Read Iban Pemansut 15 Bible Online

Pemansut 15 - Iban bible

Pemansut 15

¹ Udah nya Moses enggau orang Israel lalu nyanyi lagu tu kena muji TUHAN: “Aku deka belagu muji TUHAN, laban Iya udah menang. Iya udah nikauka kuda enggau orang ke nepan kuda ngagai tasik.

² TUHAN endang penyaga aku ti kering ti udah ngelepaska aku. Iya Allah Taala aku, lalu aku deka muji Iya ti Allah Taala apai aku, lalu aku deka belagu ngemesaika nama Iya.

³TUHAN endang tau serang. TUHAN meh nama Iya.

⁴“Iya udah nikauka bala soldadu orang Ejip enggau kerita perang sida ngagai tasik. Bala pemesai soldadu ti berani udah lemas dalam Tasik Mirah.

⁵Tasik ti dalam udah ngelamun sida. Sida tengelam ngagai buntut tasik baka batu.

⁶“Jari kanan Nuan, TUHAN, endang bekuasa, ti ngeredakka munsuh.

⁷Nuan ngena kuasa diraja Nuan ngalahka munsuh Nuan. Pengeringat Nuan mau baka api lalu nunu sida baka jerami.

⁸Nuan nyepu ngagai tasik, lalu ai betugung tinggi. Ai bediri baka dinding. Buntut tasik nya nyadi tanah ti rangkai.

⁹Ku munsuh bejaku, ‘Aku deka ngagai lalu nangkap sida; Aku deka magi pengaya sida, lalu ngambi semua utai ti dikedekaka aku. Aku deka nyintak pedang aku, lalu ngambi semua utai ti dikemisi sida.’

¹⁰Tang Nuan semina sekali aja ngesuhka seput Nuan, TUHAN, lalu orang Ejip lemas. Sida tengelam baka bangkang ba ai ti balat begelumbang.

¹¹“TUHAN, sapa petara ti sebaka enggau Nuan? Sapa ti sebaka enggau Nuan, ti pemadu bemulia sereta kudus? Sapa ti ulih ngereja kereja ajih, enggau kereja ti nyelai baka ke dikereja Nuan?

¹²Nuan ngedarka jari kanan Nuan, lalu tanah nelan bala munsuh kami.

¹³Nuan ingatka semaya Nuan, lalu udah nguluka orang Israel ti udah dilepaska Nuan. Ngena pengering Nuan, Nuan udah ngiring sida ngagai menua Nuan ti kudus.

¹⁴Semua bansa udah ninga berita tu, lalu sida getar-getar takut; Orang Pilistin balat takut.

¹⁵Bala tuai orang Edom takut. Orang ke kering di Moap nyau getar-getar takut. Orang Kanaan nyau enda berani agi.

¹⁶Sida balat takut sereta buyan. Sida meda pengering Nuan, O TUHAN, lalu sida tegir-tegir bediri nadai daya, laban takut datai ke bala nembiak Nuan udah mansa, iya nya orang ke udah dilepaska Nuan ari pengidup sida ke nyadi ulun.

¹⁷Nuan mai sida tama, lalu nanam sida ba bukit Nuan, ba endur ti udah dipilih Nuan nyadika endur alai rumah Nuan, iya nya Langkau Kain TUHAN ti udah digaga Nuan Empu.

¹⁸Nuan, TUHAN, deka nyadi Raja belama lama iya.”

¹⁹Orang Israel bejalai nengah tasik nya nengah tanah ti rangkai. Tang lebuh kerita perang orang Ejip, enggau kuda, enggau orang ke nepan kerita perang sida bejalai nengah tasik nya, TUHAN ngasuh ai nya pulai baru, lalu ngelamun sida.

²⁰Nabi Miriam, menyadi indu Aron, mai tamborin, lalu semua indu ke bukai bela nitihka iya, nebah tamborin sida lalu betanda.

²¹Ku iya belagu ke sida: “Belagu ke TUHAN, laban Iya udah menang. Iya udah nikauka kuda enggau orang ke nepan kuda ngagai tasik.”

²²Udah nya Moses lalu nguluka orang Israel angkat ari Tasik Mirah, lalu bejalai ngagai menua puang Sur. Sida bejalai tiga hari nengah menua puang nya, tang nadai tetemuka ai.

²³Udah nya sida lalu datai ba endur siti ti dikumbai Marah, tang ai dia pait, lalu sida enda ulih ngirup ai nya. Nya kebuah endur nya dikumbai Marah.[21]

²⁴Orang mayuh lalu mutap ngelaban Moses, lalu nanya ngagai iya, “Nama utai diirup kami?”

²⁵ Moses lalu bebendar besampi ngagai TUHAN. TUHAN lalu nunjukka siti repik kayu. Moses lalu nikauka repik kayu nya ngagai ai nya. Ai nya lalu ulih diirup. Nya meh endur alai TUHAN meri sida adat enggau undang-undang, lalu nya mega endur alai Iya nguji sida.

²⁶Ku TUHAN bejaku, “Enti kita deka ngasika Aku enggau pengabis ati kita, ngereja utai ti ngena, sereta ngasika pesan enggau adat Aku, Aku enda ngukum kita ngena penyakit ti udah diasuh Aku ninggang orang Ejip. Aku tu TUHAN ti ngeraika kita.”

²⁷Hari siti sida lalu datai di Elim. Endur nya bisi dua belas iti mata ai, enggau tujuh puluh pun kayu engkerema. Sida lalu nirika kem sida ngimbai ai nya.