Read Iban Pemansut 22 Bible Online

Pemansut 22 - Iban bible

Pemansut 22

¹“Enti orang ngenchuri sapi, tauka bedus, lalu munuh jelu nya, tauka nyual iya, iya enda tau enda mayar sapi nya ngena lima iku sapi, tauka empat iku bedus kena mayar siku bedus.

²Iya enda tau enda mayar utai ti udah dichuri iya. Enti iya nadai utai kena mayar, iya deka dijual nyadi ulun kena mayar utai ti udah dichuri iya. Enti jelu ti udah dichuri iya, nemuka jelu nya sapi, keledai tauka bedus, bisi ditemu agi idup ba jari iya, iya enda tau enda mayar ngena dua iku jelu, ke genap iku jelu ti dichuri iya. “Enti penchuri kena tangkap tama ngagai rumah orang lebuh malam hari, lalu iya mati dibunuh, orang ke munuh iya enda dikumbai salah. Tang enti utai nya nyadi lebuh siang hari, orang ke munuh iya deka dikumbai salah.

⁵“Enti orang nejuka jelu iya ngulam ba padang, tauka ba kebun anggur, lalu jelu nya mawa lalu ngulam utai ti ditanam[29] ba umai orang bukai, orang ke bempu jelu nya enda tau enda mayar pengerugi orang ke bempu umai nya, ngena utai ari umai iya empu, tauka ari kebun anggur iya empu.

⁶Enti orang nyelup api ba tanah iya empu, lalu api nya nyerarai ngagai umai orang bukai, lalu nganguska gandum ti tumbuh dia, tauka gandum ti udah diketau lalu ditugungka dia, orang ke nyelup api nya enda tau enda mayar utai ti rusak nya.

⁷“Enti orang besetuju nyimpan utai ke pangan iya, nemuka utai nya duit, tauka utai ti berega, lalu utai nya kena churi ari rumah iya, penchuri nya, enti iya ditemu, enda tau enda mayar dua kali lipat.

⁸Tang enti penchuri nya enda ditemu, orang ke nyimpan utai ti berega nya enda tau enda dibai ngagai endur alai besembiang, lalu iya enda tau enda besumpah dia, madahka diri nadai ngenchuri utai pangan iya nya.

⁹“Dalam semua laya pasal pesaka, nemuka laya nya pasal jelu sapi, keledai, bedus, gari, tauka sebarang utai bukai ti lenyau, orang dua iku ke berebutka pesaka nya enda tau enda dibai ngagai endur alai besembiang. Orang ke dikumbai Allah Taala salah enda tau enda mayar dua kali lipat ngagai orang ke enggau iya berebutka pesaka nya.

¹⁰“Enti orang besetuju nyimpan keledai, sapi, bedus, tauka jelu bukai, ke pangan iya, lalu udah nya jelu nya mati, tauka bebadi, tauka ditabanka munsuh, lalu orang bukai pen nadai mega meda utai nya nyadi,

¹¹orang ke nyimpan jelu nya enda tau enda mansang ngagai endur alai besembiang, lalu besumpah madahka diri nadai ngenchuri tauka munuh jelu nya, lalu orang ke bempu jelu nya deka betanggungjawapka pengerugi diri empu, lalu pangan iya ke nyimpan jelu nya enda ibuh mayar iya.

¹²Tang enti jelu nya udah kena churi, orang ke nyimpan jelu nya enda tau enda mayar orang ke bempu jelu nya.

¹³Enti jelu nya mati laban jelu babas, orang ke nyimpan jelu nya enda tau enda mai teda bangkai jelu nya kena nandaka jelu nya udah mati laban jelu babas, lalu iya enda ibuh bebayar ke jelu nya.

¹⁴“Enti orang nginjau jelu ari pangan iya, lalu jelu nya bebadi tauka mati lebuh orang ke bempu jelu nya nadai dia, orang ke nginjau jelu nya enda tau enda mayar rega jelu nya enggau penuh.

¹⁵Tang enti utai nya nyadi lebuh orang ke bempu jelu nya bisi dia, orang ke nginjau jelu nya enda ibuh mayar rega jelu nya. Enti jelu nya disua, semina suaka jelu nya aja ti patut dibayar.

¹⁶ “Enti lelaki nipu indu dara bungas, ti enda betunang, lalu bulih tubuh iya, lelaki nya enda tau enda meri derian, lalu jadi enggau indu nya.

¹⁷Tang enti apai indu nya enda ngemendarka lelaki nya jadi enggau indu nya, lelaki nya enda tau enda meri apai indu nya duit nyampau derian ti diberi ngagai indu ke agi dara bungas.

¹⁸ “Bunuh indu ke ngereja keramat.

¹⁹ “Bunuh orang ke beleman enggau jelu.

²⁰ “Bunuh barang sapa ngenjuk piring ngagai petara bukai, kelimpah ari ke ngenjuk piring ngagai Aku ti TUHAN.

²¹ “Anang merinsa tauka nekanka pengidup orang kampar. Kingatka kita empu ti udah nyadi orang kampar di menua Ejip.

²²Anang merinsaka indu ke balu enggau orang ke nadai apai indai.

²³Enti kita merinsa tauka nekanka pengidup sida, Aku ti TUHAN, deka nyaut kangau sida,

²⁴lalu Aku deka ringat lalu munuh kita ngena pedang. Bini kita deka balu, lalu anak kita nadai agi apai.

²⁵ “Enti kita nyali duit ngagai bala nembiak Aku ke seranta, anang baka orang ke bejalika duit, lalu minta sida mayar bungai duit nya.

²⁶ “Enti kita ngambi baju panjai ari pangan kita nyadika gadai utang iya, kita enda tau enda mulaika baju nya ngagai iya baru sebedau padam mata panas,

²⁷laban semina baju nya aja ti dikemisi iya kena iya bebungkur. Nama utai bukai kena iya bebungkur lebuh iya tinduk? Lalu lebuh iya nyabak ngangauka Aku, Aku deka mending, laban Aku amat kasih.

²⁸ “Anang bejaku jai pasal Allah Taala, [30] lalu anang nyumpah tuai bansa kita.

²⁹“Beri ngagai Aku piring gandum, wain, enggau ari minyak kana kita, ba maya ti udah diletak. “Serahka anak tuai kita ke lelaki ngagai Aku.

³⁰Serahka anak tuai jelu sapi kita, enggau bedus kita ngagai Aku. Awakka anak tuai ti lelaki mengkang begulai enggau indai iya tujuh hari, lalu ba hari ti kelapan, serahka iya ngagai Aku.

³¹ “Kita tu orang ke diserahka ngagai Aku, nya alai kita enda tau makai dagin jelu ti mati laban jelu babas, tang beri dagin nya ngagai ukui.