Read Iban Pemansut 21 Bible Online

Pemansut 21 - Iban bible

Pemansut 21

¹“Beri adat tu ngagai orang Israel:

² Enti kita meli orang Hebrew nyadi ulun kita, iya deka bekereja ke kita enam taun. Dalam taun ti ketujuh, iya enda tau enda dilepaska, lalu iya enda ibuh mayar kita.

³Enti iya agi bujang lebuh iya nyadi ulun kita, iya enda tau mai bini iya lebuh iya angkat ari nya. Tang enti iya endang udah bebini lebuh iya nyadi ulun kita, iya tau angkat mai bini iya.

⁴Enti tuan iya meri iya bini, lalu bini iya nya ngadaka anak lelaki tauka anak indu, bini iya nya enggau anak iya sama diempu tuan iya, lalu lelaki nya angkat ari nya kediri.

⁵Tang enti ulun nya madahka diri rinduka tuan iya, rinduka bini iya, enggau ke anak iya, lalu enggai dilepaska,

⁶tuan iya enda tau enda mai iya ngagai endur alai nyembah Allah Taala. Dia iya deka ngasuh ulun nya bediri ngimbai pintu tauka tiang pintu, lalu nanchum pending iya ngena siti pekekas, lalu iya deka nyadi ulun seumur idup.

⁷“Enti orang nyual anak indu iya nyadi ulun, indu nya enda tau dilepaska, baka ke ngelepaska ulun ti lelaki.

⁸Enti indu nya dijual ngagai orang ke deka ngambi iya nyadi bini, tang lelaki nya enda rinduka iya, indu nya tau ditebus pulai baru. Tuan iya enda tau nyual iya ngagai orang bansa bukai, laban tuan iya udah enda manah enggau iya.

⁹Enti apai meli ulun ti indu lalu meri indu nya ngagai anak lelaki iya, apai lelaki nya enda tau enda ngaga indu nya baka anak iya empu.

¹⁰Enti anak lelaki nya deka bebini dua, iya enda tau enda, baka selama, majak meri pemakai, gari enggau hak ngagai bini iya ti keterubah.

¹¹Enti iya enda ngereja tanggungjawap nya ngagai bini iya, iya enda tau enda ngelepaska bini iya pechuma lalu nadai nerima bayar.

¹² “Barang sapa malu orang, lalu orang nya mati, orang ke malu iya nya deka dibunuh.

¹³ Tang enti iya tekelanjur munuh orang nya, lalu ukai sengaja deka munuh iya, iya tau rari ngagai siti endur ti deka dipilih Aku ke kita. Dia orang nya tau diau likun.

¹⁴Tang lebuh orang ringat lalu sengaja munuh orang, iya deka dibunuh, taja pen iya rari ngagai alta Aku ngiga pengelikun.

¹⁵“Barang sapa malu apai diri, tauka indai diri, deka dibunuh.

¹⁶ “Barang sapa nangkap lalu nabanka orang, nemuka laban iya deka nyual iya, tauka deka ngaga iya nyadi ulun, enda tau enda dibunuh.

¹⁷ “Barang sapa nyumpah apai tauka indai diri, deka dibunuh.

¹⁸“Enti orang belaya, lalu siku ari seduai nya nuku pangan ngena batu, tauka mukut iya, tang enda munuh iya, orang nya enda patut diukum bunuh. Enti orang ke dituku tauka dibukut nya sakit, tang udah lepas nya tau angkat lalu bejalai ke luar ngena tungkat, orang ke nuku tauka mukut iya enda tau enda mayar pengerugi hari iya ti enda gawa, lalu ngintu iya datai ke iya gerai.

²⁰“Enti orang ke bempu ulun malu ulun iya ngena kayu, nemuka ulun nya lelaki tauka indu, lalu ulun nya mati terus, orang ke bempu ulun nya deka diukum.

²¹Tang enti ulun nya enda mati dalam sehari tauka dua hari, tuan ke bempu ulun nya enda kena ukum, laban pemati ulun iya, ke endang reta tengkira iya empu, chukup nyadika ukum iya.

²²“Enti orang lelaki belaya, lalu ngemediska siku indu ke ngandung, lalu indu nya lenyau kandung, tang nadai pedis nama-nama kelimpah ari ke lenyau kandung, orang ke ngemediska iya enda tau enda diasuh mayar ukum nitihka pinta laki indu nya, sereta dikemendarka bala hakim.

²³Tang enti indu nya bakal, ukum ti dikena nya: nyawa balas nyawa,

²⁴ mata balas mata, ngeli balas ngeli, jari balas jari, kaki balas kaki,

²⁵betu balas betu, telih balas telih, malui balas malui.

²⁶“Enti orang malu ulun ti lelaki tauka ulun ti indu ba mata, lalu mata iya buta ketegal nya, orang nya enda tau enda ngelepaska ulun nya, laban mata iya sepiak udah buta.

²⁷Enti iya matahka sigi ngeli ulun iya, iya enda tau enda ngelepaska ulun iya nya, laban ulun iya udah patah ngeli.

²⁸“Enti sapi ti lelaki nanduk orang, lalu orang nya mati laban sapi nya, jelu nya enda tau enda dituku ngena batu, lalu isi iya enda tau diempa, tang orang ke bempu iya enda kena ukum.

²⁹Tang enti sapi nya selalu nanduk orang, lalu orang ke bempu iya udah diberi jaku tangkan, tang enda ngandang jelu nya - enti jelu nya nanduk orang, lalu orang ke ditanduk iya mati, jelu nya enda tau enda dituku ngena batu, lalu orang ke bempu jelu nya mega dibunuh.

³⁰Tang enti orang ke bempu jelu nya dipinta mayar ukum kena iya nebus nyawa diri, iya enda tau enda mayar semua duit tebus ti dipinta.

³¹Enti sapi ti lelaki nya nanduk nembiak ti lelaki tauka indu, adat tu deka mega dikena.

³²Enti sapi ti lelaki nya nanduk ulun ti lelaki tauka indu, orang ke bempu sapi nya enda tau enda mayar orang ke bempu ulun nya tiga puluh singkap duit pirak, lalu sapi nya deka dituku ngena batu datai ke iya mati.

³³“Enti orang enda nutup mua lubang kebung, tauka enti orang numbak lubang kebung lalu enda nutup mua lubang kebung nya, lalu jelu sapi ti lelaki tauka keledai labuh ngagai lubang nya,

³⁴orang ke bempu lubang kebung nya enda tau enda mayar rega jelu nya. Iya enda tau enda mayar duit nya ngagai orang ke bempu jelu nya, lalu iya tau bempu bangkai jelu nya.

³⁵Enti sapi ti lelaki, ti diempu orang siku, bisi nyayat sapi ti lelaki orang bukai, seduai iya enda tau enda nyual sapi ti lelaki ti agi idup nya, lalu bedua rega sapi nya. Seduai iya tau mega bedua dagin jelu ti udah mati nya.

³⁶Tang enti jelu nya endang ditemu selalu deka nanduk sapi bukai, lalu orang ke bempu iya enda ngandang iya, orang nya enda tau enda meri siku sapi ti lelaki ti idup ngagai orang ke bempu sapi ti mati nya, kena nganti pengerugi iya, lalu tau bempu bangkai jelu nya.