Read Iban Pemansut 18 Bible Online

Pemansut 18 - Iban bible

Pemansut 18

¹Jetro, mentua Moses ti lelaki, ti nyadi imam orang Midian, bisi ninga pasal semua utai ti udah dikereja Allah Taala ke Moses, enggau ke orang Israel, lebuh TUHAN mai sida pansut ari menua Ejip.

² Nya alai Jetro nemuai ngagai Moses, mai Sipora, bini Moses ke tinggal di menua,

³ enggau anak lelaki iya ke dua iku, Gersom seduai Elieser. (Moses udah nyebut, “Aku udah nyadi orang kampar di menua ti nyelai.” Nya kebuah iya meri anak iya nama Gersom.[25]

⁴Iya bisi mega udah nyebut, “Allah Taala apai aku udah nyaup aku lalu ngelepaska aku ari pedang raja menua Ejip.” Nya alai iya meri nama Elieser ngagai anak lelaki iya ke siku.[26])

⁵Jetro, bini Moses enggau anak Moses ke dua iku lalu nemuai ngagai Moses di menua puang ba endur alai Moses ti udah nirika kem, ba bukit ti kudus nya.

⁶Jetro udah ngirumka pesan ngagai Moses madahka sida deka nemuai ngagai iya.

⁷Moses lalu mansang ngambat Jetro, meremi di mua iya, lalu nyium iya. Sida lalu betanyaka pasal pangan diri, lalu udah nya mansang ngagai langkau kain Moses.

⁸Moses lalu madahka semua utai ti udah dikereja TUHAN ngagai raja enggau ngagai orang Ejip, kena TUHAN ngelepaska orang Israel. Moses mega madahka pasal pemerinsa pengidup orang Israel di rantau jalai, enggau chara TUHAN udah ngelepaska sida.

⁹Lebuh Jetro ninga semua berita nya, ati iya lantang

¹⁰lalu ku iya bejaku, “Pujika TUHAN, ti udah ngelepaska nuan ari raja orang Ejip enggau ari nembiak iya! Pujika TUHAN, ti udah ngelepaska nembiak Iya ti nyadi ulun!

¹¹Diatu baru aku nemu TUHAN lebih agi bekuasa ari semua petara, laban Iya udah ngelepaska orang Israel ari kuasa orang Ejip, lebuh orang Ejip sumbung enggau orang Israel.”

¹²Udah nya Jetro lalu ngenjuk piring tunu segala, enggau piring ti bukai, ngagai Allah Taala. Aron enggau semua tuai orang Israel lalu datai sama enggau iya, deka makai pemakai ti kudus nya di mua Allah Taala.

¹³Pagi hari siti, Moses ngatur pechara orang Israel, lalu iya kiruh ngereja pengawa nya berengkah ari pagi nyentuk ngagai malam.

¹⁴Lebuh Jetro meda semua utai ti dikereja Moses ke orang Israel, iya lalu bejaku, “Nama utai nya ti dikereja nuan ke orang mayuh? Nama kebuah nuan ngereja nya kediri, lalu orang mayuh bediri ditu berengkah ari pagi nyentuk ngagai malam?”

¹⁵Disaut Moses, “Laban sida datai ngagai aku keran deka nemu peneka Allah Taala.

¹⁶Lebuh sida bisi laya enggau pangan diri, sida datai ngagai aku, lalu aku ngatur sapa sida ke ngena enggau ke salah, lalu aku madahka adat enggau atur Allah Taala ngagai sida.”

¹⁷Udah nya Jetro lalu bejaku, “Chara nuan ngereja nya enda manah.

¹⁸Nuan enggau orang ke datai ngagai nuan semina ngelelakka diri empu aja. Pengawa tu kelalu berat ke nuan. Nuan enda ulih ngereja pengawa tu kediri.

¹⁹Dingaka jaku aku; aku deka meri nuan jaku lalau, lalu Allah Taala deka meruan enggau nuan. Nuan nyadika pengari orang mayuh di mua Allah Taala, lalu mantaika laya sida di mua Iya;

²⁰lalu nuan patut ngajar sida adat enggau atur Allah Taala, lalu nerangka ngagai sida chara jalai idup, enggau utai ti patut dikereja sida.

²¹Nuan patut mega milih orang ke landik ari semua orang Israel, orang ke nangika Allah Taala, orang ke tau dikarapka, ke enggai makai suap; lalu asuh sida nyadi tuai megai beribu iku, beratus iku, ngelima puluh iku enggau bepuluh iku orang.

²²Awakka sida bekereja tetap nyadi hakim ke orang mayuh. Sida tau mai semua pekara ti mar ngagai nuan, tang sida empu patut ngatur semua pekara ti mit. Chara tu deka ngasuh pengawa nuan lempung agi, laban sida bisi nyaup nuan ngereja pengawa nya.

²³Enti nuan ngereja nya, nitihka pesan Allah Taala, nya baru nuan deka tan ngereja pengawa, lalu semua orang tu pulai ngagai endur sida empu mai pemaik.”

²⁴Moses mendingka ajar mentua iya, lalu ngereja semua utai ti diasuh iya.

²⁵Moses milih orang ke landik ari semua orang Israel, lalu ngasuh sida nyadi tuai megai orang mayuh, megai beribu, seratus, lima puluh, enggau sepuluh iku orang.

²⁶Sida bekereja tetap nyadi hakim ke orang mayuh; sida mai pekara ti mar ngagai Moses, tang sida ngatur pekara ti mit.

²⁷Udah nya, Moses meri selamat tinggal ngagai Jetro. Jetro lalu pulai ngagai menua iya empu.