Read Iban Judit 14 Bible Online

Judit 14 - Iban bible

Judit 14

¹Udah nya ku Judit bejaku enggau sida, “Menyadi dingaka jaku aku tu. Pagi pagila ambi pala tu lalu gantung di atas dinding nengeri.

²Pilih siku ari entara kita nyadi tuai ke semua lelaki ti ulih beperang. Tumu pagi sida mesti mai senyata lalu bebaris bejalai pansut ari nengeri ngaga diri baka ti deka ke lebak nyerang jejaga Asiria. Tang anang sekali-kali nurun kin.

³Sida jejaga Asiria deka ngambi senyata lalu lari ke kem ngerak bala pemesai sida. Bala pemesai nya deka lari ke kem Holopernes tang enda tetemuka iya. Semua soldadu sida deka begau lalu nyurutka diri lebuh kita mansang ngagai sida.

⁴Udah nya kita enggau semua orang Israel dalam menua tu deka nitihka sida, lalu munuh sida lebuh sida nyurutka diri.

⁵Tang sebedau kita ngereja utai nya, asuh Akior orang Amon nya kitu. Aku deka nemu sekalika iya ngelala Holopernes ke jai jaku enggau kitai, ke ngirum Akior ngagai kitai ngumbai iya deka dibunuh sama enggau kitai bukai.”

⁶Sida lalu ngangauka Akior ari rumah Usiah. Lebuh iya datai lalu meda pala Holopernes dipegai siku ari sida ke bisi dia, iya lalu luput.

⁷Udah sida nulung iya ngangkatka diri, iya nyerugang di kaki Judit enggau basa, lalu bejaku, “Awakka tiap ruang bilik di menua Judah bebasaka nuan, lalu awakka semua bansa begetar magang takut lebuh sida ninga nama nuan.

⁸Padahka aku baka ni nuan ngereja utai tu. Di mua orang mayuh Judit madah ngagai Akior utai ti dikereja iya kenyau ari iya ninggalka nengeri nya sampai ngagai maya iya bejaku ngagai sida.

⁹Udah iya tembu becherita, orang lalu manjung sampaika seluruh nengeri nya ninga rauh nyawa orang gaga.

¹⁰Lebuh Akior ninga utai ti udah dikereja Allah Taala orang Israel, iya arapka Allah Taala enggau pengabis ati. Udah nya iya ditutus nyadi siku ari orang Israel, lalu baka nya sida ti peturun iya sampaika sehari tu.

¹¹Dini hari siti, orang Israel ngantung pala Holopernes ba dinding nengeri. Bala lelaki orang Israel ngambi senyata lalu beraban-raban sida pansut mansang ke tinting bukit.

¹²Lebuh orang Asiria meda nya sida madahka bala pemesai sida, lalu sida nya madahka orang ke nyadi ketuai sida.

¹³Bala ketuai sida mansang ngagai kem Holopernes, lalu bejaku enggau Bagoas, ku sida, “Gerak kepala soldadu! Orang Israel ti nadai guna nya berani nurun ke baruh nyerang kitai; sida minta diri dirusak kitai.”

¹⁴Bagoas lalu tama sereta nempapka jari di mua bilik peninduk ngumbai Holopernes tinduk enggau Judit.

¹⁵Lebuh orang nadai nyaut, iya nyilakka kain tirai, lalu tama ke dalam sereta meda Holopernes garing-garing nadai pala.

¹⁶Bagoas nyerauh. Iya nyerarat, nyarikka baju iya lalu rauh-rauh nyabak.

¹⁷Iya mansang ngagai langkau endur Judit diau, tang nadai tetemuka iya dia. Iya pansut lalu enggau nyawa inggar madah ngagai bala pemesai, ku iya,

¹⁸“Sida udah ngakal kitai! Siku indu orang Hebrew udah ngemaluka seluruh perintah Nebukadnesar. Peda dalam nyin! Holopernes garing-garing parai nadai pala!”

¹⁹Lebuh bala pemesai ninga nya, sida nyarikka baju sida tanda sida tusah amat ati. Sida begau lalu nyabak balat amat dataika nyawa sida nyau didinga di serata kem nya.