Read Iban Ester 5 Bible Online

Ester 5 - Iban bible

Ester 5

¹Ba hari ti ketiga iya bepasa, Ester ngerasukka gari diraja iya, mansang lalu bediri ba tengah laman istana, nunga ngagai bilik kerusi diraja. Raja bisi di dalam, duduk ba kerusi diraja, nunga ngagai mua pintu.

²Lebuh raja meda Kuin Ester bediri di luar, iya gaga meda iya, lalu iya ngedarka tungkat emas ngagai Ester. Udah nya Ester niki, lalu negu puting tungkat nya.

³“Nama utai, Kuin Ester?” ku raja nanya. “Padahka ngagai aku utai ti dipinta nuan, lalu nuan deka nerima utai nya. Indah setengah ari menua ti dipegai aku deh deka aku meri ngagai nuan.”

⁴Ku Ester nyaut, “Enti Tuan Raja deka, aku minta nuan enggau Haman ngabang ngagai pengerami makai besai ti disediaka aku ke nuan.”

⁵Udah nya raja lalu mesanka Haman datai enggau jampat, ngambika seduai iya tau ngabang ngagai Ester. Nya alai raja seduai Haman datai ngagai pengerami makai besai ti disediaka Ester.

⁶Lebuh sida benung ngirup wain, raja lalu nanya Ester, “Padahka ngagai aku utai ti dipinta nuan, lalu nuan deka nerima utai nya. Aku deka meri ngagai nuan utai ti dipinta nuan. Enti sema nuan minta setengah ari menua ti dipegai aku, nya pen deka meh aku meri ngagai nuan.”

⁷Ku Ester nyaut,

⁸“Enti Tuan Raja lantang ati enggau aku lalu deka meri utai ti dipinta aku, aku minta nuan enggau Haman nyadi pengabang aku baru ba siti agi pengerami makai besai ti deka disediaka aku ke nuan pagila. Dia ila baru aku madahka utai ti dipinta aku.”

⁹Lebuh Haman pulai ari pengerami nya, iya berupai lantang sereta gaga. Tang lebuh iya tepedaka Mordikai ba pintu penama ngagai istana, lalu meda Mordikai enda bediri, tauka ngayanka diri masa Haman lebuh Haman mansa, Haman lalu pedis ati ngagai Mordikai.

¹⁰Tang iya nagang ati diri ti pedis lalu pulai ke rumah. Udah nya iya mesanka pangan iya ngagai rumah iya, lalu minta bini iya Seres begempuru enggau sida.

¹¹Haman lalu temegah madahka diri kaya, madahka pemayuh anak lelaki iya, madahka raja udah nikika pangkat iya, sereta madahka raja begunaka iya lebih ari pemesai bukai.

¹²“Nambahka nya,” ku Haman nampung jaku iya, “Kuin Ester udah nyendiaka pengerami makai besai, ukai ke orang bukai, tang ke kami duai raja, lalu kami duai ngabang baru pagila.

¹³Tang semua utai tu nadai reti ba aku seagi-agi aku meda orang Judah ke benama Mordikai nya duduk ba mua pintu istana.”

¹⁴Bini iya enggau semua pangan iya lalu meri iya penemu, “Nama kebuah nuan enda ngasuh orang ngaga siti palan alai ngantung orang, peninggi dua puluh dua meter? Tumu pagila nuan tau minta raja ngemendarka Mordikai diukum gantung ba endur nya. Nya baru nuan deka gaga ati mansang ngagai pengerami makai besai nya. Haman gaga ninga penemu nya, nya alai iya lalu ngasuh orang ngaga palan nya.