Read Iban Pemansut 10 Bible Online

Pemansut 10 - Iban bible

Pemansut 10

¹Udah nya TUHAN bejaku ngagai Moses, “Alai nuan mansang ngagai raja; laban Aku udah ngasuh ati iya, enggau ati bala pemesai iya kieh, ngambika Aku ulih ngereja kereja ajih ba bala sida,

²sereta ngambika kita ulih madahka ngagai anak uchu kita chara Aku ngemelika orang Ejip, enggau kereja ajih ti dikereja Aku ngagai orang Ejip; ngambika kita nemu Aku tu endang TUHAN.”

³Moses seduai Aron lalu mansang ngagai raja, lalu bejaku enggau iya, “Tu jaku TUHAN Allah Taala orang Hebrew, ‘Ni pengelama nuan enggai nunduk ngagai Aku? Lepaska nembiak Aku, ngambika sida ulih nyembah Aku.

⁴Laban enti nuan enggai ngelepaska nembiak Aku, Aku deka ngasuh buntak nyerang menua nuan pagila.

⁵Buntak nya deka ngelamun semua tanah, datai ke orang nyau enda ulih meda tanah. Sida deka makai semua utai ti enda dirusak ujan batu, nyengkaum semua kayu ti tumbuh ba tanah kita.

⁶Sida deka ngemenuhka istana nuan, rumah bala pemesai nuan, enggau rumah semua orang Ejip, baka ke nadai udah kala dipeda apai enggau aki ini kita, kenyau ari maya sida datai di dunya tu, nyentuk ngagai sehari tu.’ ” Iya nguing lalu beserara ari raja.

⁷Bala pemesai lalu bejaku enggau raja, “Ni pengelama orang tu agi ngenusahka kitai? Lepaska orang tu, ngambika sida ulih nyembah TUHAN Allah Taala sida. Kati nuan lalu enda nemu menua Ejip udah rusak?”

⁸Nya alai Moses seduai Aron lalu dibai betemu baru enggau raja, lalu ku iya bejaku enggau seduai iya, “Mupuk kita lalu sembah TUHAN Allah Taala kita. Tang sapa ke mupuk?”

⁹Disaut Moses, “Semua kami deka mupuk magang, nyengkaum anak mit, enggau orang ke tuai. Kami deka mai anak lelaki enggau anak indu kami, jelu bedus enggau kambin kami, jelu sapi kami, laban kami enda tau enda begawai ngemesaika TUHAN.”

¹⁰Ku raja bejaku, “Aku besumpah di mua TUHAN, aku enggai sekali-kali nejuka kita mai orang ke indu enggau anak mit kita! Kita tu bisi tuju ati ti jai dalam ati kita.

¹¹Sigi enda tau! Semina orang ke lelaki aja tau mupuk lalu nyembah TUHAN, laban nya utai ti dikedekaka kita.” Moses seduai Aron lalu diburu ari istana raja.

¹²Udah nya TUHAN lalu bejaku ngagai Moses, “Kedarka jari nuan atas menua Ejip, ngambika buntak datai lalu makai semua utai ti ditanam ti enda dirusak ujan batu.”

¹³Moses lalu ngedarka tungkat iya. TUHAN lalu ngasuh ribut muput ari timur ngagai menua Ejip, sehari-hari, semalam-malam nya. Pagi hari siti, buntak endang udah datai dibai ribut ti muput ari timur.

¹⁴ Buntak nya datai beraban-raban, lalu inggap di serata menua Ejip. Nadai orang udah kala meda buntak ngemayuh nya kelia, tauka udah lepas nya.

¹⁵Sida nyau chelum ngelamun tanah, empa pemayuh sida, lalu sida makai semua utai ti enda dirusak ujan batu, nyengkaum semua buah ti ba kayu. Nadai siti utai ti tumbuh bisi tinggal ba kayu tauka ba utai ti ditanam di serata menua Ejip.

¹⁶Udah nya raja lalu beguai-guai mesanka Moses seduai Aron, lalu bejaku, “Aku udah bedosa ngelaban TUHAN Allah Taala kita, enggau ngelaban kita.

¹⁷Nya alai ampun penyalah aku sekali tu, lalu besampi ngagai TUHAN Allah Taala kita, minta Iya muai ukum ti tau munuh tu, ari aku.”

¹⁸Moses angkat ninggalka raja, lalu besampi ngagai TUHAN.

¹⁹TUHAN lalu nukar ribut ti muput ari timur nyadi ribut ti balat muput ari barat. Ribut nya lalu ngebuka buntak ngagai Tasik Mirah.[16] Siku pen nadai meh buntak nya agi tinggal di serata menua Ejip.

²⁰Tang TUHAN ngasuh ati raja kieh lalu iya enggai ngelepaska orang Israel.

²¹Udah nya TUHAN bejaku ngagai Moses, “Kedarka jari nuan ke langit, ngambika pemetang ti enda dipeda achuk mata mungkur menua Ejip.”

²² Moses ngedarka jari iya ke langit, lalu pemetang ti enda dipeda achuk mata mungkur semua menua Ejip tiga hari.

²³Orang Ejip enda ulih meda pangan diri, lalu nadai orang mindah ari rumah lebuh maya nya. Tang ba endur alai orang Israel diau, menua nya tampak.

²⁴Raja mesanka Moses, lalu bejaku, “Mupuk kita lalu sembah TUHAN. Sida ke indu enggau anak mit kita, pen tau mega mupuk sama enggau kita. Tang jelu bedus, kambin enggau jelu sapi kita enda tau enda tinggal.”

²⁵Tang ku Moses, “Nuan enda tau enda mega meri kami jelu nyadika piring enggau piring tunu ngambika bisi dienjuk kami ngagai TUHAN Allah Taala kami.

²⁶Jelu sapi kami mega enda tau enda mupuk enggau kami. Siku pen nadai meh sida tau tinggal, laban kami enda tau enda milih jelu ti dikena kami nyembah TUHAN Allah Taala kami, lalu kami enda nemu nama utai ti deka dikena kami nyembah TUHAN sebedau kami datai din.”

²⁷Tang TUHAN ngasuh ati raja kieh, lalu iya enggai ngelepaska sida.

²⁸Ku raja bejaku enggau Moses, “Pansut nuan ari tu! Aku enggai meda nuan agi! Enti aku meda nuan ila, nuan mati!”

²⁹Moses lalu nyaut, “Munyi ti ku nuan. Nuan nadai agi meda aku ila.”