Read Iban Judit 16 Bible Online

Judit 16 - Iban bible

Judit 16

¹Udah nya Judit belagu siti lagu terima kasih lebuh semua orang Israel bisi dia, lalu sida enggau iya belagu.

²Tu leka lagu iya, “Puji Allah Taala aku, lalu belagu ke Iya; puji Tuhan ngena drum enggau enyarai; nanyi siti lagu baru ke Iya. Puji lalu kangauka Iya ti endur minta tulung.

³Tuhan nya siku tuai perang ti ngemaduka perang. Iya nyelamatka aku ari sida ti ngenyakka aku, lalu mai aku pulai ngagai kem nembiak Iya.

⁴Orang Asiria nurun ari bukit di utara enggau bepuluh ribu iku soldadu sida. Soldadu sida nekat sungai di lebak; soldadu sida ti nepan kuda menuhka bukit.

⁵Sida ngemba madahka diri deka nunu menua kami, munuh lelaki kami ke agi biak, ngempaska bala anak mit kami ke tanah, nabanka bala anak kami enggau sida ke indu ti biak.

⁶Tang Tuhan ti pemadu bekuasa nipu sida; Iya ngena siku indu nagang sida.

⁷Bujang berani sida ukai dibunuh soldadu ti biak tauka diserang lalu dibunuh orang ti besai tubuh, tang Judit anak Merari, nya orang ti ngelabuhka iya ngena gamal ti bajik.

⁸Iya ngulihka pemenang ke orang Isreal ti dienyak lebuh iya muka baju ti dikena indu balu lalu begari ngena baju linin kena narit ati lelaki nya. Iya ngena wangi ti berega lalu buk iya ditanchang ngena riben.

⁹Pemanah kasut iya ngasuh lelaki nya nyeling; lalu pemajik iya ngerinduka lelaki nya. Udah nya pedang mutuska rekung lelaki nya

¹⁰Orang Persia gegetar digasakka pengempang ati iya; orang Media alit ati laban pemerani iya.

¹¹Udah nya bala kami manjung menang. Sida udah lemi sereta dinyakka tang sida mejal munsuh nyurutka diri teguran sereta takut.

¹²Kitai tu peturun ulun, tang munsuh kitai nguing lalu lari; kitai munuh sida baka ke munuh ulun ti lari. Sida dirusak soldadu Tuhan.

¹³“Aku deka belagu siti lagu baru ke Allah Taala aku. O Tuhan, Nuan kering sereta bemulia! Nuan enda kala alah.

¹⁴Awakka semua utai ti idup digaga Nuan betuaika Nuan. Nuan bejaku, semua utai nyadi magang; Nuan ngesuhka seput, lalu semua sida idup magang. Nadai siku orang tau ngelaban jaku Nuan.

¹⁵Bukit enggau tasik gegetar, batu anchur baka lilin di mua Nuan. Tang Nuan bisi pengasih ke orang ti ngasika Nuan.

¹⁶ Tuhan deka lebih gaga ke sida ti ngasika Iya ari ti gaga ke dagin ti pemadu manah atas alta, tauka piring ti pemadu bau rengut.

¹⁷Semua bansa ti angkat ngelaban nembiak aku deka dirusak. Tuhan ti Pemadu Bekuasa deka ngukum sida lebuh Hari Pechara. Iya deka ngirumka api enggau ulat majuh bangkai sida, lalu sida deka nyabak ngetatka pemedis ke selama-lama iya.”

¹⁸Lebuh orang mayuh datai di Jerusalem, sida nuchi diri lalu nyembah Allah Taala. Sida meri piring tunu, piring peneka ati enggau pemeri.

¹⁹Judit nyerah ngagai Allah Taala semua reta tengkira Holopernes ti diberi orang ke iya. Iya meri ke Tuhan kibung ti diambi iya ari katil Holopernes nyadika pemeri ti lebih ari pemeri bukai ke tanda udah ngamatka semaya.

²⁰Pengelama tiga bulan orang mayuh berami di mua Rumah Sembiang di Jerusalem, lalu Judit diau enggau sida dia.

²¹Udah sida tembu ngintu pengerami, semua orang mulaika diri magang. Judit pulai ke rumah iya empu di Betulia. Sekumbang iya idup di dunya, iya tebilang di serata menua Israel.

²²Mayuh lelaki deka jadi enggau iya tang iya enda kala belaki baru udah pemarai laki iya, Manasi.

²³Nama iya ti beberita ngelekai, lalu iya diau di rumah niang laki iya. Sebedau Judit parai, iya magi reta tengkira enggau kaban belayan iya, lalu ngelepaska ulun iya ti indu. Lebuh umur Judit 105 taun, iya parai di Betulia, lalu dikuburka ngimbai laki iya. Orang Israel ngulitka iya tujuh hari.

²⁵Seagi-agi Judit idup, lalu betaun-taun udah iya parai, nadai orang berani ngemba orang Israel.