Read Iban Judit 8 Bible Online

Judit 8 - Iban bible

Judit 8

¹Lebuh maya nya Judit bisi ninga pemutus penemu Usiah. Judit anak Merari, uchu Oks enggau ichit Josep. Josep tu peturun Osiel, Elkiah, Ananias, Gideon, Rapaim, Ahitup, Elijah, Hilkiah, Eliap, Natanael, Salamiel, Sarasadai enggau Israel.

²Laki Judit benama Manasi ti sama raban bansa enggau iya, parai lebuh musin ngetau lingkau.

³Iya luput kena panchar panas benung ngemataka orang gawa di umai. Iya parai di rumah iya di Betulia lalu dikuburka ba pendam sida sebilik ba umai entara Dotan enggau Balamon.

⁴Judit udah balu tiga taun empat bulan.

⁵ Enggau ati ti tusah iya ngaga siti endur di atas perabung rumah iya lalu diau dia. Iya ngena kain guni ke tanda iya ngulit.

⁶Sekumbang iya balu, iya bepuasa. Iya enda bepuasa ba maya ti enda tau bepuasa, iya nya, sehari sebedau hari sabat; hari sabat nya empu, ba hari mantar Gawai Bulan enggau ba hari besai nya empu, sereta enggau ba semua hari besai ti diintu orang Israel.

⁷Judit indu ti bajik amat. Laki iya ninggalka iya mas, pirak, kuli enggau ulun, jelu tupi enggau umai ti besai, lalu iya majak ngemataka semua utai nya.

⁸Nadai siku orang nyebut utai ke enda manah pasal iya. Iya siku indu ti taluk dalam pengarap.

⁹Judit ninga pemalat serabana orang ngelaban Usiah ketegal suntuk ai, lalu nya ngasuh sida nyau kurang pengarap. Iya mega nemu ketegal serabana orang, Usiah deka nyerah nengeri nya ngagai orang Asiria udah abis timpuh lima hari.

¹⁰Judit ngirum kuli indu iya ti bejalaika dagang iya, mesanka Usiah,[4] Kabris enggau Karmis, pemesai ba nengeri nya, datai ngagai rumah iya.

¹¹Lebuh bala pemesai nya datai, Judit bejaku ngagai sida, “Uji dingaka aku. Kita tu tuai orang Betulia, tang kita salah jaku enggau orang sehari tu. Kita enda patut sekali-kali besemaya di mua Allah Taala, madahka diri deka nyerahka nengeri tu ngagai munsuh enti Tuhan enda datai nulung kitai dalam kandang sehari dua tu.

¹² Nama kuasa nuan nguji Allah Taala baka pengawa ti dikereja nuan sehari tu? Sapa nuan ngaga diri baka Allah Taala ngaduka pekara mensia?

¹³Nuan nguji Tuhan ti pemadu bekuasa! Kati kita lalu enda nemu?

¹⁴ Kita enda ulih beratika utai dalam ati mensia. Berani kita nguji macha runding enggau pikir Allah Taala, lalu nukuka penemu iya! Baka ni kita tau ngumbai diri meretika Allah Taala, ti Pengaga? Anang kita baka nya. Kita mesti badu ngeringatka Allah Taala Tuhan kitai!

¹⁵Enti Iya enda datai nulung kitai dalam kandang lima hari tu, iya agi ulih nyelamatka kitai sebarang maya ni ku Iya. Tauka Iya ngelakka munsuh kitai ngerusak kitai.

¹⁶Tang kita enda patut ngeletak atur ke Tuhan Allah Taala kitai! Kati dalam runding kita Iya sebaka enggau kitai? Kati ba runding kita, Iya ulih dibai betawar tauka ngansak Iya meri pemutus?

¹⁷Enda! Tang kitai patut minta tulung Allah Taala lalu besabar nganti Iya nyelamatka kitai. Enti Iya deka, Iya nyaut kangau kitai ke minta tulung Iya.

¹⁸Kitai enda nyembah petara digaga jari mensia. Nadai siku ari bansa kitai kala nyembah petara digaga jari mensia taja aki ini kitai kala ngereja nya.

¹⁹Nya meh kebuah Allah Taala ngasuh munsuh sida munuh sida, lalu ngerampas semua utai ti dikemisi sida. Balat amat sida alah!

²⁰Tang laban kitai nyembah Tuhan siku aja, nya alai kitai tau andal Iya enda nulak kitai tauka sekeda ari bala kitai.

²¹“Enti nengeri kitai dirampas munsuh, semua menua Judah deka dirusak, lalu Rumah Sembiang di Jerusalem deka dirumpak. Lalu Allah Taala deka ngasuh kitai mayar ngena nyawa kitai empu enti kitai ngelakka Rumah Sembiang dikamahka munsuh.

²²Iya deka ngasuh kitai betanggungjawab ke bala kitai ti parai enggau bala kitai ti kena tangkap, enggau ke pengerusak menua pesaka kitai. Kitai deka dipejai lalu dikeleseka bansa ti beulunka kitai.

²³Kitai nadai bulih sebarang penguntung ari munsuh enti kitai nyerah diri ngagai sida diatu.[5] Enti kitai nyerahka diri, Tuhan Allah Taala kitai deka meda pemalu kitai.

²⁴“Anang pangan aku, kitai patut meri chunto ngagai bansa kitai. Utai ti deka nyadi ba sida, ba Rumah Sembiang enggau ba alta bepanggai ba kitai.

²⁵Tuhan Allah Taala kitai nguji kitai baka Iya ti nguji aki-ini kitai, lalu kitai patut meri terima kasih ngagai Iya ketegal utai nya.

²⁶ Ingat meh baka ni Iya nguji Abraham enggau Isak, enggau utai ti nyadi ba Jakop lebuh iya bekereja nyadi pengibun bedus enggau aya iya Laban di Mesopotamia.

²⁷Allah Taala enda nguji penaluk kitai baka pemalat Iya nguji sida. Allah Taala enda ngukum kitai ketegal deka malas, tang nangkan kitai ti nyembah Iya.”

²⁸Udah nya Usiah nyaut Judit, “Semua utai ti sebut nuan betul magang. Kami enda mantah.

²⁹Tu ukai baru iya nuan mansutka penemu ngenalam nya. Kenyau ari nuan agi mit kami udah ngelala pemereti enggau pemansau runding nuan.

³⁰Tang bala kitai deka parai ketegal aus. Sida mejal kami nyebut utai ti dikereja kami lalu kami ngaga semaya ti enda ulih diubah.

³¹Nya alai diatu, ketegal nuan indu ti kering pengarap, besembiang meh ke bala kitai, minta Tuhan ngasuh hari ujan menuhka tempayan ai kena mulaika pengering tubuh kitai.”

³²“Au meh,” ku Judit nyaut, “Aku deka ngereja pengawa ti deka selalu dikingatka kitai orang Judah.

³³Malam tu, kita tiga mesti bejaga ba pintu kuta ngambika aku enggau kuli aku ulih pansut ari nengeri tu. Sebedau hari kita deka nyerahka diri nitihka semaya, Tuhan deka ngena aku nyelamatka orang Israel.

³⁴Tang kita anang nanyaka nama utai ti deka dikereja aku; ila aku madahka kita lebuh utai tu udah tembu.”

³⁵Usiah enggau pemesai bukai bejaku ngagai iya, “Kami nyukung nuan. Mupuk meh nuan enggau selamat. Lalu awakka Tuhan Allah Taala kitai ngiring nuan bebalas ngelaban munsuh kitai.”

³⁶Udah nya sida nurun ari sadau endur Judit diau lalu pulai ngagai endur sida bejaga.