Read Iban Tobit 2 Bible Online

Tobit 2 - Iban bible

Tobit 2

¹ Lebuh aku pulai ke rumah, aku begulai baru enggau bini aku Anna, sereta anak aku Tobias. Ba Gawai Udah Ngetau ti mega dikumbai Gawai Tujuh Minggu, aku duduk deka makai pemakai ti nyamai.

²Lebuh aku meda pemayuh pemakai di atas mija, aku bejaku enggau Tobias, “Anak, alai nuan ngiga bansa Judah ke diau ditu idup seranta. Sida ke amat-amat ngasika adat Allah Taala. Bai sida pulai enggau nuan, ngambika sida sama makai enggau kitai sebilik ba pengerami tu. Aku empai makai nganti pemulai nuan.”

³Nya alai, Tobias lalu nurun ngiga orang ti ku apai iya. Tang iya berumban nikal lalu ngangau enggau nyawa ti inggar, “Apai! Apai!” Ku aku nanya, “Nama utai?” Ku Tobias nyaut aku, “Siku ari bansa kitai baru udah dibunuh! Bisi orang nyekak iya lalu muai bangkai iya ba endur orang bedaja.”

⁴Aku lalu engkechit angkat ninggalka mija, enda negu pemakai. Aku ngambi bangkai nya lalu mai iya ngagai langkau mit, endur aku ninggalka iya datai ke lemai. Udah nya baru aku ulih numbakka iya.

⁵ Aku pulai ke rumah lalu mandi meresi diri. Aku makai lemai nya enggau ati ti pemadu tusah.

⁶ Aku tingatka jaku nabi Amos ngagai orang di Betel, “Pengerami kita deka berubah nyadi pengawa nyenggai orang mati, lalu nanyi gaga ati kita deka nyadi sabak sinu ati.” Aku lalu nyabak.

⁷Lebuh hari nyau malam, aku pansut numbakka bangkai lelaki nya.

⁸Orang ke berimbai pendiau enggau aku ngumbai aku gila. Ku sida nanya, “Kati nuan lalu enda jera? Suba nuan udah digiga ketegal numbakka bangkai orang lalu tentu dibunuh enti enda rari. Tang diatu agi ga nuan ngereja pengawa baka nya.”

⁹Malam nya aku mandi, ngambika meresi diri, lalu pansut ngagai tengah laman lalu tinduk ba tisi dinding pagar. Malam nya angat amat. Aku enda bebungkur apus.

¹⁰Bala burung lelayang inggap atas pagar betul-betul atas aku tang aku enda nemu. Tai sida ti agi angat labuh tama mata aku, ti ngasuh mata aku beseraput. Aku berubat enggau doktor, udah siku ngagai siku. Tang mata aku majak rabut taja diubat sida, lalu pengujung iya aku buta. Empat taun aku enda meda utai. Kaban belayan aku balat amat irau meda gaya aku. Ahikar nupi aku pengelama dua taun sebedau iya pindah ke menua Elam.

¹¹Udah Ahikar angkat, bini aku Anna mesti bekereja. Nya alai, iya ngereja pengawa betenun baka indu bukai.

¹²Orang ke endur iya gawa deka mayar gaji iya lebuh iya nyerahka kain ti udah ditenun iya. Nyadi sekali maya musin bungai, iya mutung kain ti udah tembu ditenun ari rakup lalu mai kain nya ngagai orang ke ngasuh iya. Sida mayar rega penuh lalu meri iya siku kambin.

¹³Lebuh Anna mai kambin nya datai di rumah, kambin nya belabuh ngebek. Aku lalu ngangau, “Ari ni penatai kambin nya? Kati nya dichuri nuan? Anjung iya pulai ngagai orang empu iya. Salah kitai makai utai ulih ngenchuri.”

¹⁴“Enda aku ngenchuri!” ku iya nyaut. “Kambin nya diberi ngagai aku kena nambahka gaji aku ngaga kain.” Tang aku enda arapka iya. Berasai mirah mua aku ketegal maluka pengawa ti udah dikereja iya. Aku ngasuh iya mulaika kambin nya ngagai orang ke ngempu iya, tang iya nyakal lalu bejaku enggau nyawa inggar, “Diatu baru aku nemu perangai nuan ti bendar! Ni pemanah nuan ngagai orang ngelama tu? Ni semua pengawa ti badas ti selalu dikereja nuan ngelama tu?”