Read Iban Judit 11 Bible Online

Judit 11 - Iban bible

Judit 11

¹Holopernes bejaku enggau Judit, “Anang irau lalu anang takut. Aku enda kala ngemediska sebarang orang ti deka betuaika Nebukadnesar ti raja semua dunya.

²Enti bala kita ke di bukit enda ngeleseka aku, aku enda nyerang sida. Penusah tu digaga sida empu.

³Tang padahka aku nama kebuah nuan ninggalka sida lalu datai ngagai kami? Nuan deka selamat ditu. Anang takut! Kami enda munuh nuan malam tu, lalu nuan nadai penusah dudi ila.

⁴Nadai orang deka medis nuan ditu. Tiap iku sida deka ngibun nuan enggau badas baka sida ngibun bala kuli tuan aku, Nebukadnesar.”

⁵Udah nya Judit bejaku enggau Holopernes, “Kemendarka aku bejaku enggau nuan tuan aku, lalu dingaka utai ti deka disebut aku. Aku deka madahka nuan utai ti amat.

⁶Enti nuan nitihka jaku aku, Allah Taala deka ngereja utai ti besai ke nuan, lalu nuan tuan deka mujur ba pengawa ti udah diperambuka nuan.

⁷ Aku deka besumpah ngagai nuan ngena pengidup enggau pengering Nebukadnesar ti raja semua dunya, nguasa semua utai idup ti ngirumka nuan. Ketegal pengawa ti dikereja nuan ukai semina mensia aja deka nyadi nembiak iya, tang jelu siga, jelu tupi enggau burung nitihka jaku iya. Ketegal nuan, Nebukadnesar enggau menua ti diperintah iya deka kaya.[8]

⁸Kami udah ninga pasal pengelandik enggau pemintar nuan. Semua dunya nemu nuan kepala soldadu ke pemadu landik di serata menua pegai Asiria.

⁹Akior diselamatka orang Betulia lalu udah nusi ke kami utai ti disebut iya dalam aum kunsil perang nuan.

¹⁰Nya alai, tuan, anang enda pedulika utai ti udah dipadahka Akior ke nuan. Nuan enda tau enda beratka jaku iya laban nya amat. Nadai siku orang ulih ngemedis tauka ngalahka bala kitai semadi meh bala kitai bedosa ngelaban Allah Taala.

¹¹“Tang nuan enda ditinggang penusah. Langgur nuan deka mujur nitihka tuju ati nuan. Lebuh bansa Israel bedosa, sida ngasuh Allah Taala sida ringat, lalu sida deka parai.

¹²Pemakai sida udah abis, lalu sida suntuk ai. Nya alai, sida mutuska runding deka munuh jelu tupi, lalu makai pemakai ke enda tau diempa ba Adat Allah Taala.

¹³ Sida deka makai gandum ti keterubah iya diketau, sereta wain enggau minyak ti digalauka bala imam nyadi ke pemeri ngagai Allah Taala di Jerusalem. Nitihka adat, semua kami enda tau makai pemakai nya. Indah megai iya deh kami enda tau.

¹⁴Tang orang di Jerusalem udah ngelaban adat tu. Nya alai, bala kami di nengeri nya udah ngirum orang ngagai kunsil pengarap minta pemendar ngambika kami ulih makai utai nya baka sida.

¹⁵Ba hari sida nerima pemendar, lalu makai pemakai ke enda tau diempa, nuan ulih ngerusak sida.

¹⁶Udah aku nemu pasal utai tu, aku rari ninggalka bala aku. Allah Taala ngirumka aku kitu ngambika begulai enggau nuan ngereja siti pengawa ti besai ti ngasuh tiap iku orang di serata dunya alit ati lebuh sida ninga berita nya.

¹⁷Tuan, aku indu ti bepengarap; aku nyembah Allah Taala ti di serega siang malam. Aku deka diau dalam kem nuan ditu, lalu tiap malam aku deka bejalai ngagai lebak besembiang ngagai Allah Taala. Iya deka madahka aku ni maya bansa Israel bedosa.

¹⁸Sepengelengkas aku nemu, aku datai kitu madahka nuan, lalu nuan tau mansang enggau semua soldadu nuan. Orang Israel enda ulih ngenanka diri ari serang nuan.

¹⁹Aku deka ngiring nuan nengah tengah-tengah menua Judah nyentukka kitai datai di Jerusalem, endur aku nyiri nuan nyadi raja ba tengah-tengah nengeri nya. Nuan deka mambarka orang Jerusalem baka bala bedus ti nadai pengibun. Nyentukka ukui pen enda berani nyalak nuan. Allah Taala udah dulu ngayanka utai tu ngagai aku lalu ngasuh aku madah ngagai nuan.”

²⁰Holopernes enggau bala kuli iya lantang amat ati ninga utai ti ditusi Judit, lalu muji penemu iya ti dalam.

²¹“Iya endang indu ke bepenemu amat sereta pemadu bajik di dunya,” pia ku sida bekenangka iya enggau pangan diri.

²²Udah nya, Holopernes bejaku enggau iya, “Manah amat Allah Taala udah ngirumka nuan kitu, mai pemenang ke kami, lalu ngerusak sida ke udah ngeleseka Rajah Nebukadnesar.

²³Nuan ukai semina bajik tang landik bejaku mega. Enti nuan ngereja utai munyi ti udah disemaya nuan, Allah Taala nuan deka nyadi Allah Taala aku. Nuan deka diau ba istana Raja Nebukadnesar, lalu deka tebilang nama di serata dunya.