Read Iban Tobit 7 Bible Online

Tobit 7 - Iban bible

Tobit 7

¹Lebuh Tobias enggau melikat tama ke nengeri Ekbatana, Tobias bejaku, “Asarias, bai aku betemu enggau Raguel enggau naka penyampat nuan.” Melikat nya lalu mai iya ngagai rumah Raguel, lalu seduai tetemuka iya duduk ba penama tengah laman rumah. Rapael enggau Tobias nabi iya dulu; udah nya iya nyaut, “Lalu, tama meh unggal. Seduai endang diterima ba rumah aku.”

²Raguel mai seduai tama ke rumah lalu bejaku enggau bini iya Edna, “Kati peda nuan gamal orang bujang tu enda baka gamal petunggal aku Tobit?”

³Edna nanya seduai, “Ari ni penatai seduai?” “Kami duai tu orang Israel ari peturun Naptali,” Tobias enggau Rapael nyaut, “tang kami diatu diau di nengeri Nineweh dalam Asiria endur kami kena buai.”

⁴Edna nanya, “Kati seduai nemu petunggal kami Tobit?” “Nemu kami iya,” ku seduai nyaut. “Nama rita iya?” Edna nanya.

⁵“Iya agi idup sereta gerai,” ku seduai nyaut. Udah nya ku Tobias, “Tobit nya apai aku.”

⁶Ninga nya, Raguel angkat. Ai mata iya labuh ketegal gaga ati, lalu iya nyium Tobias.

⁷ Udah nya ku iya, “Allah Taala merekat nuan, anak aku. Apai nuan endang orang ke manah sereta bepangkat. Kasih amat meh orang ke lurus sereta mentas baka iya nyau enda meda!” Iya lalu merap Tobias lalu nyabak ba bau iya.

⁸Bini iya Edna enggau anak indu iya Sarah bela nyabakka Tobit. Raguel ngelaluka penatai Tobias enggau Rapael enggau ati gaga lalu munuh siku ari bedus iya. Udah seduai iya mandi lalu deka duduk makai, dia Tobias bejaku enggau Rapael, “Asarias, kemaya nuan nanya Raguel ngambika iya ngasuh aku jadi enggau Sarah?”

⁹Tang Raguel ninga, lalu bejaku enggau Tobias,

¹⁰“Makai enggau ngirup dulu. Ngelantangka diri dulu lemai tu. Nuan patut jadi enggau Sarah, lalu aku enda ngasuh orang bukai jadi enggau iya laban nuan kaban belayan aku ke pengabis semak. Tang aku mesti madah utai ti amat ngagai nuan, anak.

¹¹Aku udah ngasuh iya jadi enggau tujuh iku orang laki. Semua sida nya sekaban. Tiap iku sida mati lebuh tama bilik peninduk, malam belah pinang. Tang diatu anak, makai ngirup dulu. Tuhan deka ngibun seduai.” Tobias nyaut, “Aku enggai makai tauka ngirup enti nuan empai meri jaku pemutus.”

¹²Raguel setuju. “Aku sigi ngasuh,” ku iya. “Aku nyerah iya ngagai nuan nitihka Adat Moses. Allah Taala di serega udah ngatur seduai jadi, nya alai, ambi meh iya ke bini nuan. Belabuh ari diatu, seduai jadi melaki-bini. Sarah nya enggi nuan berengkah ari sehari tu datai ke selama-lama iya. Awakka Tuhan menua serega ngibun seduai enggau likun malam tu. Awakka Iya kasih sereta badas enggau nuan.”

¹³Udah nya Raguel ngangauka anak iya. Lebuh Sarah tama Raguel lalu megai jari iya sereta nyerahka iya ngagai Tobias, “Ambi iya ke bini nuan nitihka ajar dalam Adat Moses. Ibun manah sereta bai iya ngagai rumah apai nuan. Awakka Allah Taala di serega meri seduai pengidup ti senang lantang begulai enggau pangan.”

¹⁴Raguel ngasuh bini iya ngambi keretas kusung endur iya nuliska sempekat sabung jadi. Edna mai keretas nya ngagai iya, lalu Raguel nulis sempekat ti madahka diri nyerahka Sarah ngagai Tobias nitihka ajar dalam Adat Moses.

¹⁵Tembu pengawa nya, sida lalu belabuh makai.

¹⁶Raguel ngangauka bini iya, “Kemas bilik siti lalu bai Sarah kia.”

¹⁷Edna ngemas katil nitihka padah Raguel. Udah nya iya mai Sarah ngagai bilik nya, lalu Sarah belabuh nyabak.[11] Tang Edna ngendas ai mata iya sereta bejaku,

¹⁸“Anang irau, Sarah. Aku arap amat ke Tuhan deka ngasuh nuan lantang sekali tu. Nya alai, gaga meh anak.” Udah nya Edna ninggalka bilik Sarah.