Read Iban Pemansut 11 Bible Online

Pemansut 11 - Iban bible

Pemansut 11

¹Udah nya TUHAN lalu bejaku ngagai Moses, “Aku deka ngasuh siti agi penusah ti besai ninggang raja enggau orang Ejip. Udah bekau nya, iya deka ngasuh kita mupuk. Lebuh iya ngasuh kita mupuk, iya deka muru kita pansut ari menua tu.

²Nya alai, bejaku nuan ngagai orang Israel, lalu asuh sida minta perengka emas enggau perengka pirak ari orang ke berimbai pendiau enggau sida.”

³TUHAN lalu ngasuh orang Ejip rinduka orang Israel. Nambahka nya, Moses endang balat dibasa orang di menua Ejip, dibasa bala pemesai raja, enggau semua orang Ejip.

⁴Udah nya Moses lalu bejaku enggau raja, “Tu jaku TUHAN, ‘Ba urung tengah malam, Aku deka bejalai nengah serata menua Ejip,

⁵lalu semua anak tuai ti lelaki dalam menua Ejip deka mati magang, belabuh ari anak tuai raja, ti deka nganti iya nyadi raja, nyentuk ngagai anak lelaki indu ke ulun ke ngisar gandum, enggau anak tuai semua jelu tupi.

⁶Orang deka beterauh nyabak di serata menua Ejip, baka ke nadai udah kala nyadi kelia, tauka ila.

⁷Tang ba orang Israel, indah ukui deh enda nyalak sida tauka nyalak jelu sida. Nya baru nuan deka nemu Aku ti TUHAN, ngaga bida entara orang Ejip enggau orang Israel.’ ”

⁸Ku Moses bejaku, “Nya baru semua bala pemesai nuan deka datai ngagai aku, lalu meremi di mua aku, lalu bejaku, ‘Pansut ari tu, enggau semua orang ke nitihka nuan.’ Udah nya baru aku mupuk.” Moses lalu ninggalka raja, mai ati ti balat ringat.

⁹Udah nya TUHAN bejaku ngagai Moses, “Raja enggai mendingka nuan, ngambika Aku ulih ngereja mayuh agi kereja ajih di menua Ejip.”

¹⁰Moses seduai Aron ngereja semua kereja ajih nya di mua raja, tang TUHAN ngasuh ati raja kieh, lalu iya enggai ngelakka orang Israel angkat ari menua nya.