Read Iban Ester 8 Bible Online

Ester 8 - Iban bible

Ester 8

¹Sehari nya Raja Serses meri semua reta tengkira Haman, ti udah nyadi munsuh orang Judah, ngagai Kuin Ester. Ester bejaku enggau raja madahka diri kaban belayan Mordikai. Belabuh ari nya Mordikai dikemendarka betemu enggau raja.

²Raja lalu merurutka tinchin chop iya (ti udah diambi iya pulai baru ari Haman) lalu meri tinchin nya ngagai Mordikai. Ester lalu ngasuh Mordikai ngemataka reta tengkira Haman.

³Udah nya Ester bejaku baru ngagai raja, nyungkurka diri semak kaki raja, nyabak. Iya minta raja madamka akal ti jai ti udah digaga Haman, ke ari peturun Agak [4] kena Haman ngelaban orang Judah.

⁴Raja lalu ngedarka tungkat emas ngagai Ester. Ester bediri, lalu bejaku,

⁵“Enti Tuan Raja deka, lalu enti nuan sayauka aku, lalu enti utai tu ngena ba ati nuan, aku minta nuan meri atur nagang orang bejalaika atur ti udah diberi Haman anak Hamedata, ke peturun Agak, ti udah ngeletak semua orang Judah di menua tu dibunuh magang.

⁶Baka ni ku aku ulih natka ati diri enti penusah ti besai tu ninggang bansa aku, lalu kaban belayan aku empu kena bunuh?”

⁷Raja Serses lalu bejaku enggau Kuin Ester seduai Mordikai, ti bansa orang Judah, “Aku udah ngantung Haman ketegal pekat iya ngelaban orang Judah, lalu aku udah meri ngagai Ester semua reta tengkira Haman.

⁸Tang atur ti dikeluarka dalam nama raja, lalu dichop ngena chop diraja, enda ulih diubah. Tang seduai tau nulis ngagai orang Judah sebarang utai ti dikedekaka seduai, lalu seduai tau nulis surat nya dalam nama aku, lalu nambit surat nya ngena chop diraja.”

⁹Utai tu nyadi kena dua puluh tiga hari bulan ti ketiga, iya nya bulan Siban. Mordikai mesanka bala kerani raja, lalu ngasuh sida nulis surat ngena leka jaku ti disebut iya ngagai orang Judah enggau ngagai bala tuan gabenor, bala orang ke bekereja perintah, enggau bala pemesai dalam semua 127 sitak menua kenyau ari India nyentuk ngagai Etiopia. Surat nya ditulis ngagai siti-siti sitak menua ngena jaku enggau chara tulis ti dikena dalam sitak menua nya empu, enggau ngagai orang Judah ngena jaku enggau chara orang Judah nulis surat.

¹⁰Mordikai ngasuh surat nya ditulis dalam nama Raja Serses, lalu nambit surat nya ngena chop diraja. Surat nya lalu dianjung bala orang ke nepan kuda, ngena kuda ti laju, ti diambi ari raban kuda raja.

¹¹Surat nya nerangka pasal raja ke ngemendarka orang Judah dalam semua nengeri, begempuru lalu nyaga nyawa diri. Enti orang ke besenyata datai ari sebarang macham bansa, dalam sebarang sitak menua, lalu nyerang orang Judah ti lelaki, bala anak sida, tauka bala indu sida, orang Judah tau ngelaban, lalu munuh orang nya. Sida tau munuh orang nya abis lengis, lalu ngerampas reta tengkira sida.

¹²Atur tu dipejalaika di serata menua ti dipegai raja besai menua Persia, ba hari ti udah diletak alai orang Judah deka dibunuh, iya nya kena tiga belas hari bulan Adar, iya nya bulan ti kedua Belas.

¹³Atur tu deka digaga nyadika adat, lalu deka dipadahka ngagai semua mensia dalam semua sitak menua, ngambika orang Judah sedia ngelaban munsuh sida lebuh hari nya.

¹⁴Nitihka atur raja, bala orang ke nepan kuda lalu mupuk enggau naka pengelaju. Atur nya mega dipadahka ngagai orang mayuh di Susa, indu nengeri menua nya.

¹⁵Mordikai ninggalka istana, ngena baju panjai diraja, ti bechura biru enggau burak, baju luar ti digaga ari kain linin ti alus, ti bechura ungu, enggau siti makota emas ti manah. Udah nya orang di sebelah jalai raya nengeri Susa lalu manjung gaga ati.

¹⁶Orang Judah gaga ati, nadai agi pengirau, lantang sereta nemu diri deka menang.

¹⁷Ba genap buah nengeri dalam semua sitak menua, lebuh atur raja nya dibacha, orang Judah lalu ngaga hari nya nyadika hari besai alai sida ngaga pengerami makai besai enggau ati ti lantang. Mayuh orang ari bansa bukai masuk nyadi bansa orang Judah, laban sida diatu nyau takutka orang Judah.