Read Iban Ester 3 Bible Online

Ester 3 - Iban bible

Ester 3

¹Apin tentu lama udah bekau nya, Raja Serses nikika pangkat orang siku ke benama Haman, ngasuh iya nyadi perdana menteri. Haman nya anak Hamedata, ari peturun Agak. [2]

²Raja lalu meri atur ngasuh semua bala pemesai ke bekereja ke iya, besugang lalu meremi di mua Haman, kena sida mandangka diri bebasaka Haman. Semua sida besugang sereta meremi magang, kelimpah ari Mordikai.

³Bala pemesai ti bukai, ke bekereja ke raja, nanyaka kebuah iya enda ngasika atur raja.

⁴Tiap hari sida ngasuh Mordikai nitihka atur nya, tang iya enggai mendingka sida. Ku iya nerangka diri, “Aku tu orang Judah. Aku enda tau meremi ngagai mensia.” Sida lalu madahka pekara nya ngagai Haman laban sida keran deka nemu utai ti deka dikereja Haman ngagai Mordikai.

⁵Haman pedis ati lebuh iya nemu Mordikai enggai besugang lalu meremi di mua iya.

⁶Lebuh iya nemu Mordikai nya orang Judah, iya lalu mutuska runding deka ngereja lebih ari semina ngukum Mordikai siku aja. Iya bekira deka munuh semua orang Judah di serata menua ti dipegai raja besai menua Persia.

⁷Dalam bulan ti kesatu, iya nya bulan Nisan, kedua belas taun Raja Serses megai perintah, Haman meri atur ngasuh undi dichabut (dikumbai “purim”) kena nemu hari enggau bulan ti ngena alai iya bejalaika akal iya. Hari ti dipilih iya nya tiga belas hari bulan ti kedua belas, iya nya bulan Adar.

⁸ Haman lalu madahka ngagai raja, “Tuan Raja, di menua ti dipegai nuan tu bisi siti bansa ti diau ngachir ba semua sitak menua. Sida tu nitihka adat asal ti enda sebaka enggau adat asal orang bansa bukai. Nambahka nya, sida enda ngasika adat menua ti dipegai nuan. Nya alai nuan enda tau nejuka sida tu enda diukum.

⁹Enti Tuan Raja besetuju, awakka Tuan Raja ngaga siti adat ngasuh sida dibunuh. Enti nuan meri adat nya, aku tetap ulih nyimpan 375 tan pirak ngagai sarang reta raja kena bejalaika pengawa perintah di menua tu.”

¹⁰Raja lalu merurutka tinchin ti dikena ngechop surat atur perintah, lalu meri tinchin nya ngagai munsuh besai orang Judah, iya nya Haman anak Hamedata, ke peturun Agak.

¹¹Ku raja bejaku enggau iya, “Sida nya, sereta enggau duit sida, endang enggi nuan. Kereja aja sebarang utai ti deka dikereja nuan ba sida.”

¹²Nya alai, kena tiga belas hari bulan ti kesatu Haman mesanka bala kerani raja, lalu ngasuh sida nulis surat, ti enda tau enda disalin ngagai semua jaku bansa ti dikena dalam menua siti-siti, lalu ngirumka surat nya ngagai semua pemerintah, tuan gabenor, enggau bala pemesai perintah. Surat nya ditulis dalam nama Raja Serses, lalu dichop ngena tinchin raja empu.

¹³Orang lalu nganjung surat nya ngagai semua sitak menua ti dipegai raja. Surat nya meri atur, dalam sehari aja, iya nya kena tiga belas hari bulan Adar, semua orang Judah ke biak enggau ke tuai, indu enggau anak mit, enda tau enda dibunuh. Sida enda tau dikesinuka, tang dibunuh, lalu semua reta tengkira sida dirampas magang.

¹⁴Utai ti disebut dalam surat nya enda tau enda dipadahka ngagai orang mayuh di semua sitak menua, ngambika semua orang sedia magang lebuh hari nya.

¹⁵Nitihka atur raja, adat nya lalu dipadahka ngagai orang mayuh ba indu nengeri Susa, lalu orang mai berita nya ngagai semua sitak menua. Raja enggau Haman duduk lalu ngirup, tang orang di nengeri Susa begau lebuh sida ninga berita nya.