Read Iban Pemansut 23 Bible Online

Pemansut 23 - Iban bible

Pemansut 23

¹ “Anang nusui berita ti bula, lalu anang besaksi bula ketegal kita deka nulung orang ke salah.

²Anang nitihka orang mayuh ngereja penyalah, tauka meri saksi ti enda lurus.

³ Anang berat sepiak lalu ngelaban orang ke seranta lebuh iya kena pechara.

⁴ “Enti nuan tepedaka jelu sapi, tauka keledai, ti diempu munsuh nuan lepas, bai jelu nya pulai ngagai iya.

⁵Enti nuan tepedaka keledai ti diempu orang ke begedika nuan rebah laban pemerat utai ti dibai iya, saup orang nya ngangkatka keledai nya bediri baru. Anang ninggalka iya pia aja.

⁶ “Anang meri atur ti enda lurus lebuh kita ngatur pechara ke orang ke seranta.

⁷Anang nuduhka orang salah enti iya nadai penyalah, lalu anang meri ukum bunuh ngagai orang ke nadai penyalah, laban Aku deka ngukum barang sapa ngereja utai ti jai baka nya.

⁸Anang makai suap, laban makai suap ngasuh orang enda ulih meda utai ti betul, lalu ngerusak orang ke nadai penyalah.

⁹ “Anang nekanka pengidup orang kampar. Kita empu nemu asai nyadi orang kampar, laban kita udah nyadi orang kampar di menua Ejip.

¹⁰ “Kita tau nanam lalu ngetau utai dalam kandang enam taun,

¹¹tang dalam taun ti ketujuh, anang nanam utai ba tanah kita, lalu anang ngetau sebarang utai ti tumbuh ba tanah nya, ngambika orang ke seranta tau makai utai ti tumbuh dia, lalu jelu babas tau makai teda utai nya. Baka nya mega chara kita enggau kebun anggur tauka enggau kayu kana kita.

¹² “Bekereja enam hari dalam seminggu, tang anang bekereja ba hari ti ketujuh, ngambika ulun kita, enggau orang bansa bukai ke bekereja ke kita, enggau jelu kita, tau belelak.

¹³“Pendingka semua utai ti udah disebut Aku ti TUHAN, ngagai kita. Anang nyembah petara bukai. Indah nyebut nama sida deh kita enda tau.

¹⁴“Intu tiga bengkah gawai dalam setaun kena kita ngemesaika Aku.

¹⁵ Dalam bulan Abip, iya nya bulan kita pansut ari menua Ejip, intu Gawai Roti Ti Enda Beragi, ngena jalai ti udah dipadahka Aku ngagai kita. Anang makai roti ti beragi dalam kandang tujuh hari kita ngintu Gawai nya. Anang datai nyembah Aku enti kita nadai mai piring.

¹⁶ “Intu Gawai Ngetau lebuh kita baru deka belabuh ngetau. “Intu Gawai Belangkau lebuh maya gugur daun, lebuh maya kita ngumpul buah ari kebun anggur enggau ari kebun buah kita.

¹⁷Tiap taun ba gawai tiga bengkah tu, semua kita ke lelaki enda tau enda datai nyembah Aku, TUHAN, ti Allah Taala kita.

¹⁸“Anang meri roti ti beragi, lebuh kita meri jelu nyadika piring kita ngagai Aku. Lemak jelu ti digaga nyadika piring ti diberi ngagai Aku lebuh gawai tu, nadai tau digalau ngagai pagi hari siti.

¹⁹ “Tiap taun, bai ngagai Rumah TUHAN Allah Taala kita buah bungas, ti pemadu manah, ti diketau kita. “Anang manduk anak domba tauka anak kambin ngena ai tusu indai iya empu.

²⁰“Aku deka ngirumka siku melikat bejalai dulu ari kita, ngambika nyaga kita lebuh kita bejalai, lalu mai kita ngagai endur ti udah disediaka Aku ke kita.

²¹Pendingka iya lalu kereja utai ti diasuh iya. Anang angkat ngelaban iya, laban Aku udah ngirumka iya, lalu iya enggai ngampun kita enti kita angkat ngelaban.

²²Tang enti kita ngasika iya, lalu kita ngereja semua utai ti diasuh Aku, Aku deka ngelaban semua munsuh kita.

²³Melikat Aku deka bejalai dulu ari kita, lalu nguluka kita ngagai menua orang Amor, orang Iti, orang Peris, orang Kanaan, orang Ibi, enggau orang Jebus, lalu Aku deka ngerusak sida.

²⁴Anang meremi ngagai, tauka nyembah petara nya, lalu anang nitihka jalai pengarap sida. Rusak petara sida, lalu tumbangka tiang batu keramat sida.

²⁵Enti kita nyembah Aku ti TUHAN, ti Allah Taala kita, Aku deka merekatka kita ngena pemakai enggau ai, lalu muai semua penyakit kita.

²⁶Indu enda gugur anak tauka punas di menua kita. Aku deka ngasuh kita panjai umur.

²⁷“Aku deka ngasuh orang ke ngelaban kita, takutka Aku. Aku deka ngasuh orang ke dilaban kita charut runding, lalu Aku deka ngasuh semua munsuh kita nguing lalu belanda rari ari kita.

²⁸Aku deka ngasuh indu gamang terebai dulu ari kita, lalu sida deka muru orang Ibi, orang Kanaan, enggau orang Iti ari mua kita.

²⁹Aku enda muru sida dalam kandang setaun aja, enggai ke menua nya nadai orang nguan, lalu jelu babas deka kelalu mayuh.

³⁰Aku deka muru sida mimit-mimit sekali, datai ke kita nyau chukup mayuh tubuh bempu menua nya.

³¹Aku deka ngaga garis entara menua kita belabuh ari Teluk Akaba nyentuk ngagai Tasik Tengah, enggau ari menua puang nyentuk ngagai Sungai Eupratis. Aku deka meri kita kuasa atas orang ke nguan menua nya, lalu kita deka muru sida pansut, lebuh kita nyerang.

³²Anang ngaga sempekat enggau sida, tauka enggau petara sida.

³³Anang nejuka orang nya diau dalam menua kita. Enti kita nejuka sida, sida deka mai kita bedosa ngelaban Aku. Enti kita nyembah petara sida, utai nya deka nyadi panjuk ti ngerusak kita.”