Read Iban Pemansut 17 Bible Online

Pemansut 17 - Iban bible

Pemansut 17

¹ Semua orang Israel lalu angkat ari menua puang Sin, mindah ari endur siti ngagai endur siti, nitihka asuh TUHAN. Sida nirika kem sida di Repidim, tang endur nya nadai ai.

²Sida lalu mutap ngagai Moses, ku sida, “Beri kami ai irup.” Disaut Moses, “Nama kebuah kita mutap? Nama kebuah kita nguji TUHAN?”

³Tang orang Israel balat amat aus, lalu sida majak mutap ngagai Moses. Ku sida, “Nama kebuah nuan mai kami pansut ari menua Ejip? Kati nuan deka ngasuh kami, anak kami enggau jelu tupi kami mati aus?”

⁴Moses lalu bebendar besampi ngagai TUHAN. Ku iya, “Nama utai ti ulih dikereja aku ke sida tu? Sida nyau sedia deka nuku aku ngena batu.”

⁵TUHAN lalu bejaku ngagai Moses, “Bai sekeda tuai orang Israel enggau nuan, lalu bejalai dulu ari bala mayuh. Bai tungkat ti udah dikena nuan malu ai Sungai Nile.

⁶Aku deka bediri di mua nuan ba sigi batu ba Bukit Sinai. Palu batu nya, lalu ai deka pansut ari batu nya, ngambika bisi diirup orang mayuh.” Moses lalu malu batu nya di mua bala tuai orang Israel.

⁷Endur nya lalu dikumbai Masah enggau Meribah, [23] laban orang Israel mutap sereta nguji TUHAN, lebuh sida nanya, “Kati TUHAN bisi enggau kitai, tauka nadai?”

⁸Orang bansa Amalek datai lalu nyerang orang Israel di Repidim.

⁹Moses lalu bejaku enggau Josua, “Pilih sekeda orang ke lelaki, lalu serang orang Amalek nya pagila. Aku deka bediri ba munggu, megai tungkat ti diasuh Allah Taala bai aku.”

¹⁰Josua lalu ngereja nitihka asuh Moses, lalu mansang nyerang orang Amalek. Moses, Aron enggau Hur lalu niki ngagai tuchung munggu sigi.

¹¹Seagi-agi Moses ngedarka lengan iya, orang Israel menang, tang lebuh iya nurunka lengan iya, orang Amalek belabuh menang.

¹²Lebuh lengan Moses nyau lelak, Aron seduai Hur lalu mai sigi batu alai Moses duduk, lalu seduai iya bediri ngimbai iya, lalu nuatka lengan iya enda engkebut nyentuk ngagai padam mata panas.

¹³Nya jalai Josua ngalahka orang Amalek.

¹⁴ Udah nya TUHAN bejaku ngagai Moses, ku Iya, “Tuliska jerita pasal pemenang tu, ngambika pemenang tu dikingatka. Padahka ngagai Josua, Aku deka ngeluska semua orang Amalek.”

¹⁵Moses lalu ngaga siti alta, lalu ngumbai alta nya, “TUHAN Nyadika Menira Aku.”

¹⁶Ku Moses, “Tuatka tinggi menira TUHAN! [24] TUHAN deka majak ngelaban genap serak orang Amalek!”