Read Iban Tobit 13 Bible Online

Tobit 13 - Iban bible

Tobit 13

¹Udah nya Tobit besembiang, “Pujika Allah Taala ti meruan belama, pujika Iya ti merintah.

²Iya ngukum kitai, lalu udah nya ngayanka pengasih Iya ngagai kitai. Iya ngirumka kitai ngagai dunya pemati, udah nya Iya ngangkatka kitai ari pendam. Nadai orang ulih nyeliahka diri ari kuasa Iya.

³“Orang Israel, beri meh terima kasih ngagai Allah Taala ba tiap menua endur kita dibuai;

⁴ ba endur nya mega Iya nunjukka pemesai kuasa Iya. Awakka semua orang ke idup ninga jaku puji kita. Tuhan nya meh Allah Taala enggau Apai kitai belama.

⁵“Taja Iya ngukum kitai ketegal penyai kitai, Iya deka kasih, lalu mai kitai pulai ari mayuh bengkah alai kitai udah pambar pendiau.

⁶“Nguing meh ngagai Iya enggau pengabis ati enggau semengat kitai, diau taluk sereta ngasika Iya. Udah nya baru Iya malik lalu nulung nuan. Iya enggai ngelalaika diri agi. Ingatka pengawa ti dikereja Allah Taala ke kitai. Beri Iya terima kasih enggau pengabis ati kitai. Puji Tuhan ti pemadu lurus; kemesaika Raja ti meruan belama. “Taja aku dibuai ke menua bukai, aku deka meri terima kasih ngagai Tuhan, lalu deka becheritaka pengering Iya ngagai menua orang ke bedosa. ‘Lengkaka dosa kita, lalu kereja meh pengawa ti ngerinduka Allah Taala! Nyangka Iya deka meri nimet, sereta ngayanka pengasih.’

⁷“Aku muji Allah Taala aku sereta gaga ke pemesai kuasa Iya. Tiap bagi tubuh aku ngemesaika Raja Serega.

⁸“Awakka semua orang becheritaka pemesai kuasa Iya, lalu belagu muji Iya di Jerusalem.

⁹ “Jerusalem, nengeri kudus Allah Taala kitai, Iya deka ngukum nuan ketegal dosa bala kita, tang Iya deka ngayanka pengasih ngagai semua orang ke ngereja pengawa ti badas.

¹⁰Nya alai, beri terima kasih ngagai Tuhan laban Iya badas. Puji Raja ti meruan belama.[19] Rumah Sembiang Nuan deka digaga baru, lalu nembiak Nuan deka lantang baru. “Awakka Tuhan meri pengelantang ngagai semua orang ke kena buai. Awakka bala nuan ti merinsa diibun Iya belama-lama iya.

¹¹“Jerusalem, penampak nuan deka manchar terang atas semua dunya, lalu ari jauh mayuh bansa deka datai ngusung nuan. Bala sida deka datai lalu ngemesaika Tuhan Allah Taala nuan, sida deka mai pemeri ngagai Raja serega. Ba sebelah jalai, peturun nuan deka belagu puji enggau penuh pengaga, nama nuan ti nengeri dipilih Allah Taala deka meruan belama.

¹²Tulah meh semua orang ke nyakap nuan, ke ngerusak nuan, lalu mabak dinding nuan, ke ngerumpang lalu ngerubuh menara sereta nunu rumah nuan. Tang semua orang ke bebasaka nuan deka diberekat belama-lama iya.

¹³“Gaga meh Jerusalem ketegal pengelurus nembiak nuan; sida ke kena buai deka begumpul lalu muji Tuhan ti meruan selama iya.

¹⁴“Lantang meh semua orang ke rindu ke nuan lalu gaga meda nuan betuah belimpah. Sida ke ngulitka pemerinsa nuan diatu deka diau lantang; pengelantang nuan deka mai pengaga ngagai sida selama-lama iya.

¹⁵“Aku muji Tuhan, Raja besai.

¹⁶Jerusalem deka digaga baru lalu nyadi rumah Iya belama-lama. “Jerusalem, naka meh pengelantang aku lebuh uchu ambu aku ulih meda mulia nuan lalu meri terima kasih ngagai Raja Serega. “Pintu kota nuan deka digaga ari batu nilam enggau batu samerud, lalu semua kota nuan digaga ngena batu berega. Menara nuan deka digaga ari mas, lalu kubu sida digaga ari mas tulin.

¹⁷Jalai raya nuan deka dianchau ngena batu delima bechampur enggau batu intan ti berega.

¹⁸Lagu gaga ati deka didinga ari pintu kota nuan, lalu ari semua rumah nuan, orang deka manjung, ‘Puji Tuhan! Puji Allah Taala orang Israel!’ “Jerusalem, Allah Taala deka merekat bansa nuan lalu sida deka muji Nama Iya ti kudus belama iya.” Enggau jaku nya, Tobit ngujungka lagu puji iya.