Read Iban Tobit 9 Bible Online

Tobit 9 - Iban bible

Tobit 9

¹Udah nya, Tobias ngangauka Rapael lalu bejaku enggau iya,

²“Asarias, bai empat iku kuli enggau nuan enggau dua iku unta lalu bejalai ngagai rumah Gabael ba nengeri Rages. Suaka iya surat ti udah disain ngambika iya meri nuan duit nya. Udah nya, bai iya pulai ngambika iya enggau berami melah pinang.

³Nuan nemu apai aku ngitung hari nganti penatai aku di rumah, lalu iya deka tusah ati enti sehari pen aku laun. Nuan nemu mega, baka ni ku Raguel keran amat ngetanka aku, lalu aku enggai ngasaka iya.”

⁵Nya alai, Rapael enggau empat iku kuli iya mansang ke Rages di Media. Sida diau ba rumah Gabael. Rapael nyuaka surat ti udah disain lalu nusi pasal Tobias anak Tobit ke baru udah bebini. Iya madahka Gabael udah dikangau datai ngagai pengerami melah pinang. Tekala nya Gabael ngitung kambut duit ti agi ditanchang, lalu diengkah sida atas belakang unta.[15]

⁶Tumu pagi siti, sida angkat ngagai pengerami melah pinang. Lebuh Rapael enggau Gabael datai di rumah Raguel, sida meda Tobias benung makai lemai. Tobias lalu angkat ngelaluka penatai Gabael. Enggau ai mata Gabael malas jaku tabi nya lalu bejaku, “Nuan baka apai nuan ti lurus sereta mentas. Awakka Tuhan di serega merekat seduai melaki bini enggau mentua nuan. Puji Allah Taala, Iya udah ngasuh aku agi idup betemu enggau petunggal aku Tobias, ke nyau deka sebaka gamal enggau apai iya.”