Read Iban Ester 7 Bible Online

Ester 7 - Iban bible

Ester 7

¹Raja enggau Haman lalu mansang makai enggau Ester

²kedua kali. Lebuh sida benung ngirup wain, raja lalu nanya Ester baru, “Kuin Ester, nama utai ti dipinta nuan? Padahka ngagai aku, lalu nuan deka nerima utai nya. Indah setengah ari menua ti dipegai aku deh deka aku beri ngagai nuan.”

³Ku Kuin Ester nyaut, “Enti Tuan Raja deka meri utai ti dipinta aku, aku minta aku empu enggau orang ari bansa aku meruan idup.

⁴Aku enggau bansa aku udah dijual ngambika kami dibunuh. Enti pekara tu semina pasal kami ke dijual nyadi ulun, aku tentu enda bemunyi lalu enda ngiruh nuan, tang kami tu baru deka dibunuh abis lengis!”

⁵Raja Serses lalu nanya Kuin Ester, “Sapa orang ke berani ngereja utai baka nya? Dini alai orang nya?”

⁶Ester lalu nyaut, “Munsuh kami, ke merinsaka kami nya orang ke jai. Nama iya Haman!” Haman lalu merening ngagai raja enggau ngagai kuin, enggau mua ti pemadu takut.

⁷Raja lalu angkat, balat amat ringat, pansut ari bilik nya ngagai kebun istana. Haman nemu raja endang keras deka munuh iya. Nya alai iya mengkang di istana, minta Ester nulung iya ngambika iya enda dibunuh.

⁸Lebuh raja pulai ari kebun ngagai bilik nya baru, Haman baru udah nyungkurka diri ba kerusi Ester, minta kasih ari iya. Lebuh raja meda nya, iya lalu merak bejaku, “Kati orang tu masung kuin di mua aku empu, dalam istana aku empu?” Lebuh raja baru udah nyebut jaku nya, bala lelaki ti udah dipeliri ke gawa dalam istana nya lalu mampul mua Haman.

⁹Udah nya siku ari bala sida ke benama Harborah lalu bejaku, “Haman udah ngaga endur alai ngantung orang, alai iya deka ngantung Mordikai ti udah ngidupka nyawa raja. Peninggi palan gantung nya dua puluh dua meter!” Raja lalu bejaku enggau sida, “Gantung Haman ba endur nya!”

¹⁰Nya alai Haman digantung ba endur ti udah digaga iya empu ke Mordikai. Nya baru raja badu agi ringat.