Read Iban Tobit 8 Bible Online

Tobit 8 - Iban bible

Tobit 8

¹Udah sida tembu makai, lalu datai ba maya endur tinduk, apai indai Sarah nguluka Tobias ngagai bilik peninduk.

²Tobias ingatka ajar Rapael, nya alai iya lalu ngambi empedu enggau ati ikan ti disimpan iya dalam kambut. Udah nya, iya ngengkahka utai nya ba bara menyan.

³ Bau nya muru antu ari Tobias enggau Sarah. Antu nya rari ke menua Ejip.[12] Rapael ngagai antu nya lalu nangkap iya din. Tekala nya, antu nya lalu ditanchang iya jari enggau kaki.

⁴Lebuh Tobias seduai Sarah kediri dalam bilik betutup pintu, Tobias angkat ari katil lalu bejaku enggau bini iya, “Angkat, wai. Aram tua besembiang ngagai Tuhan ngambi Iya nyaga tua.

⁵ Sarah lalu angkat ngambika seduai iya ulih besembiang begulai, minta jaga Allah Taala. Udah nya, Tobias besembiang: “Allah Taala aki ini kami, Nuan patut dipuji. Awakka nama Nuan dikemesaika belama-lama iya ulih semua utai ti digaga Nuan, di serega enggau di dunya.

⁶Nuan ngaga Adam lalu meri Eva ke bini iya nyadika penulung enggau penyukung iya. Seduai nyadika apai indai semua mensia. Ku Nuan, ‘Enda manah enti mensia diau kediri. Aku deka ngaga siku orang ke patut ke penulung iya.’

⁷Tuhan, aku udah milih Sarah laban nya endang betul, ukai ketegal aku ingin ke tubuh iya. Kasih meh ke kami lalu awakka kami duai begulai sampai tuai.”

⁸Udah nya seduai sertai nyebut, “Amin.”

⁹Udah nya seduai iya lalu tinduk. Nyau jauh malam nya, Raguel ngangauka bala kuli iya, lalu sida sama pansut numbak lubang kubur,

¹⁰laban ba runding Raguel, “Tobias mega dipelabaka parai lalu orang deka ketawa lalu ngeleseka kitai.”

¹¹Lebuh sida udah tembu numbak lubang kubur, Raguel pulai ke rumah lalu bejaku enggau bini iya,

¹²“Asuh siku ari kuli indu ngabas sekali Tobias agi idup. Enti iya parai, kitai deka nguburka iya sebedau orang nemu.”

¹³Udah nya sida lalu ngasuh siku kuli indu mai lampu lalu ngabas sekalika Tobias agi idup. Lebuh iya muka pintu, iya meda seduai benung jenak tinduk.

¹⁴Udah nya iya pulai lalu madah ngagai Raguel enggau Edna, Tobias agi idup lalu nadai apa nama.

¹⁵Udah nya, Raguel[13] muji Allah Taala di serega: “Nuan patut dipuji kami, O Allah Taala. Awakka nembiak Nuan muji Nuan belama. Awakka sida muji Nuan enggau ati ti tuchi.

¹⁶Aku muji Nuan laban Nuan udah ngasuh aku gaga; Nuan udah kasihka kami, lalu utai ti pengambis diketakutka aku enda nyadi.

¹⁷Nuan sigi aruh dipuji kami, O Tuhan. Nuan udah kasihka seduai melaki bini tu ke agi biak, anak tunggal apai indai sida. Nya alai diatu ibun sereta kasihka seduai. Asuh seduai iya idup lantang senang dalam pengerindu.”

¹⁸Udah nya Raguel ngasuh bala kuli iya ngalitka lubang kubur sebedau kerebak tawas.

¹⁹Raguel ngasuh bini iya ngaga roti kena ngintu gawai besai. Udah nya, iya ngagai kandang jelu, lalu mai dua iku chapi enggau empat iku bedus lelaki ti diasuh iya bunuh bala kuli dikena nyediaka gawai melah pinang.

²⁰ Iya ngangauka Tobias lalu besemaya[14] enda ngasuh iya pulai dalam kandang dua minggu. “Diau ditu, lalu kitai deka makai ngirup begulai,” ku iya. “Nya deka ngelantangka ati anak aku laban iya udah ditinggang penusah ti balat amat.

²¹Udah nya, baru nuan tau mai setengah reta ti dikemisi aku lalu pulai ngagai apai nuan enggau selamat. Nyadi setengah reta aku ti bukai tau diempu nuan udah kami duai Edna parai. Anang kakang ati pasal pengerindu kami ke nuan; belabuh ari diatu, nuan endang baka anak kami, baka kami enggau Sarah. Anang irau nuan anak pasal utai tu, nuan sigi anak kami.”