Read Iban Tobit 5 Bible Online

Tobit 5 - Iban bible

Tobit 5

¹Udah nya Tobias nyaut apai iya, “Aku deka ngereja semua utai ti udah dipadah nuan ngagai aku.

²Tang baka ni jalai aku ngambi duit nya pulai ari Gabael? Kami duai enda kala betemu enggau pangan diri. Baka ni aku madahka diri ngagai iya ngambika iya arapka aku, lalu meri duit nya ngagai aku? Lalu nambahka nya, aku enda nemu ni jalai ngagai Media.”

³Tobit nyaut, “Gabael enggau aku sama bisi nyain surat. Surat nya dibagi aku dua, setengah enggi iya, setengah enggi aku. Aku ngengkah enggi iya begulai enggau duit. Utai nya nyadi dua puluh taun suba! Diatu nuan ngiga orang ke tau dikarap bejalai enggau nuan ke Media lalu pulai baru. Kitai deka mayar iya lebuh nuan pulai ila. Tang nuan enda tau enda ngambi duit nya ti ditinggal aku ba Gabael.”

⁴ Udah nya Tobias bejalai ngiga orang ke nemu jalai enggau iya ke Media. Empai lama udah iya ngejangka rumah, iya lalu betemu enggau Rapael. Tang Tobias enda ngelala Rapael nya melikat Allah Taala,

⁵nya alai Tobias lalu nanyaka asal penatai iya. Ku Rapael nyaut, “Aku tu orang Israel, siku ari kaban belayan nuan. Aku datai ngagai Nineweh kitu deka ngiga kereja.” Kati nuan nemu jalai ke Media?” ku Tobias nanya.

⁶“Nemu aku,” ku Rapael nyaut. “Aku suah udah kin. Aku nemu amat semua jalai kin. Aku suah diau ba kaban kami Gabael ke diau ba nengeri Rages.[10] Enda kurang dua hari bejalai kin ari Ekbatana ti indu nengeri, laban Rages nya ba endur ti bebukit.”

⁷Udah nya Tobias bejaku enggau Rapael, “Nuan nganti ditu dulu. Aku tama madahka apai aku. Aku minta nuan enggau aku bejalai, lalu ngaji nuan.”

⁸“Au meh, tang anang kelalu lama.” ku Rapael nyaut.

⁹Tobias tama ke dalam lalu madahka apai iya, “Aku bisi tetemuka orang Israel ke deka enggau aku bejalai.” “Asuh iya tama,” ku Tobit nyaut. “Aku deka nemu tiris pantis enggau raban bansa iya. Aku mega deka nemu sekalika iya orang ke tau dikarap nyadika pangan nuan bejalai.” Udah nya Tobias lalu pansut ngangauka Rapael, “Apai aku deka betemu enggau nuan.” Lebuh Rapael tama, Tobit lalu nabi iya. Rapael malas tabi Tobit, ku iya, “Aku arapka nuan gerai nyamai.” Tang ku Tobit nyaut, “Kati ku aku tu gerai nyamai? Aku tu buta enda meda baka ke parai, enda ulih meda penampak. Manah agi aku parai! Aku ulih ninga orang bejaku tang aku enda ulih meda sida.” “Anang tusah! Anang irau! Enda lama da Allah Taala deka nyumanka nuan,” ku Rapael madahka Tobit. Lalu ku Tobit, “Anak aku Tobias deka ke Media. “Kati ulih nuan enggau lalu nunjukka iya jalai kin? Ila aku ngaji nuan.” Ku Rapael nyaut, “Aku tetap ulih enggau iya. Aku udah suah amat kin lalu aku nemu semua jalai, ba endur ti bebukit(...)

¹⁰Tobit nanya iya baru, “Padahka, unggal, sapa tiris pantis enggau raban bansa nuan?”

¹¹Tang Rapael nyaut, “Nama kebuah nuan enggai enda nemu?” “Padahka aku utai ti bendar,” ku Tobit. “Sapa nama nuan lalu sapa nuan?”

¹²Disaut Rapael, “Nama aku Asarias, lalu aku anak siku ari kaban belayan nuan benama Ananias ti tuai.”

¹³Udah nya Tobit bejaku enggau iya, “Selamat datai ngagai bilik kitai. Allah Taala merekat nuan anak. Anang enda nyamai ati laban aku deka nemu utai ti amat pasal nuan enggau kita sebilik. Enda mukai-mukai nuan tu datai ari bilik ti menyana, lalu mega kaban belayan aku. Aku nemu Ananias enggau Natan, seduai nya, anak lelaki Semaiah. Sida semampai talukka pengarap. Kami kala begulai bejalai ke Jerusalem lalu besembiang dia. Kaban belayan nuan orang ke badas lalu nuan datai ari tiris ke badas. Arapka nadai utai ngawa seduai di rantau jalai.”

¹⁴Tobit bejaku baru, “Aku deka meri nuan gaji hari sebaka enggau orang bukai nyengkaum belanja seduai.”

¹⁵Begulai manah meh enggau Tobias, lalu aku deka meri nuan upah ti lebih nambahka gaji nuan.”

¹⁶ “Aku sigi enggau iya,” ku Rapael. “Anang irau, kami tetap datai din lalu pulai enggau selamat. Nadai utai ngachau jalai kin.” Ku Tobit nyaut, “Allah Taala nyempulang seduai.” Udah nya iya ngangauka Tobias lalu bejaku enggau iya, “Anak sediaka semua utai ti diguna nuan ngambika pejalai seduai mujur. Awakka Allah Taala enggau melikat iya nyaga ngemataka seduai lalu mai seduai pulai kitu ngagai aku enggau selamat.” Sebedau seduai iya angkat ke Media, Tobias nyium apai enggau indai iya, meri selamat tinggal. Tobit bejaku baru, “Arapka seduai nadai utai ngawa ba rantau jalai!”

¹⁷Udah nya, indai Tobias lalu nyabak. “Kati ku nuan ngasuh anak aku bejalai baka nya?” ku iya mut-mut. “Semina iya aja ke ulih ngibun tua. Sapa ngibun tua ila?

¹⁸Kati duit nya beguna amat ba nuan alai nuan kempang berambunka nyawa anak nuan ngambi duit nya pulai?

¹⁹Nama kitai enda puas enggau pengidup ti diberi Tuhan ke kitai?”

²⁰“Besabar,” ku Tobit bejaku enggau iya. “Iya ulih datai din lalu pulai baru enggau selamat. Mata nuan empu deka meda iya pulai kitu enggau selamat, nadai utai ngawa.

²¹Badu irauka seduai. Melikat ke badas nyempulang Tobias. Pejalai iya deka mujur lalu iya deka pulai gerai nyamai.” Maya nya, ati Anna enda tusah agi lalu iya badu nyabak.