngagai semua orang. Diatu aku deka madah ngagai seduai semua utai ti bendar, lalu aku nadai utai dipelalaika agi.

¹² Tobit, lebuh seduai Sarah besembiang ngagai Tuhan, aku meh ke mai sembiang seduai ngagai Iya ti bemulia. Aku mega ngereja pengawa baka nya tiap kali nuan nguburka orang ti parai.

¹³Lebuh nuan angkat ari mija lalu enda makai laban deka nguburka bangkai nya, Allah Taala ngasuh aku nguji nuan.

¹⁴Tang Iya mega ngasuh aku ngeraika nuan, lalu nyelamatka menantu nuan Sarah ari penusah iya.

¹⁵ Aku tu Rapael, siku ari tujuh iku melikat ke bediri di mua Tuhan ti bemulia besedia deka gawa ke Iya.”

¹⁶Tobit enggau Tobias udu takut lalu rebah. Seduai nyau gegetar.

¹⁷Tang ku Rapael bejaku enggau seduai, “Anang takut, nadai utai ngawa. Puji meh Allah Taala belama.

¹⁸Iya ngasuh aku nulung nuan; aku ukai datai ngatika diri. Nya alai, belagu meh muji Allah Taala seumur-umur seduai idup.

¹⁹Lebuh seduai ngumbai diri meda aku makai, iya ke bendar aku nadai makai utai; tang baka ke makai.

²⁰Lebuh seduai agi di dunya tu, seduai mesti muji Tuhan ti Allah Taala lalu meri terima kasih ngagai Iya. Diatu aku mesti pulai ngagai Iya ti ngirumka aku. Tulis meh semua utai ti udah nyadi ba seduai.”

²¹Udah nya Rapael lalu lesap ke langit. Tobit seduai Tobias bediri tang seduai nadai meda iya agi.

²²Seduai belabuh nanyi lagu puji, meri terima kasih ketegal semua pengawa besai ti udah dikereja Allah Taala lebuh melikat Iya Rapael begulai enggau seduai.