Read Iban Judit 10 Bible Online

Judit 10 - Iban bible

Judit 10

¹Lebuh Judit udah badu besembiang ngagai Allah Taala orang Israel,

²iya bediri lalu ngangauka ulun indu iya. Udah nya iya lalu ngagai rumah ke selalu endur iya lebuh Hari Sabat enggau hari besai.

³Iya muka baju guni enggau baju ti dikena iya balu. Iya mandi lalu ngena minyak wangi ti berega. Iya besugu lalu nanchang buk iya ngena riben. Iya begari ngena gari ti manah ti selalu dikena iya maya bisi pengerami besai lebuh laki iya Manasi agi idup suba.

⁴Iya masukka kasut enggau ngepan mas; tinchin, antin, marik, tumpak enggau kerunchung. Iya nganta ngambika bajik dipeda tiap lelaki ke dipansa iya.

⁵Judit meri ulun iya ti indu kambut kulit kena mai wain anggur enggau siti kebuk minyak ngambika dibinching iya. Iya ngisi siti kambut enggau lingkau girau, kuih ti digaga ari buah ti rangkai, enggau sekeda tuku roti ti digaga nitihka adat pemakai bansa Judah. Iya mungkus semua pemakai nya enggau bejimat lalu disua ngagai ulun iya.

⁶Udah nya seduai ngejangka rumah lalu tama ngagai pintu penama Betulia endur seduai tetemuka Usiah enggau pemesai nengeri nya, Kabris seduai Karmis ke benung jaga.

⁷Lebuh sida lelaki nya meda Judit udah beganti gari lalu nganta, sida tekenyit meda pemajik iya. Ku sida bejaku enggau iya,

⁸“Awakka Allah Taala aki ini kitai merekat nuan ngambika pengawa ti deka dikereja nuan mujur lalu meri mulia ngagai Jerusalem enggau pemenang ngagai orang Israel.” Judit besembiang

⁹lalu bejaku, “Asuh sida muka pintu ke kami duai. Aku diatu benung mansang deka ngereja semua pengawa ti udah dikerandauka kitai.” Udah nya, sida ngasuh orang biak muka pintu ke seduai.

¹⁰Judit enggau ulun iya ngejangka nengeri nya. Sida ke lelaki ngemataka seduai bejalai nurun bukit, nuju ngagai lebak, nyentukka seduai nadai dipeda agi.

¹¹Benung seduai bejalai nengah lebak, soldadu Asiria betemu enggau seduai.

¹²Sida nangkap Judit lalu nanya iya, “Nama bansa nuan? Ari ni penatai nuan, lalu kini ke tunga pejalai nuan?” Saut iya, “Aku tu bansa Hebrew, tang aku lari ari bansa aku laban Allah Taala deka ngasuh kita ngerusak sida.

¹³Aku benung ba rantau jalai deka betemu enggau Holopernes, kepala soldadu, deka madahka iya berita ti betul. Aku ulih nunjuk ngagai iya baka ni niki ngagai bukit lalu ngalahka menua nya enggau nadai siku kita bebadi.

¹⁴Bala sida ke dia tegenung meda pemajik iya. Sida ningaka cherita iya, lalu bejaku,

¹⁵“Nuan udah ngidupka seput diri datai kitu deka betemu enggau kepala soldadu kami. Sekeda bala kami deka mai nuan ngagai kem Holofernas, lalu nuan deka betemu enggau iya.

¹⁶Anang takutka iya. Tusi aja ngagai iya utai ti udah dipadah nuan ngagai kami, lalu iya deka manah enggau nuan.”

¹⁷Sida ngasuh seratus iku bala soldadu nyaga Judit enggau ulun iya ke kem Holopernes.

¹⁸Orang ba kem Asiria begau ninga berita penatai Judit. Berita nya ngelekai ari kem siti ngagai kem siti. Lebuh Judit bediri di luar kem Holopernes nganti diri dibai betemu enggau iya, mayuh soldadu Asiria datai lalu bediri ngelingi Judit.

¹⁹Sida alit ati meda pemajik iya lalu berunding baka ni gamal bansa Israel. Ku sida, “Sapa tau ngeleseka bansa ti ngembuan indu ti ngemajik nya?” Sida betanya ngagai pangan diri. “Badas kitai munuh semua pungka lelaki sida. Enti enda pia, bansa Judah deka nguasa serata dunya.

²⁰Udah nya orang ke nyaga Holopernes enggau orang ke gawa ke iya pansut lalu mai Judit ke dalam kem.

²¹Holopernes benung belelak ba katil iya ngena kibung ti ditenun ngena ubung kelabu enggau benang mas sereta dilagu ngena batu perenching biru enggau batu ti berega bukai.

²²Lebuh sida madahka iya Judit udah datai, Holopernes pansut ngagai mua kem iya entudi bala ulun ke mai kelita pirak.

²³Lebuh Judit datai semak Holopernes enggau bala kuli iya, sida tegenung meda pemajik iya. Iya nyungkurka diri di mua Holopernes tang bala kuli Holopernes ngangkatka iya.