Read Iban Judit 9 Bible Online

Judit 9 - Iban bible

Judit 9

¹Udah nya Judit ngerabuka abus atas pala iya, lalu muka baju iya ti manah awakka baju guni iya dipeda. Iya lalu meremika pala iya. Lemai nya, benung menyan ditunu ba Rumah Sembiang di Jerusalem, Judit besembiang enggau nyawa ti inggar:

² “O Tuhan, Allah Taala aki aku Simeon, ingatka baka ni nuan nyikap Simeon enggau pedang kena bebalaska penyai orang bansa bukai ti nangkap Dina ti dara bungas lalu nyarikka baju iya.[6] Sida nelanjai, masung lalu ngemaluka iya taja nuan enda ngasuh sida ngereja nya.

³Nya meh kebuah nuan ngasuh bala tuai sida dibunuh--ba katil endur sida masung indu nya.[7] Nuan ngerusak semua sida, bala ulun, bala anak raja enggau bala raja ti megai kuasa.

⁴Nuan ngasuh bini sida ditaban, anak indu sida ditangkap enggau reta tengkira sida diempu orang Israel, bansa ti dipilih nuan, ke rindu ngereja peneka nuan. Bala menyadi Dinah ti lelaki ringat amat laban pengawa nya ngemalu sida sebilik, nya alai, sida ngangauka Nuan minta tulung. “O Allah Taala aku, dinga meh sembiang aku ti balu.

⁵Jari nuan ngiring semua utai ke nyadi, utai ke bedau enggau ke udah. Nuan udah ngatur semua utai nya-utai ti nyadi diatu enggau utai ti bedau nyadi. Semua atur nuan selalu nyadi magang.

⁶Nama-nama utai ti dikedeka nuan nyadi, nyadi magang. Nuan dulu nemu semua utai ti deka dikereja nuan, lalu nuan mega nemu semua pemutus penemu ti deka digaga nuan.

⁷Kediatu, bansa Asiria kering ari ke udah; sida temegahka bala soldadu sida. Sida bepangai ba senyata sida tang sida enda nemu nuan meh Tuhan ti madamka perang. Tuhan meh nama Nuan.

⁸Ulih pengeringat nuan, kena meh kuasa nuan ngerusak pengering soldadu sida. Sida berunding deka ngamahka Rumah Sembiang endur nuan disembah. Sida mega deka ngerusak sukut alta nuan ngena pedang.

⁹Peda meh penyumbung sida! Tunjukka pengeringat nuan ngagai sida! Aku tu semina indu balu, tang beri meh aku pengering kena ngereja utai ti deka dikereja aku.

¹⁰Kena meh jaku tipu aku munuh semua sida, enda ngira tuan tauka ulun. Awakka pengering siku orang indu ngemalu sida.

¹¹Kuasa nuan enda bepanggai ba pemesai enggau pengering soldadu. Nuan meh Allah Taala ke nulung orang ti baruh ati, lalu orang ke kena tekan. Nuan nyukung lalu ngibun orang ke lemi sereta nadai daya. Nuan nyelamatka sida ti nadai pengandal.

¹²Diatu dingaka sembiang aku O Allah Taala aki aku Simeon, Allah Taala ti dikarapka orang Israel, raja serega enggau dunya, pengaga semua sungai enggau semua tasik, raja semua utai. Dingaka sembiang aku

¹³ lalu asuh jaku tipu aku ngenelih lalu munuh sida ke deka ngerusak sempekat nuan enggau Rumah Sembiang nuan ti kudus, lalu ngelaban Bukit Sion enggau menua ti diberi nuan ke nembiak nuan.

¹⁴Awakka semua raban orang Israel ngelala nuan Allah Taala ti pemadu bekuasa lalu semina nuan siku aja ti ngibun bansa Israel!”