Read Iban Judit 6 Bible Online

Judit 6 - Iban bible

Judit 6

¹Lebuh orang mayuh badu ragak, dia Holopernes bejaku ngagai Akior di mua sida ke datai ari tebing Tasik Tengah, orang Moap enggau soldadu orang Amon.

²“Akior[2], sapa nuan tu tak begah-begah ngapa bejaku munyi nabi? Sapa nuan tu ke enda ngasuh kami beperang ngelaban orang Israel laban Allah Taala sida deka nyaga sida? Semina Nebukadnesar aja ti petara kitai. Iya deka ngasuh bala soldadu munaska orang Israel ari dunya tu. Allah Taala sida enda ulih nulung sida.

³Tang kitai nembiak Nebukadnesar deka mudah ngalahka sida baka ti ngalahka siku orang aja. Sida enda ulih ngelaban kitai.

⁴Bukit deka basah laban darah sida, lalu lebak deka penuh laban bangkai sida. Udah kitai nyerang, sida iya deka abis lengis. Tu meh utai diasuh Nebukadnesar ti bekuasa atas dunya. Iya enda bejaku ngapa.

⁵Akior, nuan tu nadai guna. Nuan tu semina orang gaji bansa Amon. Nuan bejaku baka orang ti aum juak. Nuan deka badu meda aku nyentuk ngagai maya aku datai baru lalu ngukum orang Israel ke udah nyadi ulun.

⁶Lalu lebuh aku pulai ila, nuan deka dibunuh soldadu aku. Nama nuan deka masuk dalam list nama orang ke parai.

⁷“Diatu bala aku deka mai nuan ngagai bukit lalu nuan deka ditinggalka ba siti ari nengeri orang Israel.

⁸Nuan deka parai begulai enggau sida dia.

⁹Akior, nama kebuah nuan baka ke tusah ati? Kati dalam runding nuan nengeri nya enda alah laban aku? Aku deka bejalaika semua atur; ila nuan meda!”

¹⁰Udah nya, Holopernes ngasuh bala iya ke nganti ba langkau nangkap Akior, lalu mai iya ke Betulia sereta nyerahka iya ngagai orang Israel.

¹¹Nya alai, sida nangkap Akior lalu mai iya pansut ari kem soldadu nuju lebak. Ari nya sida mai iya ngagai bukit, nyentukka datai ba mata ai di baruh Betulia.

¹²Lebuh orang ba nengeri nya tepedaka sida datai, sida lalu ngambi senyata sereta belanda ngagai tuchung bukit. Tiap iku orang ti ngena pangwang ke senyata sida, nikauka batu ngagai bala soldadu Holopernes, lalu nya ke nagang sida niki ke atas bukit.

¹³Orang Asiria nadai jalai bukai tang belindung sebelah tisi bukit. Dia sida nanchang Akior lalu ninggalka iya garing-garing ba kaki bukit. Udah nya sida pulai ngagai Holopernes.

¹⁴Lebuh orang Israel nurun ari Betulia, sida muka tanchang Akior lalu mai iya ngagai nengeri. Sida lalu mai iya ngagai bala tuai perintah di nengeri nya,

¹⁵ti dipegai Usiah anak Mikah ari raban bansa Simeon, Kabris anak Gothoniel, enggau Karmis anak Melkiel.

¹⁶Bala tuai perintah ngempuruka tuai raban bansa, lalu semua orang indu enggau orang ke biak datai enggau begempuru. Akior dibai ngagai mua orang mayuh, lalu Usiah belabuh nanya iya.

¹⁷Akior nusi ngagai sida pasal utai ti disebut ba aum kunsil perang Holopernes. Iya mega nusi utai ti disebut iya ngagai bala pemesai Asiria, lalu baka ni Holopernes tinggi jaku pasal utai ti deka dikereja iya ba orang Israel.

¹⁸Lebuh orang mayuh ninga nya, sida lalu nyerugang nyembah Allah Taala. Sida besembiang:

¹⁹“O Tuhan Allah Taala ti di serega, peda gaya penyumbung munsuh kami ti deka ngemalu nembiak Nuan! Kasihka kami lalu tulung meh kami.”

²⁰Udah nya sida enda ngasuh Akior takut agi, lalu muji iya ketegal semua utai ti udah dikereja iya.

²¹Udah orang badu betugung, Usiah mai Akior ngagai rumah iya, endur muka makai besai ke tuai-tuai raban bansa. Semalam-malam sida besembiang ngagai Allah Taala orang Israel minta tulung iya.