Read Iban Judit 1 Bible Online

Judit 1 - Iban bible

Judit 1

¹Rambau Raja Nebukadnesar merintah menua Asiria ari indu nengeri Nineweh, Raja Arpaksat merintah menua Media ari indu nengeri Ekbatana.

²Ngelingi Ekbatana Raja Arpaksat ngaga dinding 35 meter peninggi, lalu penebal iya 25 meter digaga ari lampang batu ti dipat, pemesai iya 1.5 meter lalu pemanjai iya 3 meter.

³Ba tiap pintu penama iya ngaga siti rumah peninjau peninggi 50 meter, lalu geladak iya 30 meter.

⁴Tiap pintu penama 35 meter peninggi, lalu buka iya 20 meter ngambika ulih ditengah bala soldadu raja nyengkaum bala soldadu ti bebaris mansa nya.

⁵Dalam taun ti keduabelas Raja Nebukadnesar nyadi raja, iya beperang ngelaban Raja Arpaksat ba emperan besai ngelingi nengeri Rages.

⁶Mayuh bansa bukai nyaup Raja Arpaksat, iya nya, semua sida ke diau ba menua ke bebukit, sida ke diau ba pemanjai Sungai Tigris, Sungai Eupratis, Sungai Hidaspes enggau sida ke diau ba emperan diperintah Raja Ariok ari Elam. Mayuh bansa bukai begulai enggau soldadu orang Heleud.

⁷Udah nya Raja Nebukanesar ari Asiria ngirumka pesan ngagai orang Persia enggau bansa bukai ke diau di barat, di menua Sisilia, Damaskus, Lebanon, Antilebanon, sida ke diau di tebing tasik,

⁸enggau ba kandang menua di Karmel, Gilead, utara Galili enggau Lebak Jesril.

⁹Pesan nya mega ditujuka ngagai orang ke diau di Samaria enggau nengeri ti ngelingi iya, enggau nuju sida ti di barat Sungai Jordan sampaika ngagai nengeri Jerusalem, Betani, Chelos, Kades enggau pelilih menua Gosen. Pesan nya mega dibai ngagai mayuh nengeri di Ejip baka Tapanes, Rameses, Tanis enggau Mempis enggau endur ba ulu Sungai Nile sampai ngagai entara menua Etiopia.

¹¹Tang bala ke diau ba pelilih menua nya enda pedulika peminta Raja Nebukadnesar, lalu enggai enggau iya beperang laban sida enda takutka raja. Dalam penemu sida, raja nya nadai peluang menang. Orang ke dikirumka raja dikeleseka, lalu pulai puang enggau ati ti malu.

¹²Nya alai Raja Nebukadnesar ringat amat lalu besumpah ngena kuasa iya deka malas semua sida nya. Iya besumpah deka munuh semua orang ke diau di Sisilia, Damaskus, Siria, Moap, Amon, Judah enggau Ejip--semua orang ari Tasik Tengah ngagai Teluk Persia.

¹³Ba taun ti ketujuh belas Raja Nebukadnesar megai perintah, iya nguluka soldadu nyerang Raja Arpaksat. Semua soldadu Raja Arpaksat nyengkaum sida ke ngena kuda enggau sida ke ngena kereta kuda alah magang.

¹⁴Udah nya Raja Nebukadnesar nguasa semua nengeri dalam menua Media, lalu nyerang nengeri Ekbatana. Semua menara nengeri dialahka, semua pasar dirumpak, lalu pemanah gaya nengeri dirusak.

¹⁵Raja Arpaksat ditangkap lalu dibunuh di bukit ngelingi Rages. Udah Arpaksat dibunuh,

¹⁶Nebukadnesar enggau bala soldadu pulai ke Nineweh mai perapasan ti diulih sida ngayau. Dia sida belelak lalu begawai pengelama empat bulan.