Read Iban Judit 2 Bible Online

Judit 2 - Iban bible

Judit 2

¹Dalam taun kelapan belas Nebukadnesar nyadi raja, kena hari kedua puluh dua dalam bulan keterubah taun nya, iya enggau bala penyanding penemu iya mutuska runding deka malas, lalu nyerang semua menua ke enggai nulung iya.

²Raja ngangauka semua orang ke gawa ke iya, nyengkaum bala pemesai perintah, lalu madah enggau silik baka ni semua menua nya enda nitihka jaku iya. Iya enggau bala pemesai perintah setuju deka munuh semua orang ke enggai nulung iya beperang. Udah nya baru iya madah baka ni sida patut nyerang.

⁴Ba pengujung aum, Raja Nebukadnesar bejaku enggau Holopernes ti kepala soldadu sereta nyadi lumur dua raja:

⁵“Aku, Nebukadnesar, raja besai di serata dunya, ngasuh nuan milih bala soldadau ti teleba beperang: 120,000 iku soldadu bejalai kaki enggau 12,000 iku soldadu nepan kuda.

⁶Udah nya serang semua menua tunga ke barat laban sida enggai nulung aku.

⁷Tangkan sida, lalu asuh sida besedia nyerahka menua enggau ai nyadika tanda sida nyerah diri ngagai aku. Aku deka ngasuh sida ngasaika pemedis ati aku. Bala soldadu aku deka ngindik tiap jengkal tanah sida, lalu ngerampas reta pengaya sida.

⁸Aku deka ngisi lebak ngena bangkai sida, lalu deka nekat semua sungai ngena bangkai sida ngambika ai sungai nyegang.

⁹Aku deka nangkap sida ke agi idup, lalu mambarka sida ngagai ujung dunya.

¹⁰“Nyadi nuan, Holopernes, aku ngasuh nuan dulu bejalai ari aku, lalu ngambi semua menua. Enti sida nyerahka diri ngagai nuan, tan dulu nganti aku datai baru ngukum sida.

¹¹Enti sida ngelaban nuan anang ngalau sida. Bunuh sida, lalu rampas reta enggau menua sida ngena kuasa nuan.

¹²Aku udah besumpah, berambunka nyawa aku enggau kuasa raja aku, aku bebendar deka ngereja utai nitihka sumpah aku.

¹³Titihka semua jaku aku. Ingat meh, aku tu raja nuan. Kereja meh enggau jampat semua utai ti diasuh aku.

¹⁴Nya alai Holopernes ninggalka raja lalu ngangauka semua pemesai soldadu Asiria.

¹⁵Iya milih 120,000 iku soldadu bejalai kaki ke pemadu landik beperang, enggau 12,000 iku soldadu ke pemadu landik ngena panah nepan kuda,

¹⁶lalu ngatur sida beperang.

¹⁷Iya mega mai mayuh unta, keledai enggau penakan kuda kena mai perengka perang. Bedus, chapi enggau kambin mega dibai ke pemakai sida.

¹⁸Tiap soldadu nerima mayuh barang pemakai enggau gaji besai, iya nya, mas enggau pirak ari sarang reta raja.

¹⁹Udah nya Holopernes enggau semua soldadu iya angkat dulu ari Raja Nebukadnesar. Semua kereta kuda perang, raban soldadu ke nepan kuda enggau sida ke bejalai kaki mansang lalu ngalahka semua menua di barat.

²⁰ Bisi mega raban soldadu bukai enggau sida. Pemayuh sida enda ulih tiap, baka raban buntak tauka keresik di tanah.

²¹Tiga hari udah sida ninggalka nengeri Nineweh, sida datai ba emperan ngelingi Bektilet semak endur bebukit di utara Sisilia, lalu belangkau dia.

²²Ari endur nya Holopernes enggau semua raban soldadu iya enggau sida ke ngena kereta kuda perang tama ngagai endur ti bebukit.

²³Iya ngerusak abis lengis menua ti dipegai Libia enggau Lidia, lalu ngerampas reta tengkira orang Rasis enggau orang Ismail ti diau ba ujung menua puang di Chilian.

²⁴Udah nya Holopernes ngelayang Sungai Eupratis lalu mansang nengah menua Mesopotamia. Iya ngerusak abis lengis nengeri ti bedinding sepemanjai Sungai Abron sampai ke tasik.

²⁵Iya ngerampas menua Sisilia, lalu munuh tiap iku orang ti nagang iya. Iya mansang jauh sampai ke selatan entara menua Japet semak Arabia.

²⁶Iya ngepung orang Midian, nunu abis lengis semua langkau sida lalu munuh bedus sida.

²⁷Holopernes nurun ngagai emperan ngelingi Damaskus benung musin ngetau gandum, lalu nunu semua umai, munuh semua jelu tupi, nerumpak nengeri, ngerusak tanah endur bumai, lalu munuh semua orang ke biak.

²⁸Ketegal nya, semua orang ti diau di sepemanjai Tasik Tengah enggau sida ti diau di nengeri Tire, Sidon, Sur, Osina, Jamnia, Asdot enggau Askelon teguran sereta takut magang.