Read Iban Pemansut 2 Bible Online

Pemansut 2 - Iban bible

Pemansut 2

¹Ba urung maya nya, siku lelaki ari raban bansa Lewi jadi enggau siku indu ke ari raban bansa iya empu.

² Indu nya ngadaka siku anak lelaki. Lebuh iya meda penyigat gamal anak mit nya, iya lalu ngelalaika iya tiga bulan.

³Tang lebuh anak mit nya nyau enda ulih dilalaika agi, iya lalu ngambi siti bakul ti digaga ari teberu, lalu melali bakul nya enggau tar, ngambika bakul nya enda ulih masuk ai. Iya nyimpan anak mit nya dalam bakul nya, lalu udah nya ngengkahka bakul nya ba rumput ti bauh ba tebing sungai.

⁴Menyadi indu anak mit nya bediri enda jauh ari endur nya, deka nemu namaka penyadi anak mit nya.

⁵Anak indu raja nurun mandi ngagai sungai nya. Lebuh iya mandi, bala orang gaji iya bejalai ba sebelah tebing sungai nya. Anak indu raja nya lalu tepedaka siti bakul ba madang rumput, lalu ngasuh siku ari orang gaji iya ngambi bakul nya.

⁶Lebuh anak indu raja nya ngebakka bakul nya, iya lalu meda siku anak mit ti lelaki dalam bakul nya. Anak mit nya nyabak, lalu anak raja sinu ati ke iya. Ku iya, “Iya tu anak orang Hebrew.”

⁷Udah nya menyadi indu anak mit nya lalu nanya ngagai anak indu raja, “Kati tau aku madahka siku indu orang Hebrew ngambika iya ngibun anak mit nya ke nuan?”

⁸“Au, mupuk meh nuan,” ku anak indu raja nya nyaut. Nya alai indu nya mupuk. Iya lalu datai baru, mai indai anak mit nya empu.

⁹Ku anak indu raja nya bejaku enggau indu nya, “Bai anak mit tu, lalu ibun iya ke aku. Aku deka ngaji nuan.” Nya alai indu nya lalu mai anak mit nya, lalu ngibun iya.

¹⁰ Udah bekau nya, lebuh anak mit nya nyau besai, indu nya mai iya ngagai anak indu raja. Anak indu raja nya lalu ngiru nembiak nya nyadika anak iya empu. Ku anak indu raja nya berunding dalam ati diri, “Aku ngambi iya ari ai, nya alai aku meri iya nama Moses.”[3]

¹¹ Lebuh Moses nyau udah besai tuai, iya nemuai ngagai bansa iya empu, iya nya bansa orang Hebrew, lalu iya meda jalai sida balat amat dipejalka ngereja pengawa ti berat. Iya mega tepedaka siku orang Ejip munuh siku orang Hebrew, nya bansa Moses empu.

¹²Moses malik kiba kanan, lalu lebuh iya nadai meda orang nengkilaka iya, iya lalu munuh orang Ejip nya, lalu numbakka bangkai iya dalam pasir.

¹³Hari siti, iya mansang ngagai endur nya baru, lalu tepedaka dua iku orang Hebrew berekak. Ku iya bejaku enggau iya ke salah, “Nama kebuah nuan malu orang ari bansa nuan empu?”

¹⁴Ku orang nya nyaut, “Sapa ngasuh nuan merintah kami lalu nyadi hakim kami? Kati nuan deka munuh aku baka nuan ti munuh orang Ejip nya kemari?” Moses lalu takut, lalu ku iya bejaku dalam ati diri, “Orang udah nemu utai ti dikereja aku.”

¹⁵ Lebuh raja ninga pasal utai ti udah nyadi, iya lalu ngiga jalai munuh Moses, tang Moses rari lalu diau di menua Midian. Nyadi sekali, lebuh Moses duduk semak siti telaga, tujuh iku anak indu Jetro, imam orang di menua Midian, datai nyauk, lalu ngisi ai ngagai dulang jelu bedus enggau jelu kambin apai sida.

¹⁷Tang sekeda orang ke pengibun bedus muru bala anak indu Jetro. Udah nya Moses lalu mansang nulung bala anak indu Jetro, lalu meri jelu sida ngirup.

¹⁸Lebuh bala anak indu Jetro pulai ngagai apai sida, apai sida lalu nanya, “Nama kebuah kita tumu amat pulai sehari tu?”

¹⁹Ku sida nyaut, “Siku orang Ejip nulung kami lebuh kami diburu bala pengibun bedus. Iya nyauk ai ke kami, lalu meri jelu kami ngirup.”

²⁰“Dini alai iya?” ku Jetro nanya sida. “Nama kebuah kita ninggalka lelaki nya din? Asuh iya datai kitu ngambika iya makai enggau kitai.”

²¹Moses lalu besetuju deka diau dia, lalu Jetro meri anak indu iya ke benama Sipora nyadika bini Moses.

²²Sipora ngadaka siku anak lelaki, lalu ku Moses bejaku dalam ati diri, “Aku tu orang kampar di menua tu, nya alai aku meri iya nama Gersom.”[4]

²³Nyau berapa taun udah bekau nya, raja menua Ejip pen mati, tang orang Israel agi mengkang merinsa sereta nyabak minta tulung, lalu sabak sida didinga Allah Taala.

²⁴ Iya ninga sida bedemuh, lalu ingatka semaya Iya enggau Abraham, Isak enggau Jakop.

²⁵Iya meda orang Israel digaga nyadi ulun, lalu Iya sinu ati ke sida.[5]