Read Iban Ester 2 Bible Online

Ester 2 - Iban bible

Ester 2

¹Udah bekau nya, lebuh Raja Serses nyau enda agi ringat, iya ingatka Basti, enggau utai ti udah dikereja Basti enggau adat ti udah digaga kena ngelaban iya.

²Udah nya sekeda bala penyanding penemu raja bejaku enggau raja, “Awakka orang ngiga indu ke dara bungas ke Raja.

³Lalu awakka nuan ngasuh bala pemesai dalam genap sitak menua ti dipegai nuan, mai semua indu ke bajik, ti agi dara bungas, ngagai rumah alai nuan ke nyimpan semua indu simpan nuan di Susa. Asuh Hegai, lelaki ti udah dipeliri, ke ngemataka semua indu nuan, ngintu sida ngambika gamal sida bajik.

⁴Lalu awakka indu ke pemadu ngerinduka ati nuan nganti Basti nyadi kuin.” Raja rinduka penemu nya, lalu iya nitihka penemu nya.

⁵Nyadi di Sisa bisi siku orang Judah ke benama Mordikai anak Jair, uchu Semei, uchu Kis ari raban bansa Benjamin.

⁶ Nyadi Kis udah ditabanka Raja Nebukadnesar menua Babilon nyadi orang tangkap ari nengeri Jerusalem sama enggau Raja Jehoiakin menua Judah ari Jerusalem, sama enggau orang tangkap ti bukai.

⁷Mordikai bisi siku petunggal, ke benama Ester. Nama Hebrew Ester nya Hadasah. Iya indu ke bajik, sereta manah raras tubuh. Lebuh apai indai Ester mati, Mordikai ngiru iya nyadika anak.

⁸Lebuh raja udah meri atur tu, lalu mayuh indu ke agi biak dibai ngagai Susa, Ester bisi enggau sida. Iya mega diasuh diau di istana, diintu Hegai, ke ngintu semua indu simpan raja.

⁹Hegai gaga ati meda Ester, lalu beguai belabuh ngereja pengawa ngemajikka Ester ngena pengawa urut enggau pemakai. Iya meri Ester endur ti pemadu manah alai diau dalam rumah indu simpan raja, lalu ngeletak tujuh iku indu ke biak ke endang dipilih ari istana raja, ngintu Ester.

¹⁰Ester enda madahka bansa diri, laban Mordikai udah bejaku nagang iya madahka bansa diri ngagai orang.

¹¹Tiap hari Mordikai bejalai ba tengah laman rumah alai indu simpan raja diau, keran deka nemu pasal Ester enggau namaka penyadi iya.

¹²Pengawa ngemajikka indu dikereja setaun: 6 bulan diurut ngena minyak mur, lalu 6 bulan udah bekau nya diurut ngena minyak balsam. Udah nya, siku-siku indu nya dibai ngagai Raja Serses.

¹³Lebuh Ester bejalai ari rumah alai indu simpan raja diau, mansang ngagai istana, iya diberi sebarang gari ti dikedekaka iya.

¹⁴Iya selalu kin lebuh lemai hari, lalu pagi hari siti iya dibai ngagai sebuah rumah bukai ti alai bala indu simpan raja diau, lalu diintu Sasgas, orang siku ti udah dipeliri lalu diasuh ngintu indu simpan raja. Ester enda betemu enggau raja baru, enti raja enda chukup rinduka iya lalu minta iya datai.

¹⁵Nyadi maya pen nyau datai alai Ester patut betemu enggau raja. Ester tu anak indu Abihail, lalu iya mega petunggal Mordikai, ti udah ngiru iya nyadika anak. Ester dipuji semua orang ke meda iya. Lebuh gintir iya datai, iya ngena gari ti diletak Hegai ke ngintu bala indu simpan raja.

¹⁶Nya alai, dalam bulan ti kesepuluh, iya nya bulan Tebet, dalam taun ti ketujuh Serses nyadi raja, Ester lalu dibai betemu enggau Raja Serses di istana.

¹⁷Raja rindu sereta sayauka Ester lebih ari semua indu bukai. Raja lalu ngengkahka makota diraja ba pala Ester, lalu nyiri iya nyadi Kuin nganti Basti.

¹⁸Udah nya raja nyendiaka pengerami makai besai kena iya masa Ester, lalu ngambi semua bala pemesai iya enggau orang ke bekereja perintah ngabang ngagai pengerami nya. Iya ngeletak hari nya nyadika hari besai [1] ke semua menua ti dipegai raja, lalu nyadung mayuh pemeri ti manah ngagai orang mayuh.

¹⁹Sekumbang utai tu benung nyadi, Mordikai udah diberi raja pangkat nyadi pemesai perintah.

²⁰Nyadi Ester apin madahka diri indu orang Judah laban Mordikai enda ngasuh iya madahka nya ngagai orang, lalu Ester ngasika iya baka iya ti udah ngasika Mordikai lebuh iya agi mit.

²¹Lebuh Mordikai bekereja di istana, Biktana seduai Teres, dua iku lelaki ti udah dipeliri, ke nyaga pintu bilik raja, begedika Raja Serses, lalu bepekat deka munuh iya.

²²Mordikai nemu pasal pekara nya, lalu iya madahka ngagai Kuin Ester. Ester lalu madahka ngagai raja utai ti udah ditemu Mordikai.

²³Pekara nya lalu dipansik, lalu ditemu amat. Nya alai orang dua iku nya diukum gantung. Raja ngasuh cherita pasal pekara tu ditulis dalam cherita pasal perintah menua.