Read Iban Pemansut 14 Bible Online

Pemansut 14 - Iban bible

Pemansut 14

¹Udah nya TUHAN lalu bejaku ngagai Moses,

²“Asuh orang Israel nikal, lalu nirika kem sida di mua Pi-hahirot, entara Mikdol enggau Tasik Mirah, semak Baal-sepon.

³Raja menua Ejip deka ngumbai orang Israel bejalai segau-segau ngapa di menua nya, diempang menua puang.

⁴Aku deka ngasuh ati raja kieh, lalu iya deka begagaika kita, lalu Aku deka bulih mulia ngalahka iya enggau bala soldadu iya. Nya baru orang Ejip deka nemu Aku endang TUHAN.” Orang Israel lalu ngereja utai nitihka asuh TUHAN.

⁵Lebuh orang madahka ngagai raja menua Ejip orang Israel udah rari, iya enggau bala pemesai iya lalu ngubah runding sida. Ku sida, “Nama kebuah kitai nejuka orang Israel rari, lalu badu agi gawa ke kitai!”

⁶Raja lalu nyendiaka kerita perang iya, lalu ngasuh bala soldadu iya mega sedia.

⁷Iya lalu mupuk enggau semua kerita perang iya, nyengkaum enam ratus buah kerita perang iya ti pemadu manah, ti diuluka bala pemesai sida.

⁸TUHAN ngasuh ati raja kieh lalu begagaika orang Israel ti udah gaga ati [18] pansut ari menua Ejip.

⁹Bala soldadu orang Ejip, enggau semua kuda, kerita perang, enggau orang ke nepan kerita perang, begagaika orang Israel lalu betemu enggau sida ba endur alai orang Israel ke nirika kem ngimbai Tasik Mirah semak Pi-hahirot enggau Baal-sepon.

¹⁰Lebuh orang Israel meda raja enggau bala soldadu orang Ejip mansang ngelaban sida, sida takut lalu ngangauka TUHAN, minta Iya nyaup sida.

¹¹Ku sida bejaku enggau Moses, “Kati nuan mai kami ngagai menua puang ngambika kami mati laban menua Ejip nadai pendam? Peda nuan utai ti udah dikereja nuan, mai kami pansut ari menua Ejip!

¹²Ukai enda tu utai ti dipadahka kami ngagai nuan, ‘Anang ngachau kami, lalu lakka kami nyadi ulun orang Ejip’? Laban manah agi kami nyadi ulun din ari ke mati di menua puang tu.”

¹³Tang ku Moses bejaku ngagai orang mayuh, “Anang takut! Bediri tegap! Nya baru kita deka meda pengelepas ti deka dikereja TUHAN ti kita sehari tu. Nadai kita ulih meda orang Ejip nya agi.

¹⁴TUHAN deka beperang ngarika kita. Kita semina diau jenuh aja.”

¹⁵Ku TUHAN bejaku ngagai Moses, “Nama kebuah nuan nyabak minta saup? Asuh orang Israel bejalai.

¹⁶Angkatka tungkat nuan, lalu kedarka iya atas tasik. Ai nya deka bebagi, lalu orang Israel ulih bejalai nengah tasik nya nengah tanah ti rangkai.

¹⁷Aku deka ngasuh ati orang Ejip kieh, datai ke sida deka mansang ngagai tasik nya, begagaika sida, lalu Aku deka bulih mulia ketegal Aku menang ngelaban raja menua Ejip enggau bala soldadu iya, kerita perang iya, enggau orang ke nepan kerita perang iya.

¹⁸Lebuh Aku udah ngalahka sida, nya baru orang Ejip deka nemu Aku endang TUHAN.”

¹⁹Melikat TUHAN ti udah bejalai dulu ari bala soldadu orang Israel lalu mindah tunga kebelakang bala orang Israel. Tiang mua hari nya mega mindah lalu

²⁰nyeraraka bala orang Ejip ari bala orang Israel. Pemetang mua hari nya mungkus orang Israel, tang lebuh malam hari iya meri sida penampak. [19] Nya alai semalam-malam nya bala soldadu dua bengkah nya enda ulih datai semak ngagai pangan diri.

²¹Moses ngedarka jari iya atas tasik nya, lalu TUHAN muputka ai tasik nya ngena ribut ti deras ari timur. Ribut nya muput semalam-malam nya, lalu ngasuh tasik nya rangkai. Ai nya bebagi dua,

²² lalu orang Israel bejalai nengah tasik nya nengah tanah ti rangkai. Ai nya nyau bedinding ari sepiak-sepiak sida.

²³Orang Ejip lalu begagaika sida nengah tasik nya, mai semua kuda, kerita perang, enggau bala orang ke nepan kerita perang.

²⁴Lebuh hari nyau deka tawas, TUHAN merening ke baruh ari tiang api enggau ari gentilang remang, ngagai bala soldadu orang Ejip, lalu sida begau abis ati.[20]

²⁵TUHAN ngasuh kaki kerita perang sida lekat, ngambika kaki kerita perang sida enda tentu ulih bepusin. Ku orang Ejip bejaku, “TUHAN ti beperang ngelaban kitai ngarika orang Israel. Aram kitai rari ari tu!”

²⁶TUHAN lalu bejaku ngagai Moses, “Kedarka jari nuan atas tasik nya, ngambika ai pulai baru lalu ngelamun orang Ejip enggau kerita perang enggau orang ke nepan kerita perang.”

²⁷Moses lalu ngedarka jari iya atas tasik nya, lalu ba rerak tawas pagi nya, ai nya lalu pulai baru ngenalam iya ti dulu. Orang Ejip nguji ngerarika diri ari ai nya, tang TUHAN nikauka sida ngagai tasik nya.

²⁸Ai tasik nya pulai baru, lalu ngelamun kerita perang, orang ke nepan kerita perang, enggau semua bala soldadu orang Ejip ti udah begagaika orang Israel ngagai tasik nya. Nadai siku sida idup.

²⁹Tang orang Israel bejalai nengah tasik nya nengah tanah ti rangkai, lalu ai nyau bedinding ari sepiak-sepiak sida.

³⁰Nya alai sehari nya TUHAN nyelamatka orang Israel ari orang Ejip, lalu orang Israel meda bangkai orang Ejip nyau betegaring ba sebelah tebing tasik nya.

³¹Lebuh orang Israel meda pemesai kuasa ti dikena TUHAN ngalahka orang Ejip, sida lalu nangika TUHAN. Sida arapka TUHAN, sereta arapka nembiak Iya, Moses.