Read Iban Judit 4 Bible Online

Judit 4 - Iban bible

Judit 4

¹Orang Judah ninga berita pasal pengawa ti dikereja Holopernes kepala soldadu raja Nebukadnesar ngagai bansa bukai. Sida ninga baka ni iya ngerampas sereta ngerusak semua rumah sembiang sida.

²Semua sida takut, lalu irauka iya ngereja pengawa ti sebaka di Jerusalem enggau Rumah Sembiang Tuhan ti Allah Taala sida.

³Sida baru udah mulaika diri ngagai menua Judah ari menua endur sida dibuai, lalu nyerahka baru ngagai Allah Taala, Rumah Sembiang, perengka iya enggau alta ti udah kamah laban munsuh.

⁴Nya alai, sida ngirumka jaku tangkan ngagai serata kandang menua di Samaria enggau ngagai nengeri Kona, Bet Horon, Belmin, Jeriko, Koba, Aisora enggau ngagai Lebak Salem.

⁵Sida tekala nya diau ba tuchung bukit lalu ngaga kota ke semua genturung pendiau ba sebelah bukit, nugungka pemakai nyediaka diri deka beperang. Sida benasip laban baru udah badu ngetau.

⁶Imam Besai Joakim ke bisi di Jerusalem lebuh maya nya, nulis ngagai orang ba nengeri Betulia enggau Betomestaim ti betimpai enggau Lebak Jesril semak Dotan.

⁷Iya ngasuh sida nguan semua jalai masuk di sebelah bukit nuju menua Judah. Dia nyamai endur sida nanka diri laban jalai nya mit, semina chukup alai dua iku begelih.

⁸Orang Israel nitihka padah Imam Besai Joakim enggau bala Kunsil ti baum di Jerusalem.

⁹Bala tuai bansa Israel besembiang enggau pengabis ati ngagai Allah Taala lalu bepuasa.

¹⁰ Semua orang Israel enggau bini anak sida, jelu tupi, orang kampar, ulun enggau orang gaji ngena gari guni.

¹¹Sida mega ngebab alta enggau guni lalu sida ke lelaki, indu, enggau bala anak mit di Jerusalem ningkap ba tanah di mua Rumah Sembiang; sida ngerabu pala enggau abus. Sida begulai besembiang bebendar ngagai Allah Taala, lalu minta ari Iya ngambika anak bini sida enda ditaban, lalu menua sida enda dirusak. Sida minta ari Iya ngambika orang bansa bukai enda ulih ngerusak Rumah Sembiang peneka ati sida, lalu bebasaka iya.

¹³ Tuhan ningaka sembiang sida sereta meda penusah sida. Orang Judah di Jerusalem lama bepuasa di mua Rumah Sembiang Tuhan ti Pemadu Bekuasa.

¹⁴ Imam Besai Joakim, bala imam enggau bala bukai ke gawa ba Rumah Sembiang Tuhan ngena gari guni lebuh sida meri piring tunu tiap hari, piring peneka ati ari orang mayuh enggau piring ti deka ngamatka semaya.

¹⁵Sida ngerabu abus atas labung lalu besembiang enggau nyawa ti inggar ngagai Tuhan, minta Iya kasih ke semua orang Israel.