Read Iban Tobit 3 Bible Online

Tobit 3 - Iban bible

Tobit 3

¹Aku kelalu malu sereta nemu tunga. Nya alai, aku lalu nyabak. Udah nya aku tetagang kediri badu nyabak, aku lalu besembiang:

²“Nuan endang rurus, O Tuhan! Semua pengawa dikereja Nuan enggau pengasih, lalu taluk dalam semua chara Nuan. Nuan meh akim dunya tu.[3]

³Aku minta Nuan ngibun aku enggau pengasih. Anang ngukum aku ketegal dosa aku, anang nyengkaum dosa ti enda temu aku. Aki ini aku ngelaban sereta enda ngasika[4] jaku Nuan. Tang anang ngukum aku ketegal dosa sida. Nuan ngelakka bala kami dirumpak, ditangkap lalu dibunuh. Nuan ngaga bala kami nyadika teladan, dikelese sereta dikemaluka ba semua bansa endur Nuan mambarka kami.

⁵Nuan suah ngakim aki ini aku ketegal dosa sida lalu ngukum aku ketegal dosa aku. Kami enda taluk sereta nulak jaku Nuan, nya alai ukum ti diterima kami endang seruran patut.

⁶“Diatu gaga aku nitihka peneka Nuan. Ambi meh nyawa aku lalu lepaska aku ari dunya tu; awakka tubuh aku pulai ke tanah. manah agi aku mati. Aku diperinsa ketegal pemalu ti enda patut nyadi ba aku, lalu aku ditating penusah. Tuhan, bejaku meh asuh badu semua penusah aku, bai meh aku ngagai endur pengidup ti meruan. Anang nulak sembiang aku. Deka agi aku mati ari ti idup merinsa ngasaika pemalu ti ngemalat nya.”

⁷Lebuh maya sehari nya mega di nengeri Ekbatana di Media, bisi utai nyadi ba Sarah, anak indu Raguel, iya dikemaluka ulih siku ari bala kuli indu apai iya.

⁸Sarah kala belaki tujuh kali, tang sitan, Asmodeus, munuh tiap iku laki iya sebedau seduai iya begulai melaki bini. Ku indu kuli nya bejaku enggau Sarah, “Nuan pemunuh laki nuan! Peda gamal nuan! Nuan udah belaki tujuh kali tang nadai siku sida nya idup lama ngambi ulih meri nuan anak lelaki.[5]

⁹Nama kebuah nuan malas ba kami? Lapa nuan enda parai enggau bala laki nuan? Aku arapka kami enda meda anak nuan!”

¹⁰Sarah balat amat tusah ati lalu nyabak. Iya lalu niki ke sadau mutus ati deka ngantung diri. Tang lebuh iya berunding baru, iya bejaku kediri, “Enggai aku munuh diri! Orang deka ngemaluka apai aku lalu bejaku, ‘Nuan semina bisi siku aja anak, anak indu ke amat dikarinduka nuan, tang iya ngantung diri ketegal kelalu tusah.’ Penusah ti bansa nya deka ngasuh apai aku ke udah buban, parai lalu aku betanggungjawab. Aku enda munuh diri. Aku semina minta Tuhan ngasuh aku parai. Nya baru aku badu agi ninga jaku pejai orang!”

¹¹Udah nya Sarah bediri ba mua jendela, ngangkatka jari lalu besembiang, “Allah Taala ke pengasih, ke patut dipuji kami, awakka nama Nuan dipebasa belama, awakka semua utai ti digaga Nuan, muji Nuan belama.

¹²“Tuhan, aku malik ngagai Nuan minta tulung.

¹³Bejaku meh lalu lepaska aku ari pengidup tu; nya baru aku badu agi ninga jaku pejai orang.

¹⁴Nuan nemu O Tuhan, aku agi dara bungas; aku bedau kala buya orang laki.

¹⁵Enda mega aku kala ngemalu diri empu tauka nama apai aku, sekumbang kami dibuai lalu idup di menua tu. Apai aku nadai anak bukai nampung iya, lalu nadai kaban belayan bukai[6] ke tau jadi enggau aku. Tujuh iku laki aku udah parai, nya alai nama guna aku agi idup? Tang enti nya ukai peneka Nuan ngambi nyawa aku, abis nadai pandang meh pengasih nuan ngagai aku. Anang ngasuh aku agi ninga jaku pejai orang!”[7]

¹⁶Benung Tobit enggau Sarah besembiang, Allah Taala ke di serega ningaka sembiang seduai iya,

¹⁷ lalu ngirumka melikat Rapael ngambika nulung seduai iya. Iya dikirum muai seraput mata Tobit ngambika iya ulih meda baru. Iya mega diasuh ngatur Sarah seduai Tobias anak Tobit jadi, laban Tobias nya petunggal Sarah empu ke tau jadi enggau iya. Rapael mega diasuh muru antu Asmodeus ari Sarah. Lebuh Tobit tama ke dalam rumah iya ari tengah laman, Sarah di rumah iya di Ekbatana nurun ari sadau.