Read Iban Ester 6 Bible Online

Ester 6 - Iban bible

Ester 6

¹Malam nya raja enda ulih tinduk, lalu iya ngasuh orang mai sereta macha ngagai iya cherita pasal perintah menua nya.

² Bagi ti dibacha sida nya madahka pasal Mordikai ke tetemuka orang ke bepekat deka munuh raja, iya nya Biktana seduai Tares, dua iku lelaki ti udah dipeliri, ke bekereja nyaga bilik raja.

³Raja lalu nanya, “Kati Mordikai bisi udah diberi basa ketegal utai tu?” Ku orang gaji iya nyaut, “Nadai.”

⁴“Kati bala pemesai bisi dalam istana diatu?” ku raja nanya. Nyadi Haman baru udah tama ngagai tengah laman. Iya datai laban iya deka minta raja ngemendarka Mordikai diukum gantung ba endur ti udah disediaka.

⁵Bala orang gaji lalu nyaut, “Haman bisi ditu. Iya deka betemu enggau nuan.” “Asuh iya tama,” ku raja bejaku.

⁶Haman lalu tama, lalu ku raja bejaku enggau iya, “Aku deka meri basa ngagai orang siku. Nama utai ti patut dikereja aku ke orang nya?” Haman lalu berunding dalam ati diri, “Sapa orang ke deka dibasa raja? Nadai patut orang bukai kelimpah ari aku.”

⁷Nya alai ku iya nyaut raja, “Asuh orang mai baju panjai diraja ngagai orang nya, baju panjai ti dikena nuan empu. Asuh orang ngengkahka pengias diraja [3] ba kuda nuan.

⁹Udah nya asuh siku orang ke ari peturun orang ke tinggi pangkat ngerasukka pekayan nya ba orang nya, ngasuh iya nepan kuda, lalu nguluka iya nengah padang nengeri. Asuh orang ke tinggi pangkat nya nyada, lebuh sida bejalai, “Peda jalai raja bebasaka orang ke dibasa iya!”

¹⁰Udah nya raja lalu bejaku enggau Haman, “Jampat ambi baju panjai enggau kuda, lalu beri basa ngagai orang Judah ke benama Mordikai. Kereja ngagai iya semua utai ti udah disebut nuan. Nuan deka nemu iya duduk ba mua pintu istana.”

¹¹Haman lalu ngambi baju panjai enggau kuda, lalu ngerasukka baju panjai nya ba Mordikai. Mordikai lalu nepan kuda nya. Haman lalu nguluka iya nengah padang nengeri, nyada ngagai orang mayuh lebuh seduai iya bejalai, “Peda jalai raja bebasaka orang ke dibasa iya!”

¹²Udah nya Mordikai pulai baru ngagai mua pintu istana, lalu Haman beguai-guai pulai, ngelalaika mua diri ke malu.

¹³Iya lalu madahka ngagai bini iya enggau ngagai semua pangan iya pasal semua utai ti udah nyadi ba iya. Udah nya bini iya enggau pangan iya ti bepenemu-dalam nya lalu madahka ngagai iya, “Mordikai diatu baru deka ngerampas kuasa ari nuan. Iya orang Judah, lalu nuan enda ulih ngalahka iya. Iya tetap deka ngalahka nuan.”

¹⁴Lebuh sida agi benung bejaku, lelaki ti udah dipeliri lalu beguai-guai datai ari istana, ngambi Haman ngabang ngagai pengerami makai besai ti udah disediaka Ester.