Read Iban Judit 13 Bible Online

Judit 13 - Iban bible

Judit 13

¹Pengujung iya, lebuh hari nyau jauh malam, bala pengabang lalu mulaika diri. Bagoas lalu nutup langkau nya ari luar sereta nagang nembiak Holopernes tama kia. Sida lalu tinduk, genap iku sida lelak laban pengerami makai nya kelalu lama.

²Judit tinggal kediri dalam langkau enggau Holopernes ti mabuk gali atas katil iya.

³Judit ngasuh ulun indu iya bediri di luar bilik tinduk, nganti iya pansut lalu besembiang baka tiap malam ti dulu ari nya. Judit mega bisi madahka Bagoas pasal iya ti deka pansut, lalu besembiang baka selama.

⁴Semua orang udah pulai magang. Semina Judit seduai Holopernes aja dalam langkau nya. Judit bediri ngimbai katil Holopernes lalu besembiang dalam ati, “O Tuhan, Allah Taala ti pemadu bekuasa, tulung aku ngereja utai ti deka dikereja aku ke mulia Jerusalem.

⁵Tu meh maya nyelamatka bansa ti dipilih nuan, lalu nulung aku ngereja pengawa ngerusak bala munsuh ti deka ngenusahka kami.”

⁶Judit mansang ngagai tiang katil ti semak pala Holopernes, lalu ngambi pedang Holopernes.

⁷Iya mansang semak agi, lalu megai buk Holopernes sereta nyebut, “O Tuhan Allah Taala Israel, beri aku pengering diatu.”

⁸Udah nya Judit ngedarka pedang nya, lalu enggau pengambis pengering mantap rekung Holopernes dua kali, lalu mumpung pala iya.

⁹Iya melatka bangkai Holopernes ari katil lalu ngingkaska kibung ari tiang katil. Udah nya iya pansut lalu nyuaka pala Holopernes ngagai ulun indu iya.

¹⁰Ulun indu iya lalu nyimpan pala nya dalam bakul ti dikena mai pemakai. Udah nya seduai iya sama mupuk baka ti selalu dikereja seduai iya lebuh mansang sembiang. Udah seduai iya bejalai nengah kem Asiria, seduai iya ngelayang lebak lalu niki tebing bukit sampaika seduai datai ba pintu besai Betulia.

¹¹Lebuh seduai iya agi jauh, Judit lalu ngangauka bala jegaga pintu besai, “Buka pintu! Allah Taala kitai agi meruan enggau kitai. Sehari tu sekali da Iya mandangka pengering Iya di menua Israel lalu ngena kuasa Iya ngelaban munsuh kitai.”

¹²Lebuh sida ke lelaki ninga nyawa Judit, sida berumban-rumban nurun nuju pintu besai, lalu ngangauka bala pemesai nengeri.

¹³Semua orang, tuai biak, belanda magang nuju pintu besai. Nadai siku orang nyangka Judit udah pulai. Sida muka pintu besai lalu nyambut penatai seduai iya. Udah sida nungkun api ngambika tampak, sida lalu begempuru ngelingi seduai iya.

¹⁴Judit enggau nyawa ti inggar bejaku, “Puji Allah Taala, beri puji ke Iya! Puji Allah Taala, Iya ti tetap kasihka nembiak Iya Israel. Malam tu Iya udah ngena aku ngerusak munsuh kitai.”

¹⁵Udah nya iya mansutka pala Holopernes ari bakul pemakai lalu mandangka pala nya ngagai orang dia. Ku iya, “Tu pala Holopernes, kepala soldadu orang Asiria, lalu tu kibung ari katil endur iya gali mabuk. Tuhan ngena siku indu munuh iya.

¹⁶Dalam Nama Tuhan ti idup, aku besumpah Holopernes nadai sekali negu aku taja iya ditipu pemajik aku ti ngujungka iya parai. Iya enda buya aku, lalu aku tetap tuchi sereta enda dipemaluka laban Tuhan ngibun aku belama maya nya.”

¹⁷Tiap iku orang di nengeri nya alit ati. Sida nyerugang nyembah Allah Taala, lalu begulai besembiang, “Allah Taala kami, nuan endang patut amat dipuji. Sehari tu Nuan menang ngelaban munsuh kami nembiak Nuan.”

¹⁸Udah nya Usiah bejaku enggau Judit, ku iya, “Allah Taala ti Pemadu Bekuasa udah merekat nuan lebih ari semua indu di dunya! Iya ngiring nuan lebuh nuan mumpung pala tuai munsuh kitai.

¹⁹Pengarap nuan ke Allah Taala tetap deka dikingatka semua orang ti ngenang kuasa Iya.

²⁰Awakka Allah Taala meri nuan basa ti meruan belama iya ketegal pengawa ti udah dikereja nuan. Awakka Iya ngupah nuan enggau berekat laban nuan meruan talukka Iya lalu enda kakang berambunka nyawa diri empu ngelepaska bansa nuan ari dinyakka munsuh.” Semua orang nyaut, “Amin. Amin!”