Read Iban Pemansut 1 Bible Online

Pemansut 1 - Iban bible

Pemansut 1

¹ Bala anak lelaki Jakop ke mansang enggau iya ngagai menua Ejip, endang mai semua sida sebilik. Tu nama bala anak Jakop:

²Reuben, Simeon, Lewi, Judah,

³Isakar, Sebulun, Benjamin,

⁴Dan, Naptali, Gat, enggau Aser.

⁵Pemayuh tubuh sida, ke diturunka Jakop empu, nya tujuh puluh iku.[1] Anak iya Josep endang udah di menua Ejip.

⁶Nyau ke lama udah bekau nya, Josep, bala menyadi iya, enggau semua orang ke dalam serak nya, mati magang,

⁷ tang peturun sida, iya nya bansa orang Israel, ngadaka mayuh anak, ke ngasuh sida mayuh amat tubuh datai ke menua Ejip nyau penuh laban sida.

⁸ Udah nya, siku raja ti baru, ti enda ngelala Josep, belabuh megai perintah di menua Ejip.

⁹Ku iya bejaku enggau bala nembiak iya, “Orang Israel tu nyau mayuh agi sereta kering agi ari kitai.

¹⁰ Enti perang bisi nyadi, kada enda sida deka ngalih ari munsuh ngelaban kitai, lalu rari ari [2] menua tu. Kitai enda tau enda ngiga jalai kena nagang sida nambah mayuh tubuh.”

¹¹Nya alai orang Ejip lalu ngasuh orang nyadi mandur megai sida, ngambika bisi mejalka sida ngereja pengawa ti berat, kena merinsaka orang Israel. Orang Israel ngaga nengeri Pitom enggau nengeri Rameses nyadika pusat alai mansutka utai ti diguna raja.

¹²Tang, makin balat agi orang Ejip merinsaka orang Israel, makin mayuh agi ga tubuh sida nambah-menambah, lalu jauh agi ga sida ngachir ba sebelah menua nya. Orang Ejip nyau takutka sida

¹³lalu ngaga sida nyadi ulun, kena merinsaka sida. Sida mejalka orang Israel bekereja begagaka rumah, enggau bekereja ba umai, lalu enda sinu mimit ke sida.

¹⁵Udah nya raja menua Ejip lalu bejaku ngagai Siprah seduai Puah, iya nya dua iku indu bidan ke ngintu indu orang Hebrew lebuh sida beranak.

¹⁶Ku raja nya bejaku, “Lebuh seduai nyaup indu orang Hebrew beranak, bunuh anak mit nya enti iya lelaki. Tang enti iya indu, anang munuh iya.”

¹⁷Tang bidan dua iku nya orang ke nangika Allah Taala. Nya alai seduai iya enggai nitihka jaku raja, tang nejuka anak ti lelaki idup.

¹⁸Nya alai raja mesanka seduai iya, lalu nanya ngagai seduai iya, “Nama kebuah seduai ngereja tu? Nama kebuah seduai nejuka anak ti lelaki idup?”

¹⁹Ku seduai iya nyaut, “Indu orang Hebrew enda baka indu orang Ejip. Sida mudah amat beranak, lalu anak sida ada sebedau kami duai datai.”

²⁰Laban indu bidan nya orang ke nangika Allah Taala, nya alai Allah Taala manah enggau seduai iya, lalu meri seduai iya ruang bilik ke diri empu. Nya alai pemayuh tubuh orang Israel majak nambah-menambah, lalu nyadi bansa ti kering.

²² Ke pengujung iya, raja nya lalu meri atur ngagai semua nembiak iya munyi tu: “Ambi semua anak lelaki orang Hebrew ke baru ada, lalu buai sida ngagai Sungai Nile, tang awakka semua anak ti indu idup.”