Read Iban Judit 15 Bible Online

Judit 15 - Iban bible

Judit 15

¹Lebuh sida soldadu ninga utai ke nyadi nya, sida takut

²lalu gegetar. Sida pambar ari kem nya, nadai ati deka begulai agi, lalu lari ngagai sebarang endur nengah jalai nuju bukit enggau lebak.

³Bala soldadu ke diau di kem ba sebelah bukit ngelingi Betulia belabuh nyurutka diri mega. Udah nya soldadu orang Israel begagaika sida.

⁴Udah nya Usiah ngirumka seruan ngagai nengeri Betomestaim, Bebai, Choba enggau Kola enggau di serata menua Israel madah ngagai orang utai ti udah nyadi lalu minta sida begagaika munsuh lalu ngerusak sida.

⁵Udah orang Israel ninga pesan nya, sida lalu nyerang orang Asiria, begagaika munsuh sampai ke Choba, lalu munuh sida ba rantau jalai. Sampaika orang di Jerusalem enggau sida bukai ke diau ba sebelah bukit sama enggau nyerang lebuh bala seruan nusi ngagai sida utai ti udah nyadi di kem Asiria. Orang ari Gilead enggau Galili nyekat jalai ti ditengah orang Asiria ti nyurutka diri lalu ngasuh sida balat tasah. Orang Israel begagaika munsuh sampai datai ba menua ngelingi Damaskus.

⁶Orang di Betulia nurun mansang ngagai kem Asiria, ngerampas kem nya lalu mai perepasan ngambika sida kaya.

⁷Lebuh bala soldadu pulai ari bebunuhka munsuh, sida ngambi sekeda utai ti mayuh amat agi tinggal sampaika semua orang ti diau di menua pesisir bisi ungkup magang.

⁸Imam Besai Joakim enggau Kunsil Israel datai ari Jerusalem deka meda kediri empu pengawa besai ti udah dikereja Tuhan ke nembiak Iya, lalu sida mega betemu enggau Judit madahka pengaga ati diri ngagai iya.

⁹Lebuh sida datai, semua sida muji iya magang, “Nuan meh mulia makuta Jerusalem, ti ngasuh bansa kitai temegah sereta gaga!

¹⁰Nuan kediri aja udah ngasuh Israel menang besai. Allah Taala ti pemadu bekuasa gaga meda pengawa ti dikereja nuan. Awakka Iya merekatka nuan seumur idup.” Semua orang nyaut, “Amin.”

¹¹Pengelama tiga puluh hari orang nembuka pengawa ngambi perepasan ari kem orang Asiria. Langkau kain Holopernes enggau semua perengka pirak iya, mangkuk iya, enggau perengka rumah ti digaga ari kayu diberi ke Judit magang. Iya ngambi semua utai nya lalu dipanggaika atas jelu keledai naka ti ulih dibai jelu nya. Udah nya iya mai kereta kuda, lalu ngisi semua kereta nya mega.

¹²Semua indu orang Israel datai betemu enggau iya; sida belagu muji iya lalu bedansing bebasaka iya. Benunga sida rami gaga ati, Judit enggau bala indu bukai ngepaika daun kayu,

¹³lalu sida ngena sengkilung daun kana dirasuk ba pala. Judit dulu ari semua lebuh sida bejalai bebala mayuh, nguluka bala indu bedansing. Semua lelaki bansa Israel ngena sengkilung bungai dirasuk ba pala entudi sida, bebaika senyata, lalu nanyi lagu puji.