Read Iban Tobit 6 Bible Online

Tobit 6 - Iban bible

Tobit 6

¹Nyadi Tobias enggau melikat nya mupuk bejalai ke Media mai uduk Tobias enggau seduai iya. Seduai iya bejalai sehari-hari datai ke lemai lalu belangkau ba tebing Sungai Tigris.

²Tobias nurun ke sungai masu kaki iya, lalu tekala nya, siku ikan ti besai engkechit pansut ari ai lalu nguji deka negam kaki iya sepiak. Tobias nyerauh,

³melikat lalu meradakka nyawa iya, “Tangkap ikan nya! Anang ngelepaska iya.” Tobias nangkap ikan nya lalu ngirit iya ke pantai.

⁴“Peruti ikan nya,” ku melikat, “lalu ambi empedu, ati enggau atau iya. Simpan nuan utai nya ke ubat, tang buai perut iya.”

⁵Tobias ngereja nitihka padah melikat. Udah nya iya manduk ikan nya, sekeda diempa, lalu sekeda dibudu dibai bejalai. Seduai majak bejalai lalu datai di semak Media.

⁶Udah nya Tobias nanya, “Asarias, nama penyakit ulih disumanka empedu, ati enggau atau ikan tu?”

⁷Melikat nyaut, “Ati enggau atau tau ditunu kena muru antu tauka roh jai ti ngasuh orang merinsa. Serang antu deka ngetu tekala nya, lalu orang nya deka badu dikachau.

⁸Nuan tau ngena empedu nya ngubat mata orang ti dibalut seraput burak. Unsut iya ba mata, lalu sepu seraput nya, lalu iya ulih meda baru.

⁹Lebuh seduai iya datai di Media, lalu nyau mansang semak nengeri Ekbatana,

¹⁰Rapael bejaku, “Tobias pangan aku.” “Nama utai?” ku Tobias nanya. Rapael nampung jaku iya, “Malam tu tua diau ba rumah kaban nuan Raguel. Iya bisi anak indu siku benama Sarah.

¹¹Laban iya kaban belayan nuan, nuan tau jadi enggau iya. Nuan mega bisi kuasa bempu semua reta apai iya.

¹²Iya indu ke mereti, berani sereta bajik amat; lalu apai iya orang ke manah. Malam tu aku deka berandau enggau apai iya pasal deka ngasuh nuan jadi enggau iya, lalu iya deka ngemendarka anak iya jadi enggau nuan. Udah nya, lebuh tua mulaika diri ari nengeri Rages, kitai deka rami melah pinang. Raguel enda ulih nagang nuan jadi enggau iya lalu iya enda ulih ngambi lelaki bukai ke laki iya. Enti iya nagang, iya patut diukum bunuh nitihka Adat Moses. Iya nemu semina nuan aja tau jadi enggau anak indu iya, lalu bempu reta iya, nya alai, titihka jaku aku. Aku enggau Raguel deka berandauka utai tu malam tu, lalu ngatur seduai Sarah betunang. Lebuh tua pulai ari nengeri Rages, tua deka mai iya pulai ke menua enggau tua.”

¹³Udah nya Tobias bejaku enggau Rapael, “Asarias, pangan aku, aku bisi ninga pasal semua laki Sarah tujuh iku ke dulu, lalu baka ni siku-siku sida nya parai ba malam melah pinang, sebedau tiap iku sida nya begulai tinduk enggau iya.

¹⁴Nitihka cherita didinga aku, bisi siku antu munuh sida. Antu nya enda ngachau Sarah. Tang iya munuh tiap iku lelaki ti nguji semak Sarah. Aku takut ke antu nya. Aku anak tunggal, nya alai enti aku parai, penusah nya sigi ngasuh apai indai aku parai. Sida nadai anak lelaki agi nguburka sida.”

¹⁵Melikat nyaut iya, “Kati nuan enda ingatka padah apai nuan? Iya ngasuh nuan jadi enggau indu ari bansa nuan empu. Nya alai, dinga amat-amat utai ti disebut aku. Anang irau ke antu nya. Jadi meh enggau Sarah! Aku nemu malam tu Raguel deka ngasuh Sarah jadi enggau nuan.

¹⁶Lebuh nuan tama ke dalam bilik peninduk, bai ati enggau atau ikan lalu engkah ba menyan ti ditunu,

¹⁷ngambika bau iya nepuk semua bilik nya. Lebuh antu ensium bau iya, antu nya deka rari, lalu badu semak Sarah. Tang sebedau seduai beleman, seduai mesti sama bela angkat lalu besembiang ngagai Tuhan ti di serega, minta Iya kasihka seduai lalu nyaga seduai. Anang takut. Sarah nya endang ditagaka enggi nuan, kenyau ari pun dunya. Nuan deka ngelepaska iya ari antu, lalu iya deka enggau nuan ngagai bilik nuan. Nuan enggau Sarah deka bisi mayuh anak ti dikarinduka nuan amat. Nya alai, anang irau!” Tobias berati amat-amat ke utai ti dipadahka Rapael. Iya nemu Sarah endang kaban belayan ari sepiak apai iya. Iya lalu berengkah bisi pengerindu ke Sarah lalu ngadang diri jadi enggau iya.