Read Iban Judit 5 Bible Online

Judit 5 - Iban bible

Judit 5

¹Lebuh Holopernes, kepala soldadu Asiria ninga orang Israel udah besedia deka beperang, udah ngempang semua jalai di bukit, udah nguta tuchung bukit, lalu udah ngempang jalai ba emperan,

²iya ringat amat. Iya ngangauka semua tuai-tuai perintah orang Moap, bala kepala soldadu orang Amon enggau semua gabenor ba kandang menua sepemanjai tebing Tasik Tengah,

³lalu bejaku enggau sida, “Kita diau di menua Kanaan, nya alai padahka aku pasal mensia ke diau ba bukit. Nengeri ni ti endur sida diau? Ni pemayuh soldadu sida? Ari ni penatai kuasa enggau pengering sida? Sapa raja nguluka soldadu sida?

⁴Ari semua bansa di barat, nama kebuah sida aja ke enggai datai betemu sereta nyerah diri ngagai aku?”

⁵Udah nya Akior, tuai orang Amon nyaut Holopernes, “Tuan, enti nuan deka ningaka aku, aku deka madah ngagai nuan pasal orang ke diau ba bukit semak kem nuan. Aku enda bulaka nuan.

⁶Orang tu meh tiris sekeda orang Babilon

⁷ke udah ngelengkaka adat lama aki ini sida lalu nyembah Allah Taala ti di serega. Udah nya, sida diburu ari menua sida empu laban sida enggai nyembah petara aki ini sida. Lalu sida rari ngagai Mesopotamia, endur sida netapka diri sereta lama diau dia.

⁹ Udah nya Allah Taala sida ngasuh ninggalka Mesopotamia lalu mansang ngagai menua Kanaan. Sida diau dia lalu kaya amat laban mayuh mas, pirak enggau jelu tupi.

¹⁰ Udah nya, maya menua Kanaan ditinggang lapar pungkang, orang Israel tu pindah ngagai menua Ejip lalu diau din sampaika sida bulih chukup pemakai. Benung sida diau din, sida nyadi bansa ti besai enda ulih itung.

¹¹ Raja menua Ejip lalu bemunsuh enggau sida. Iya ngambi peluang ngasuh bekereja ngaga batu bata. Iya merinsaka sida, lalu ngaga sida nyadi ulun.

¹² Tang sida besembiang ngagai Allah Taala sida, lalu Iya ngasuh penusah besai ninggang orang Ejip dataika sida nadai daya agi. Lebuh orang Ejip muru sida pansut ari menua nya,

¹³ Allah Taala sida ngerangkaika Tasik Merah di mua sida,

¹⁴lalu ngiring sida ba sepemanjai jalai nuju Sinai enggau Kades Barnea. “Orang Israel muru semua orang ke diau di selatan menua Kanaan,

¹⁵lalu diau di menua Amon, ngeluska orang Hesbon, ngelayang Sungai Jordan, lalu bekuasa ba kandang menua ti bebukit.

¹⁶Sida muru orang Kanaan, orang Peris, orang Jebus, orang Sikem enggau orang Girgas. Orang Israel diau ba bukit nya chukup lama.

¹⁷ Allah Taala sida begedika penyai, lalu seagi-agi sida enda bedosa ngelaban iya, sida senang.

¹⁸Tang enti sida enda ngasika Iya, sida deka alah besai dalam semua perang, lalu ngujungka sida ditangkap lalu ditaban ngagai menua bukai. Rumah Sembiang Allah Taala sida dirubuh lalu nengeri sida diwan munsuh sida.

¹⁹Tang diatu sida iya udah pulai baru ngagai Allah Taala sida. Sida udah pulai ari menua ti endur sida pambar. Sida ngerampas baru nengeri Jerusalem endur ti bisi Rumah Sembiang. Sida mega diau ba sebelah bukit ti lama nadai diwan mensia.

²⁰“Tuan, enti orang nya bedosa ngelaban Allah Taala sida, kitai ulih ngalahka sida.

²¹Tang enti sida ngasika Allah Taala sida, manah agi nuan anang ngachau sida laban Iya deka nulung sida, lalu kitai deka malu di serata dunya.”

²²Udah Akior tembu bejaku, dia semua orang ke bediri ngelingi kem nya manjung madahka diri enda besetuju. Bala pemesai Holopernes, orang Moap enggau orang ti datai ari tebing Tasik Tengah minta Akior dibunuh.

²³“Nama kebuah kitai takut ke bansa Israel?” Ku sida nanya. “Sida nya lemi; sida enda kering nanka diri.

²⁴Aram kitai mansang! Holopernes, soldadu nuan ti kering ulih ngalahka sida enggau mudah.”