Read Iban Judit 12 Bible Online

Judit 12 - Iban bible

Judit 12

¹Holopernes ngasuh bala iya mai Judit makai ba mija ti chukup disikap enggau perengka ti digaga ari pirak, lalu ngasuh sida ngenahka pemakai enggau wain iya ti manah ari selama.

² Tang Judit enggai. Ku iya, “Aku enda tau makai pemakai kita laban enti aku ngereja nya aku ngelaban adat Allah Taala aku. Aku semina makai pemakai ti udah dibai aku.”

³Ku Holopernes nanya iya, “Tang kati enti pemakai enggau wain nuan nadai agi? Dini endur kami ngambi pemakai ke nuan? Dalam kem kami nadai orang Israel.”

⁴Ku Judit nyaut, “Tuan, seagi-agi nuan idup, aku bisi pemakai lebih ari chukup datai ngagai maya Tuhan ngena aku bejalaika atur Iya.”

⁵Udah nya sida nembiak Holopernes mai Judit ngagai siti langkau kain. Iya tinduk dia lalu lebuh dini hari iya dani,

⁶lalu ngirum pesan ngagai Holopernes minta pemendar nurun ke lebak laban iya deka besembiang.

⁷Holopernes ngasuh sida jegaga ngemendarka Judit pansut ari kem nya. Nya alai ngelama tiga hari Judit diau ba kem nya, tiap malam iya pansut mansang ngagai lebak semak Betulia lalu mandi ba mata ai.

⁸Udah Judit tembu mandi iya besembiang ngagai Tuhan Allah Taala minta iring Iya bejalaika atur ngambika orang Israel menang.

⁹Tembu Judit nuchi diri iya pulai ke kem, lalu diau dia sampai udah makai lemai.

¹⁰Kena hari keempat Judit diau ba kem nya, Holopernes muka pengerami makai ke bala pemesai iya, tang iya enda ngangauka bala pemesai iya ke benung gawa maya nya.

¹¹Ku Holopernes bejaku enggau Bagoas, siku pemesai ti ngintu pendiau iya, “Alai umbuk indu orang Hebrew nya ti dijaga nuan ngambika iya deka ngagai langkau kain aku, lalu enggau kami makai ngirup.

¹²Malu amat enti muai peluang beleman enggau indu baka nya. Enti aku enda nguji ngulihka iya, iya deka ketawaka aku.”

¹³Nya alai, Bagoas angkat ninggalka Holopernes lalu mansang betemu enggau Judit, ku iya, “Nuan indu bajik, nuan dipinta kepala soldadu datai ngagai langkau kain iya, lalu begulai enggau sida berami ngirup baka bala indu orang Asiria ti bekereja di istana Nebukadnesar. Tu basa ti besai.”

¹⁴Ku Judit nyaut iya, “Gaga amat aku dikangau ngagai pengerami nya. Dini aku patut nulak iya? Aku deka ingatka malam tu seumur aku idup.”

¹⁵Nya alai, Judit angkat lalu begari ngena baju ti pemadu manah. Ulun iya mansang dulu nganchau bulu bedus ti diberi Bagoas ke Judit endur iya duduk lebuh makai.

¹⁶Judit datai ba langkau nya, lalu duduk dia. Holopernes nyau enda tetatka diri agi lebuh iya meda Judit, lalu iya enda ulih tetagangka pengingin ati deka beleman enggau iya. Kenyau hari ti terubah iya meda Judit, iya endang nganti peluang ngulihka iya.

¹⁷Ku iya bejaku enggau Judit, “Aram enggau kami ngirup ngelantangka diri.”

¹⁸Ku Judit nyaut, “Tuan, rindu amat aku enggau kita. Tu meh hari ti pemadu ngelantangka ati aku.”

¹⁹Tang taja pia, Judit semina makai enggau ngirup utai ti disediaka ulun iya.

²⁰Holopernes nyau balat amat tetarit ati ngagai Judit sampaika iya ngirup wain mayuh ari ngelama tu.