Read Iban Tobit 4 Bible Online

Tobit 4 - Iban bible

Tobit 4

¹Sehari nya, Tobit teingatka duit ti ditinggalka iya ba Gabael di Rages di menua Media.

²Ku iya berunding, “Aku udah minta ari Allah Taala ngambika aku parai. Aku patut ngangauka anak aku Tobias, lalu madah ngagai iya pasal duit nya.”

³Nya alai, Tobit ngangauka Tobias lalu bejaku enggau iya, “Anak, lebuh aku parai, kuburka aku manah-manah. Maya aku nadai agi, bebasa meh ke indai nuan. Intu iya lebuh iya agi idup, lalu maya iya parai, tumbakka iya ngimbai pendam aku. Ingat meh, iya berantuka nyawa ngadaka nuan ke dunya. Nya alai, asuh ati iya senang lalu anang sekali-kali ngereja pengawa ti tau ngirauka ati iya.

⁵“Tiap hari sekumbang nuan idup, ingatka Tuhan ti Allah Taala kitai. Anang sekali-kali sengaja bepenyalah tauka ngelaban sebarang adat Iya. Seruran ngereja utai ti ngena, lalu anang bekaul enggau sebarang utai ti jai.

⁶Seruran lurus, lalu nuan deka mujur dalam semua pengawa ti dikereja nuan.

⁷ Beri enggau gerah jari ngagai sebarang orang ke amat taluk ngasika Allah Taala.[8] Enti nuan rangka enggau orang seranta, Allah Taala mega deka rangka enggau nuan.

⁸Beri nitihka pemisi diri. Mayuh agi utai ti dikemisi nuan, mayuh agi patut diberi nuan. Taja nuan bisi mimit aja reta, anang meh enda meri utai.

⁹Tu sebaka pemadas enggau duit ti disimpan. Nuan deka bulih upah lebuh maya kena penusah.

¹⁰Ngibun orang ke miskin, nya meh piring ti ngelantangka Allah Taala di serega. Kereja utai tu, lalu nuan deka dijaga ari pemetang dunya pemati.

¹²“Anak, bejaga meh ari indu sundal. Manah agi jadi enggau indu bansa kitai empu laban kitai tu peturun bala nabi. Anang jadi enggau indu ke ukai kaban belayan kitai. Ingatka sida Noah, Abraham, Isak enggau Jakop, semua sida nya jadi enggau kaban belayan diri empu magang. Allah Taala merekat sida enggau anak ngambika bala peturun sida ngempu menua Israel.

¹³Anak, taluk meh ke kaban belayan nuan empu. Anang tekelalu sumbung enggai jadi enggau siku ari sida. Penyumbung ti baka nya mai penusah enggau pengerusak ti balat baka pemuruk mai penyuntuk ti ngujungka keberuran.

¹⁴“Bayar meh gaji kuli tiap hari; anang sekali-kali ngetanka gaji sida sampai ke pagila. Bebasa meh ke Allah Taala ngena jalai tu, lalu Iya deka ngupah nuan. Seruran beperanggai badas.

¹⁵ Anang sekali-kali ngereja ngagai orang, utai ti dikenggai nuan kereja orang ba nuan. “Anang tekelalu udu ngirup wain enggaika mabuk lalu riri ngirup.

¹⁶“Beri pemakai ngagai orang ke lapar enggau gari ngagai orang ke begunaka iya. Enti nuan kaya, beri meh enggau gerah jari sereta enggau ati gaga!

¹⁷ “Lebuh siku ari bala ke ngasika Allah Taala parai, sediaka pemakai ke sida sebilik,[9] tang anang sekali-kali ngereja pengawa tu lebuh orang jai parai.

¹⁸“Pendingka ajar orang ke bepenemu, anang enda bedulika ajar ti badas.

¹⁹“Ambi semua peluang ti bisi kena muji Tuhan ti Allah Taala Nuan. Pinta ari Iya ngambi nuan betuah belimpah dalam semua pengawa ti dikereja nuan. Iya enda meri penemu Iya ngagai bansa bukai. Iya meh pun semua utai ti badas tang Iya mega ulih ngerusak nuan lalu mai ngagai pemati, enti Iya deka. “Ingatka semua ajar aku. Seminit anang meh enda ingatka iya.

²⁰“Tobias, aku dekaka nuan nemu, aku bisi ninggalka duit ti mayuh ba anak Gabrias di Rages ba menua Media.

²¹ Kitai diatu miskin, tang anang irau. Enti nuan mendingka Allah Taala lalu nyeliahka dosa, Iya tentu lantang ati enggau nuan lalu ngaga nuan kaya raja.”