Read Iban Judit 7 Bible Online

Judit 7 - Iban bible

Judit 7

¹Hari siti Holopernes ngempuruka semua soldadu iya enggau bala ke nyukung iya. Bala soldadu nya mayuh amat. Penyampau sida soldadu ke bejalai kaki 170,000 enggau 12,000 soldadu ti nepan kuda, enda nyengkaum soldadu ti ngemataka senyata perang. Iya ngasuh sida mansang ngagai Betulia, ngipa semua jalai ba sebelah bukit, lalu nachahka orang Israel. Nya alai, sida angkat,

³lalu ngaga kem ngimbai mata ai ba lebak semak Betulia. Kem soldadu nya besai amat. Pemesai iya ngelekai ngagai nengeri di Dotan nyentuk ngagai Balbaim, lalu pemanjai iya belabuh ari Betulia ngagai Siamon, nunga Lebak Jesril.

⁴Lebuh orang Israel meda pemayuh bala soldadu nya, sida takut amat lalu bejaku enggau pangan diri, “Bala soldadu nya deka makai semua utai ti dipeda sida. Semua pemakai ti di bukit, di lebak enggau di munggu enda chukup diempa soldadu ti ngemayuh nya.”

⁵ Taja sida takut, semua orang Israel ngambi senyata, ngidupka api ke tanda ba menara, lalu bejaga sepemanjai malam.

⁶Hari siti Holopernes nguluka semua soldadu minta peda orang Israel di Betulia.

⁷Iya meresa semua jalai ngagai nengeri enggau ngagai mata ai. Iya ngerampas matai ai, lalu ngasuh soldadu bejaga dia sebedau iya mulaika diri ke kem.

⁸Semua tuai soldadu bansa Edom enggau bansa Moap begulai enggau tuai soldadu ke datai ari tebing Tasik Tengah datai ngagai Holopernes lalu bejaku,

⁹“Tuan, enti nuan ningaka lalau kami, soldadu nuan enda balat alah.

¹⁰Orang Israel tu enda bepanggai ba senyata sida tang bepanggai ba peninggi bukit ke endur sida diau laban bukit nya tusah ditiki.

¹¹Nya alai, Tuan Holopernes, enti nuan enda terus nyerang sida, semua soldadu nuan sigi enda bebadi.

¹²Diau meh ba kem nuan, lalu awakka bala soldadu nuan tetap ba endur sida diau. Semina asuh bala soldadu nuan nyaga mata ai ke di kaki bukit,

¹³laban endur nya alai sida di Betulia ngambi ai. Udah nya, lebuh sida nyau deka parai aus, sida deka nyerahka diri ngagai nuan. Lebuh maya nya, bala kami deka niki ke tuchung bukit ke semak nya, alai kami ngaga kem lalu bejaga ngambika sida enda rari ninggalka nengeri nya.

¹⁴Semua sida, lelaki, indu enggau anembiak deka mati lapar. Sebedau kitai nachahka sida, jalai deka penuh laban bangkai sida.

¹⁵Ngena jalai nya, nuan ulih ngukum sida ti ngelaban, sereta enggai nyerahka diri enggau manah.”

¹⁶Holopernes enggau semua bala pemesai iya lantang ati enggau perambu nya, nya alai iya meri atur ngambika perambu nya dikereja.

¹⁷Orang Moap enggau 5,000 orang Asiria mindahka kem sida ke lebak ngambika nguasa pun penatai ai nengeri nya.

¹⁸Orang Edom enggau orang Amon niki ke bukit lalu ngaga kem sida betentang enggau nengeri Dotan. Sida ngirumka sekeda bala sida tunga ke Akraba, semak Kusi ti ngimbai Sungai Mokmur. Bala soldadu Asiria ti bukai ngaga kem di lebak. Kem sida ngelekai sebelah menua nya laban langkau enggau perengka perang sida bangat mayuh.

¹⁹Udah nya, orang Israel ngangauka Tuhan Allah Taala sida minta tulung. Sida nyau takut laban sida udah dikelinggi bala munsuh lalu enda ulih rari.

²⁰Semua soldadu Asiria - soldadu ke bejalai kaki, soldadu ngena kereta kuda enggau soldadu ke nepan kuda ngelulung Betulia pengelama tiga puluh empat hari, datai ke nengeri nya nadai agi ai.

²¹Semua tekat ai enggau telaga nyau rangkai. Ai irup disekat, lalu tiap hari enda chukup ai.

²²Bala anembiak nyau lemi tulang; di tiap endur sebelah nengeri bala sida ke indu enggau sida ke biak luput. Semua sida lemi tulang magang.

²³Semua orang ke diau ba nengeri nya, indu lelaki enggau anembiak begelumu ngelingi Usiah enggau bala pemesai nengeri nya, lalu mantah enggau nyawa ti inggar, ku sida,

²⁴“Allah Taala deka ngukum kita ketegal semua pengawa ti udah dikereja kita ngagai kami laban kita enggai bebaik enggau orang Asiria.

²⁵Nadai siku orang nulung kitai diatu! Allah Taala udah nyerahka kitai ngagai kuasa sida. Kitai tu lemi tulang nyau deka parai aus.

²⁶Kangauka orang Asiria diatu lalu nyerah diri ngagai sida. Awakka Holopernes enggau bala soldadu iya ngambi nengeri lalu ngerampas reta.

²⁷Manah agi kitai nyadi orang tangkap. Sida deka ngaga kitai nyadi ulun, asal meh kitai agi ulih idup. Lalu kitai enda deka meda bala bini enggau anak kitai mati.

²⁸Serega enggau dunya nyadi saksi ngelaban kita, pia mega Allah Taala kitai, Tuhan aki ini kitai, ke ngukum kitai ketegal dosa sida enggau dosa kitai. Kitai semina ulih ngarap sereta besembiang ngambika penusah ti besai tu enda ninggang kitai sehari tu.”[3]

²⁹Semua orang beterauh nyabak lalu besembiang ngagai Tuhan Allah Taala sida.

³⁰Udah nya ku Usiah bejaku enggau sida, “Anang kita lemi ati! Awakka kitai nganti lima hari da ngambika meda sekalika Tuhan Allah Taala kitai deka kasih ke kitai. Tentu Iya enda sekali-kali ninggalka kitai.

³¹Tang enti nadai penyaup datai udah lima hari, nya baru aku deka ngereja nitihka utai ti disebut kita.”

³²Usiah lalu ngasuh sida pulai. Semua orang lelaki pulai ngagai endur bejaga, lalu sida ke indu enggau anembiak pulai ngagai rumah diri empu. Semua sida ba nengeri nya nadai daya agi.